Шиветсийәдики хитай әлчиханисиға четилған зор җасуслуқ делоси вә униң баш-ахири

Мухбиримиз қутлан
2015-05-07
Елхәт
Пикир
Share
Принт
Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
Рәсимдики қолини көтүрүп турған әр бабур мәхсут, оң тәрәптики хитай аял шиветсийәдин қоғлап чиқирилған хитай аял дипломат җов лулу. 2010-Йили.
svd.se din elinghan

2-Қисим: җасусниң торға илиниши

1990-Йилларниң ахирлирида тунҗи түркүмдики уйғур көчмәнләр һәр хил йоллар билән шиветсийәгә келип олтурақлишишқа башлайду.

Шималий явропадики бу тинч вә параван әлдә тунҗи түркүмдики уйғур җамаити шәкилләнгән күндин етибарән уларниң өз вәтини үчүн товлиған садалириму яңрашқа башлайду.

Шу йилларда мәрһум күрәш күсән, фаруқ садиқ қатарлиқ кишиләрниң башчилиқида тунҗи уйғур тәшкилатлири қурулуп, шиветсийә хәлқигә уйғурларниң авази аңлитилиду.

Дәл шу мәзгилләрдә хитай һөкүмитиниң шиветсийәни өз ичигә алған явропа иттипақидики һәрқайси әлләрдә йошурун ахбарат топлаш, техника оғрилаш шундақла тибәт вә уйғур көчмәнлириниң сиясий паалийәтлири һәққидә мәлумат йиғиштәк җасуслуқ һәрикәтлириму күчийишкә башлайду.

Сәпо, йәни шиветсийә дөләт хәвпсизлик идарисиниң җасуслуққа қарши истратегийә анализчиси вилһелим унге 11-сентәбир вәқәсидин кейин хитайниң америка қатарлиқ дәриҗидин ташқири дөләтләрдила әмәс, бәлки шиветсийәдәк битәрәп дөләтләрдиму уйғур қатарлиқ сиясий көчмәнләргә даир ахбаратларни топлашқа башлиғанлиқини алаһидә тәкитләйду.

Шиветсийә таратқулири ашкарилиған учурлар һәмдә ситокһолм шәһәрлик сот мәһкимисиниң 2010-йили 8-марттики сот материялиға қариғанда, шиветсийә хәвпсизлик тармақлири 2007-йилиниң башлиридин башлапла ситокһолмдики хитай әлчиханисиниң мәхпий һәрикәтлиригә диққәт қилишқа башлайду.

Шиветсийә уйғур комитетиниң әйни вақиттики рәиси абдушүкүр муһәммәт бу һәқтә мәхсус тохтилип, шиветсийә хәвпсизлик хадимлириниң 2007-йиллардила ситокһолмдики уйғур тәшкилати мәсуллири билән бу һәқтә сөһбәтләшкәнликини әсләйду.

Ситокһолмдики хитай әлчиханиси сиясий башқармисиниң мушавури җу лулу вә униң гуманлиқ һәрикити әң дәсләп шиветсийә хәвпсизлик тармақлириниң диққитини чекиду. Аял «дипломат» сүпитидә оттуриға чиққан бу хитай әлчихана хадими дипломатийә даириси вә әлчихана хадимлириниң һоқуқ даирисидин һалқип чиқип ахбарат топлашқа башлайду.

Сәпо хадимлири узун өтмәйла хитай әлчиханисидики бу «сирлиқ» дипломатниң «мухбир» қияпитидики йәнә бир хитай әр билән қоюқ мунасивити барлиқини байқайду.

Улар из бесип тәкшүрүш нәтиҗисидә лей да исимлик бу әрниң хитай әлчиханисидики аял дипломат җу лулуниң ери икәнликини җәзимләштүриду. Сәпо хадимлири йәниму илгириләп көзитиш җәрянида, хитайдики «хәлқ гезити» ниң сикандинавийә әллиридә турушлуқ алаһидә мухбири дегән нам билән ахбарат топлаватқан лей даниң әмәлийәттә хитай дөләт хәвпсизлик министирлиқиниң мәхпий офитсери икәнликини ениқлап чиқиду.

Сәпо хадимлири хитай дипломат җу лулу билән «мухбир» қияпитидики лей дани җиддий көзитиватқан мәзгилләрдә, йәни 2008-йилиниң январ ейида улар билән мунасивәтлик үчинчи бир гумандарни байқайду.

60 яшлар әтрапидики хитайчини раван сөзләйдиған бу уйғурниң һәм хитай әлчиханисидики аял «дипломат» билән һәм лей да исимлик хитай «мухбир» билән болған мәхпий алақиси сәпо хадимлириниң диққитини чекиду.

Шуниңдин етибарән сәпо хадимлири уларниң үч бурҗәклик мәхпий телефон алақиси вә хупиянә учришишлирини йеқиндин көзитиду. 60 яшлардики хитайчини раван сөзләйдиған бу уйғурниң хитай әлчиханисидики алаһидә хадимларға ахбарат йәткүзидиғанлиқи җәзимләштүрүлгән һаман, сәпо хадимлири улар тоғрилиқ дело турғузуп тәкшүрүшни күчәйтиду.

Сәпо хадимлири шиветсийә адаләт министирлиқиниң алаһидә тәстиқи билән 2008-йили 11-апрел күни хитай аял «дипломат» билән 60 яшлардики уйғур җасусниң учришишини тунҗи қетим нәқ мәйдандин көзитиду. Уларниң сөзлирини хупиянә тиңшайду.

Шуниң билән бир вақитта сәпо хадимлири йәнә, «мухбир» қияпитидики лей да исимлик хитай билән 60 яшлардики уйғур җасусниң телефон алақиси вә биваситә учришишлириниму мәхпий көзитиду.

Хитай әлчиханисидики аял «дипломат» вә униң «мухбир» қияпитидики ери 60 яшлиқ уйғур җасус гумандари билән ситокһолмдики хитайлар ачқан йеңи бейҗиң ресторанида, йордхаген кавапханисида, йоһансховдики пизаханида, әлхөдики кафеханида, гранд хотәлдә вә слуссендики макдоналдста учришиду.

Дәрвәқә, шу мәзгилләрдә 60 яшлардики бу сирлиқ кишиниң хитайлар билән хупиянә учришип туруши вә униң бир қисим гуманлиқ һәрикәтлири ситокһолмдики уйғур җамаитиниң көзигиму челиқиду.

Әйни вақитта шиветсийә уйғур комитетиниң катиплиқ вәзиписини өтәватқан абдушүкур самсақ әпәнди өзиниң 2008-йили 3-ай мәзгилидә 62 яшлиқ бу кишини слуссендики мәкдоналдста бир хитай аял билән көргәнликини әслимә қилиду.

Сәпо хадимлири 2008-йили 1-айдин таки 2009-йили 6-айниң 4-күни җасус гумандари рәсмий қолға елинғичә болған арилиқта униң хитай әлчиханисидики аял «дипломат» вә униң «мухбир» қияпитидики ери билән әң аз дегәндә 180 қетимдин көпрәк мәхпий телефон алақиси қилғанлиқини байқайду. Буниң ичидә 59 қетимлиқ телефон алақиси кочидики аммиви телефонда, қалғанлири җасус гумандариниң қолидики 9 данә қол телефонида елип берилиду. Икки данә қол телефон мәхсус қарши тәрәпкә сигнал бериш үчүнла ишлитилиду.

Ундин башқа, 60 яшлардики бу җасус гумандари шиветсийә хәвпсизлик хадимлириниң йошурун көзитиши астида хитай дипломати җу лулу билән 6 қетим, «мухбир» қияпитидики лей да билән 10 қетим охшимиған орунларда учришиду. Бу 16 қетимлиқ учришиш җәрянида улар башқиларниң диққитини қозғап қоймаслиқ үчүн 29 нөвәт орун йөткәйду.

Шиветсийә хәвпсизлик идарисиниң җасуслуққа қарши анализчиси вилһелм унге бу һәқтә тәһлил йүргүзүп, «уларниң бу хил һәрикити дәл классик ишпийонлуқ маһарәтлириниң бир түригә кириду» дәп ениқлима бериду.

Сәпо хадимлири шиветсийәдики хитай әлчиханисиға четилған бу зор җасуслуқ делосини бир йерим йил из бесип тәкшүрүш, мәхпий аңлаш һәмдә толуқ дәлил-испатларни топлаш арқилиқ 2009-йили 6-айниң 4-күни 62 яшлиқ җасус гумандарини тутиду.

Бу үрүмчидә «5-июл қанлиқ вәқәси» йүз бериштин бир ай бурунқи вәқә иди!

Җасус тутулди. Вәһаләнки, шиветсийәдики уйғур җамаити хитай җасусниң қара көләңгиси ташлиған вәһимә вә һәйранлиқ ичидә чөчүп ойғанди. Җасусниң муһаҗирәттики уйғур җамаитигә салған вәһимиси уларниң йирақтики мунқәрз вәтини үчүн соққан йүрики вә чоқанлирини тохтитип қалалмиди.

(2-Қисим түгиди, давами бар)

Пикирләр (0)
Share
Толуқ бәт