«Йепиқ тәрбийә» башланғандин буян қарақашта икки кәнттин 26 адәм лагерда җан үзгән

Мухбиримиз шөһрәт һошур
2018-06-14
Share
xoten-sqchi-kocha-tekshurush-soraq.jpg Хитай сақчилири кочида өтүп кетиватқан пуқраларни тосуп, сорақ қиливатқан көрүнүш. 2017-Йили 3-ноябир, хотән.
AP Photo/Ng Han Guan

Мухбиримизниң хотән қарақаштики «йиғивелиш лагерлири» һәққидә әһвал игиләшлири давамида уйғур диярида «йепиқ тәрбийә» долқуни қозғалғандин буян қарақаш базириниң чинибағ сақчиханисиға тәвә икки кәнттинла 26 кишиниң лагерда җан үзгәнлики ашкариланди.

Бәйду учур амбирида көрситилишичә, қарақаш наһийәсиниң омумий нопуси 530110 икән. Қарақаш базириниң омумий нопуси болса 34446 икән. Қарақаш чинибағ сақчиханисиниң бир хадиминиң баян қилишичә, мәзкур сақчиханиға қарақаш базиридики 24 кәнттин 11 кәнт вә икки аһалиләр кометитити қарашлиқ икән. Буниң ичидә йеңишәһәр кәнтиниң омуми нопуси 1700 нәччә болуп, буниң 40 пирсәнти нөвәттә «йиғивелиш лагери» да икән.

Чинибағ сақчиханисидики бир хадим бу сақчиханиға тәвә йеңишәһәр кәнтидинла 13 кишиниң лагерда өлгәнликини ашкарилиди. Бу сақчиханиниң конашәһәр вә йеңишәһәрдин ибарәт икки кәнткә мәсул хадими, лагер қурулғандин буян, бу икки кәнттин лагерға елип кетилгәнләрдин 26 кишиниң лагердин җәсити чиққанлиқини баян қилди.

Бу әһвални мәзкур икки кәнткә мәсул аманлиқ мудириму дәлиллиди. У бу учурни йезилиқ һөкүмәттә ечилған бир йиғинда аңлап қалғанлиқини паш қилди. Сақчи хадимлири бу 26 адәмниң конкрет өлүм сәвәбидин хәвири йоқлуқини баян қилиш билән бирликтә уларниң өлүмигә лагерниң омумий шараити сәвәб болғанлиқини чәткә қақмиди. Алдинқи күнидики программимизда мәлумат бәргән сақчи хадими йеңишәһәр кәнтидин өлгән абдуләһәд баққалниң лагердики қорқунчлуқ вәзийәт сәвәбидин қан бесими өрләп кәткәнлики вә бу сәвәбтин җан үзгәнликини мәлум қилған иди.

Сақчи хадимлириниң баянлиридин мәлум болушичә, мәзкур икки кәнтниң омумий нопуси 3000 билән 4000 арисида икән. Бу нопусниң нөвәттә 40 пирсәнти, йәни 1200 билән 1600 әтрапида киши қарақаш наһийәсидики һәрқайси «йиғивелиш лагерлири» да солинип ятмақтикән. Буларниң ичидә лагерда җан өзгән 26 кишидин пәқәт бир кишиниң, йәни 3 балиниң атиси, 37 яшлиқ абдуәһәд баққалниң кимлики мәлум болди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт