'سەددىچىننىڭ سىرتىدا' ناملىق تيەنئەنمېن ۋەقەسى ھەققىدىكى ھۆججەتلىك فىلىم نيۇيوركتا قويۇلماقچى

1989 ‏- يىلىدىكى 4 ‏- ئىيۇن تيەنئەنمېن ۋەقەسىنىڭ 21 يىللىقىنى خاتىرىلەش مۇناسىۋىتى بىلەن ئىشلەنگەن "سەددىچىننىڭ سىرتىدا" ناملىق ھۆججەتلىك فىلىم بۈگۈن ئاخشام يەنى 31 ‏- ماي كۈنى كەچتە نيۇيوركتىكى تەيۋەنلىكلەر جەمئىيىتىنىڭ پائالىيەت زالىدا قويۇلماقچى.
ﻣﯘﺧﺒﯩﺮﯨﻤﯩﺰ ﺷﻮﻫﺮﻩﺕ ﻫﻮﺷﯘﺭ
2010-05-31
ئېلخەت
پىكىر
Share
پرىنت

خىتايچە بۈيۈك ئېرا تورىنىڭ خەۋەر قىلىشىچە، ياپونىيىدە ئىشلەنگەن بۇ فىلىمدە 4 ‏- ئىيۇن ۋەقەسى ۋە ۋەقەدىن كېيىن چەتئەلگە قېچىپ چىقىپ پاناھلانغان خىتاي دېموكراتچىلىرىنىڭ ھاياتى تەسۋىرلەنگەن. فىلىمدە خۇ پىڭ، ياڭ جيەنلى قاتارلىق 20 دىن ئارتۇق تونۇلغان خىتاي دېموكراتچىلىرىنىڭ ئىش- ئىزلىرى ۋە كۆز قاراشلىرى تونۇشتۇرۇلغان.

كۆزەتكۈچىلەر، بۇ فىلىمنىڭ خىتاي ئىچى- سىرتىدىكى خىتايلارنىڭ ئىدىيىسىگە كۈچلۈك تەسىر كۆرسىتىش ئېھتىماللىقىنى پەرەز قىلماقتا. 4 ‏- ئىيۇن ۋەقەسىنىڭ 21 ‏- يىللىقىغا بىر قانچە كۈن قالغاندا، خىتاي رەھبەرلىرىدىن لى چاڭچۈن سۆز قىلىپ، خىتايدىكى ياش ئوقۇغۇچىلارنىڭ سىياسىي ۋە ئىدېئولوگىيە تەربىيىسىنى يېتەرلىك دەرىجىدە ئالالمايۋاتقانلىقىنى، بۇ جەھەتتىكى تەلىم - تەربىيىنىڭ پارتىيە ۋە دۆلەتنىڭ ئېھتىياجىغا نىسبەتەن تۆۋەن ئىكەنلىكىنى بىلدۈرگەن.

بۇنىڭدىن قارىغاندا، خىتاي دېموكراتچىلىرى بىلەن خىتاي كومپارتىيە رەھبەرلىرى ئارىسىدا ئۇزۇندىن بېرى داۋام قىلىۋاتقان تەشۋىقات كۈرىشىنىڭ بۇنىڭدىن كېيىنمۇ ئاجىزلاشمايدىغانلىقىنىڭ ئىشارەتلىرى كۆرۈلمەكتە.

پىكىرلەر (0)
Share
تولۇق بەت