Amanliq mudiri: "Memettursun haji tarawa namizini kem oqughanliqi üchün tutuldi"

Muxbirimiz shöhret hoshur
2018-01-08
Élxet
Pikir
Share
Print
Abdujélil hajim(ongdin ikkinchi) qatarliq qeshqer wilayetlik soda-sana'et birleshmisining bir qisim ezaliri islam'abadtiki shah faysal meschiti aldida. 2014-Yili yaz, pakistan.
Abdujélil hajim(ongdin ikkinchi) qatarliq qeshqer wilayetlik soda-sana'et birleshmisining bir qisim ezaliri islam'abadtiki shah faysal meschiti aldida. 2014-Yili yaz, pakistan.
RFA/Shöhret Hoshur

Qeshqerdiki bir paylaqchining "Terbiye" leshtikiler heqqide pash qilghanliri (2)

Qeshqerde ötken yili tutqun qilin'ghan 4 neper tonulghan soda-karxanichi heqqide muxbirimizgha melumat bergen qeshqer chasa bashqarmisining amanliq mudiri, tutqunlardin "Eziz diyar soda sariyi" ning sahibi memettursun hajining tarawa namizini kem oqughanliqi üchün؛ "Emin soda sariyi" ning sahibi ghéni hajining nezir yémigenliki üchün "Diniy esebiylik" gumani bilen tutqun qilin'ghanliqini ashkarilidi.

Biz mezkur 4 neper soda-karxanichining tutulush sewebini éniqlash üchün ular tewe bolghan saqchixanigha téléfon qilduq. Saqchi xadimliri ehwal heqqide sheherlik teshwiqat bölümi bilen alaqilishishimizni tewsiye qildi, emma 4 neper sodigerning qamaqta ikenlikini inkar qilmidi. Qeshqerdiki chasa bashqarmisi amanliq mudirining pash qilishiche, abdujélil hajim diniy étiqadining mustehkemliki we jama'etchilikining kengriliki seweblik tutulghan bolsa, ghéni imin bilen memettursun hajim, "Diniy esebiylik" bahanisi bilen tutulghan. Uning déyishiche, "Eziz diyar soda sariyi" ning sahibi memettursun haji aldinqi yili ramizan mezgilide tarawini kem oqughanliqi üchün uning üstidin "Diniy esebiylik" gumani tughulghan. "Emin soda sariyi" ning sahibi ghéni emin nezir yémigenliki üchün diqqet tartqan.

Weziyettin xewerdar anglighuchimizning bayan qilishiche, da'iriler Uyghur sodigerlerni tutqun qilishta saqchilargha qarighanda paylaqchilardin köprek paydilan'ghan. Qeshqer saqchilirining tejribilik paylaqchisi, chasa bashqarmisidiki amanliq mudirining özila 50 ke yéqin gumanliq kishi üstidin melumat bergen. U yip uchi bergen kishilerdin 8 nepiri sodiger bolup, ular qent-nawat sodigiri rishat haji, efendi shirkitining sahini tahir haji, we qurulush matériyalliri sodigiri sawut memet qatarliqlardur. Özining qeshqer sheher ichidiki ikki asiya baziri, merkizi meschit etrapi we toy-tökünlerdin uchur toplaydighanliqini ashkarilighan mezkur paylaqchi, özi pash qilghan 50 kishidin 30 che kishining nöwette "Terbiyelesh merkizi" de ikenliki, qalghanlirining aldi 12 yil keyni 5 yil késilgenlikini bayan qildi.

Bu paylaqchi yeni körsetken bu xizmetliri seweblik hazirghiche héchqandaq bir mukapat almighanliqi, emma xitay dölet bixeterlik tarmaqliridin ayda 300-500 yüen arisida ma'ash alghanliqini bayan qildi.

Qeshqerde nöwette qanchilik kishining paylaqchiliq xizmitige séliniwatqanliqi melum emes. Emma 4 neper sodigerning tutulghanliqi heqqide bizge melumat bergen, qeshqer weziyitidin xewerdar bir anglighuchimiz, nöwette xitay da'irilirining Uyghur rayonidiki qanunsiz we gheyriy insaniy ijra'atlirini dawamlashturush üchün özining qoral küchidin bashqa yene Uyghur jem'iyitidiki exlaqiy tebi'iti ajiz yaki normalsiz insanlardinmu paydiliniwatqanliqini ilgiri sürdi.

Toluq bet