خىتاي 18‏-قۇرۇلتاي ھارپىسىدا ئۈرۈمچىدىكى ئۇيغۇرلار توپلىشىپ ئولتۇراقلاشقان رايونلارنى قاتتىق كونترول ئاستىغا ئالدى

خىتاي كومپارتىيىسىنىڭ 18‏-قۇرۇلتىيى ئۈرۈمچىدىن 3 مىڭ نەچچە يۈز كىلومېتىر يىراقلىقتىكى بېيجىڭدا ئېچىلسىمۇ، بىراق خىتاي دائىرىلىرى ئۈرۈمچىدىكى ئۇيغۇرلار توپلىشىپ ئولتۇراقلاشقان رايونلارنى قاتتىق تەقىب ئاستىغا ئالغان.
مۇخبىرىمىز ئەركىن
2012-11-07
Share

ئۈرۈمچىلىك پۇقرالارنىڭ رادىئومىزغا مەلۇم قىلىشىچە، ئىلگىرى ئۈرۈمچىنىڭ كوچىلىرى ئىنتايىن قايناق بولسىمۇ، بىراق يېقىندىن بۇيان قانۇن ئىجرا قىلىش تارماقلىرى، مۇقىملىقنى قوغدىغۇچى خادىملار، ج خ ئورگانلىرى ۋە ھۆكۈمەت تارماقلىرى بىرلىشىپ، ئۈرۈمچى كوچىلىرىدىكى يايمىچى، پلاستىنكا ساتقۇچى ۋە كوچا ناخشىچىلىرىنى «پاك-پاكىز سۈپۈرۈپ تاشلىغان.»

ئايرودروم، سودا سارىيى ۋە تاللا بازارلىرى ھەمدە مەھەللىلەردە تەكشۈرۈش، تەقىب قىلىش كۈچەيتىلىپ، ئۆتكەن-كەچكەن ماشىنا-ئاپتوموبىللارنى تەكشۈرۈش، پراۋا، رەسمىيەتلىرىنى سۈرۈشتۈرۈش يولغا قويۇلغان. ئۈرۈمچىدە ئولتۇرۇشلۇق بىر خىتاي كۆچمەن ئاھالىسىنىڭ بىلدۈرۈشىچە، دۆڭكۆۋرۈكتىكى چوڭ بازارنىڭ كىرىش-چىقىش ئىشىكىگە تەكشۈرۈش جىھازىسى ئورۇنلاشتۇرۇلمىغان بولسىمۇ، بىراق كىرگەن-چىققانلارنىڭ سومكىسى تەكشۈرۈلمەكتە ئىكەن.

د ئۇ ق خىتاي دائىرىلىرىنىڭ قۇرۇلتاينى باھانە قىلىپ، ئۇيغۇر ئېلىدە تەكشۈرۈش ۋە تەقىب قىلىشنى كۈچەيتكەنلىكىنى تەنقىد قىلدى. قۇرۇلتاي باياناتچىسى دىلشات رىشىت، دائىرىلەرنىڭ يېرىم كېچە ياكى تاڭ سەھەردە ھېچقانداق رەسمىيەت بېجىرمەي، نۇقتىلىق ئۇيغۇرلارنىڭ ئۆيىنى تەكشۈرۈۋاتقانلىقىنى بىلدۈرۈپ، بۇنىڭ ئېغىر مىللىي كەمسىتىش قىلمىشى ئىكەنلىكىنى بىلدۈردى. ئۇنىڭ ئىلگىرى سۈرۈشىچە، 5‏-ئىيۇل ۋەقەسىدىن كېيىن غايىب بولغان ئۇيغۇرلارنىڭ ئائىلە-تاۋابىئاتلىرى نۇقتىلىق تەقىب ئاستىغا ئېلىنغان.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت