Учтурпанда хитай сақчилири билән гумандарлар арисида қанлиқ тоқунуш йүз бәргән

Мухбиримиз шөһрәт һошур
2013.07.31
pichan-lukchun-weqesi-saqchixana-hujum.jpg Пичан наһийиси лүкчүн базирида сақчиханиға һуҗум қилип көйдүрүлгән сақчи машинилири. 2013-Йили 26-июн.
Oqurmenler Teminligen

Пичан лүкчүндә йүз бәргән уйғур пидаийларниң сақчиханиға от қоюп һуҗум қилиш вәқәсидин икки күн кейин, ақсуниң учтурпан базиридиму бир мәйдан қанлиқ тоқунуш йүз бәргән.

Вәқәдә ақсу шәһәрлик сақчи идариси разведка бөлүминиң сақчиси әнвәр әйса пичақлиқ һуҗумға учрап еғир яриланған. Вәқә 6-айниң 28-күни учтурпан базириниң қашбойи аһалиләр комитетидики йеңи мәһәллә мәсчитиниң әтрапида йүз бәргән. Мәлум болушичә, вәқә сақчиларниң сақал қойғанларни вә лечәк артқанларни тәкшүрүш нишани қилип коча чарлаватқан мәзгилидә йүз бәргән. Вәқәдин кейин учтурпан вәзийити техиму җиддийлишип хитайниң бихәтәрлик тәдбирлири техиму кеңәйтилгән вә күчәйтилгән.

Учтурпан наһийилик һөкүмәт хизмәт бинасида нөвәттә туруватқан бир хадимни зиярәт

Мухбир: сиз нөвәттә туруветипсиз, болуватқан ишлардин хәвириңиз бар туруватамсиз яки хәвәрсизму?
Хадим: хәвирим бар. Болуватқан вәқәләр бәк җиқ болғандикин.....

Мухбир: сиз хәвәр тапқан әң йеңи вәқә қайси?
Хадим: маралбешидики вәқә....

Мухбир: учтурпандикисини дәп бериң, у қачан, қәйәрдә йүз бәрди?
Хадим: бир ай бопқалди, учтурпан базар ичидә йүз бәрди. Қашбуйи аһалиләр комитетиниң йеңи мәһәллә мәсчити әтрапида йүз берипту дәп аңлидим.

Мухбир: бу, сизгә йиғинда уқтурулған учурму, кочидин аңлиғанму?
Хадим: йиғинда уқтурулған, техи бүгүнму саәт 7дә йиғинға қатнишип чиқтим. Шуҗи һушярлиқиңларни өстүрүңлар, өзүңларниң һәм идариниң бихәтәрликини қоғдаңлар деди.

Наһийилик партком бинасида нөвәттә туруватқан хадимни зиярәт

Мухбир: вәқә йүз бәргән йәр сиз нөвәттә туруватқан йәрдин қанчилик узақта?
Хадим: йеңи мәһәллә мәсчити әтрапида бир мәһәллә арисида йәни асан қечип кетәләйдиған, мөкүвалалайдиған пиңфаң өйләр (йәр өйләр) бар йәрдә йүз берипту.

Мухбир: вәқәниң тәпсилатидин хәвириңиз болдиму?
Хадим: мән пәқәт кочидин аңлидим, бир җүмә күни иди, уштумтутла һәммә йәрни сақчи қаплап кәтти. Хизмәтдашлардин аңлисам, пуқрадин бири өлүпту, сақчидин иккиси ярилиниптумиш.

Мухбир: сизгә йиғинда уқтурулмидиму?
Хадим: яқ, идарә башлиқлириға ички пайдилиниш материяли арқилиқ уқтурупту, биз кочидин аңлидуқ.

Наһийәдики бир қамақхана ишханисида нөвәттә туруватқан хадимни зиярәт

Мухбир: вәқәдә қанчә адәм өлүп, қанчә адәм ярилинипту?
Хадим: икки сақчи ярилинипту, бири өлүпту дегәндәк гәпләрни кочидин аңлидим(йиғиндин әмәс)

Мухбир: вәқә немә сәвәбтин келип чиқипту?
Хадим: мәсчиткә маңған кишиләрниң сақилини тәкшүрүватқан икән.

Бир идарә башлиқини зиярәт

Мухбир: вәқәниң баш-ахиридин хәвириңиз болдиму?
Хадим: бир қисмидин хәвирим болди.

Мухбир: вәқә садир қилғучилар кимләр икән?
Хадим: уни билмидим, билидиғиним яриланғучи сақчи әнвәр әйса, у шу күни ақсудики дохтурханиға йөткилиптикән, өлгәнму, һаятму уқмаймән.

Учтурпан базарлиқ сақчиханини зиярәт

Мухбир: вәқәдә яриланған әнвәр әйса силәрниң сақчиханиниң хадимиму?
Хадим: яқ, у наһийилик җ х идариси разведка бөлүминиң сақчиси.

Мухбир: униң һазирқи әһвали қандақ.
Хадим: ақсу вилайәтлик 1-дохтурханида давалиниватиду.

Учтурпан якөврүк сақчихана башлиқини зиярәт

Мухбир: вәқә қандақ сәвәбтин келип чиққан?
Хадим: делоға мән арилашмидим. Хизмәтдашлардин аңлишимчә, вәқә коча чарлаш җәрянида, сақаллиқ бирини тәкшүрүш давамида йүз берипту.

Мухбир: вәқәдә өлгән, яриланғанларниң сани қанчә икән?
Хадим: бу һәқтә мәхсус мәлумат тапшуруп алмидим. Аңлиғиним гумандар етип өлтүрүлүпту, хизмәтдишимиз әнвәр әйса ярилинипту, әһвали еғир икән.

Мухбир: қайси күни, саәт нәччидә йүз берипту?
Хадим: 6-айниң 28-күни, пичанда вәқә йүз берип икки күндин кейин, җүмә күнлүктә, җүмәдин бурун саәт 11 ләрдә йүз берипту.

Юқирида учтурпанда хитай сақчилири билән гумандарлар арисида қанлиқ тоқунуш йүз бәргәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.