Йәкәндики 8-март вәқәсидин бурун бәшкәнт вә кәчлик базарда вәқә йүз бәргәнлики ашкариланди

Мухбиримиз шөһрәт һошур
2015-03-24
Share
yeken-weqesi-abdugheni-turdi.jpg Уйғур исянчилар тәрипидин гөрүгә елинип, хитай сақчилири тәрипидин қошуп етиветилгән абдуғени турди. 2014-Йили май, йәкән.
RFA

Мушу айниң 8-күни йәкәндә йүз бәргән тағарчи йезилиқ қораллиқ қисим башлиқи вә униң аилә-тавабиатини өлтүрүш вәқәси һәққидә мухбиримизниң ениқлашлири давамида, вәқәдин икки күн бурун, шу вәқәни пәйда қилған пидаийларниң йезиси-бәшкәнт базирида йәнә бир қанлиқ вәқә йүз бәргәнлики, 6-март күни йүз бәргән у вәқәдиму хитай тәрәптин икки кишиниң өлгәнлики ашкариланди.

Йәнә тағарчи йезилиқ қораллиқ қисим башлиқиға ян басқанлиқи үчүн өлтүрүлгән аманлиқ хадими барат мәмәтниң муқимлиқ хизмитигә мәсул акисиниң ашкарилишичә, 8-март вәқәсидин 3 ай бурун йәни 11-айниң 28-күни йәкән кәчлик базарда йәнә бир чоң қанлиқ вәқә йүз бәргән. Вәқәдә үч чақлиқ мотсиклит билән кәчлик базарға йетип кәлгән бир гуруппа пидаийлар базардики хитай көчмәнлиригә һуҗум қилған. Сақчилар һуҗумчиларниң һәммини нәқ мәйданда етивәткән; әмма бу вәқәниң тәпсилатини һәтта муқимлиқ хадимлириғиму билдүрмәстин җимҗит һалда бесиқтурувәткән.

Биз 8-март күни йәкәндә йүз бәргән қораллиқ қисим башлиқи фаң кеҗең вә униң аилә-тавабиатини өлтүрүш вәқәси һәққидә ениқлаш елип бериш җәрянида күтүлмигән йәнә бир учурға ериштуқ. Мәлум болушичә, 8-март вәқәсидин 2 күн бурун йәни 6-март күни бәшкәнт базиридиму вәқә йүз берип хитай тәрәптин икки киши өлгән.

Биз 8-март вәқәсидә қораллиқ қисим башлиқиға ян басқанлиқи үчүн өлтүрүлгән аманлиқ хадими барат мәмәтниң акисини зиярәт қилиш давамида, мәзкур вәқәдин 3 ай бурун, шу тәвәликтә йәни кәчлик базарда йәнә бир қанлиқ вәқә йүз бәргәнликидин хәвәр таптуқ.

8-Март күни йәкән базирида йүз бәргән тағарчи йезилиқ қораллиқ қисим башлиқи вә униң аилисини өлтүрүш вәқәсини пәйда қилған пидаийларниң йәкәнниң бәшкәнт базиридин икәнлики мәлум, әмма бәшкәнттә йүз бәргән 6-март вәқәсиниң бу пидаийлар билән алақиси бар-йоқлуқи һазирчә мәлум әмәс. 28-Ноябир йәкән кәчлик базарда йүз бәргән вәқәниң кичик бир вәқә әмәслики мәлум, әмма вәқәдә өлгән вә яриланғанларниң сани ениқ әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт