Қәшқәр уйғур нәшриятиниң хадимлиридин 30 пирсәнтиниң тутқунда икәнлики ашкариланди

Мухбиримиз шөһрәт һошур
2018-11-20
Елхәт
Пикир
Share
Принт
Қәшқәр уйғур нәшриятидин тутқун қилинған зиялийлардин (солдин оңға): әдиб һаҗи мирзаһид керими әпәнди, шаирә чимәнгүл авут ханим вә мәмәтҗан аблиз бөрияр әпәнди.
Қәшқәр уйғур нәшриятидин тутқун қилинған зиялийлардин (солдин оңға): әдиб һаҗи мирзаһид керими әпәнди, шаирә чимәнгүл авут ханим вә мәмәтҗан аблиз бөрияр әпәнди.
Photo: RFA

Қәшқәр уйғур нәшриятидин бултур вә бу йил ичидә тутулғанлар һәққидики ениқлашлиримиз давамида, мәзкур нәшриятта 49 нәпәр ишчи-хизмәтчи барлиқи, булардин 4 нәпириниң хитай икәнлики, қалған 45 нәпәр хадимдин 14 нәпириниң, йәни 30 пирсәнтиниң тутқунда икәнлики ашкариланди.

Қәшқәр уйғур нәшриятидин 14 кишиниң тутқунда икәнлики һәққидә учур тапшурувалғандин кейин, биз бу 14 кишиниң ениқ кимлики һәққидә давамлиқ һалда мәлумат игилидуқ.

Зиярәтлиримиз давамида телефонимиз қәшқәрниң мәлум бир йезисиға чүшкән хизмәт гурупписиниң телефониға бағланди. Нөвәттә сиясий тәрбийә хизмити билән шуғуллиниватқан, илғар партийә әзалиридин тәшкилләнгән бу гуруппа хадимлири қәшқәр нәшриятидики тутқунларниң әһвалидин мәлумат бәрди.

Мәлум болушичә, қәшқәр уйғур нәшриятиниң уйғур тәһрир бөлүминиң мудири абдурахман абдуреһим бултур өктәбирдә тутқун қилинған. Йәнә мәлум болушичә, қәшқәр нәшриятидин алий муһәррир гүзәлнур қасим билән анаргүл һеким әң йеқинда тутқун қилинған. Ениқлашлиримиздин мәлум болушичә, өткән йил тутулғанлар арисида корректор мәмәт сидиқ, тохтамлиқ хадим әмирулла әнвәрму бар икән.

«Мәсилилик китаблар» ни тәкшүрүш нами астида уйғур нәшриятчилиқиға қарши қозғалған бу зәрбә долқунида һәтта наборчикликларму чәттә қалмиған. Бу долқунда «‹мәсилилик китаб' қа қоли тәккән һәрқандақ киши җавабкарлиққа тартилиш» дегән буйруққа бинаән китабни язған, тәһрирлигән, тәстиқлиғандин башқа, уни басқан ишчиларму зәрбә нишани болған. Буниң нәтиҗисидә ишчи зәйтунә обулқасим билән мәмәт зунунму қамаққа елинған. Йәнә мәлум болушичә, пенсийәгә чиққан тәһрир маһинур һамут чәтәл зиярити сәвәблик тутуп кетилгән.

Бу төвәнгә чүшкән кадирлар ичидики қәшқәр нәшриятиниң әһвалидин йеқиндин хәвәрдар болған бир хадим, бу нәшриятта җәмий 49 нәпәр хадим барлиқи, булардин 4 нәпириниң хитай икәнлики буларниң пәқәт мәмури ишларға мәсул икәнликини баян қилди. У йәнә қалған 45 хадимниң уйғур икәнликини, улардин һазирға қәдәр 14 хадимниң тутқун қилинғанлиқини вә тутқунниң техи тохтимиғанлиқини, чүнки «мәсилилик китаблар» үстидики тәкшүрүшниң техи давам қиливатқанлиқини ашкарилиди.

Илгирики программилиримизда, қәшқәр нәшриятиниң 3 әвлад башлиқлиридин аблиз өмәр, осман зунун вә аблаҗан сейитларниң, шундақла балилар әдәбияти язғучиси мәмәтҗан аблиз бөрияр вә пешқәдәм әдиб һаҗи мирза кериминиң тутулған вә кесилгәнликини хәвәр қилған идуқ. Буларни бүгүнкиләр билән қатқанда қәшқәр уйғур нәшриятидики 45 хадимниң 14 нәпири йәни 30 пирсәнтиниң тутқунда икәнлики айдиңлашти.

Радийомизға кәлгән инкаста, қәшқәр уйғур нәшриятида һазирға қәдәр рәһбәрлик вәзиписи өтигәнләрдин, абләй дегән кишиниңла аман қалғанлиқи, униңму вапат болуп кәткәнлики үчүнла тутқундин аман қалғанлиқи илгири сүргән хизмәт гурупписидики бир хадим, қәшқәр нәшриятиниң әң дәсләпки рәһбириниң мәрһум абләй абдузаһир дегән киши икәнликини тилға алди.

Хитайниң қәшқәр уйғур нәшриятиға қарита елип барған бу тәқиб вә зәрбә һәрикити һәққидә америкидики доктор қаһар баратниң қаришичә, хитай бу нөвәт өзигә қарши йезилған китабларғила әмәс, бәлки уйғур нәшриятчилиқиниң мәвҗутлуқиға қариши һәрикәт қозғиған.

Пикирләр (0)
Share
Толуқ бәт