تۈركىستان ئىسلام پارتىيىسى خىتاينىڭ "تېررورچىلار" تىزىملىكىگە جاۋاب قايتۇردى

خىتاي ھۆكۈمىتى يېقىندا "تېررورچىلار" تىزىملىكى ئېلان قىلىپ، 8 نەپەر ئۇيغۇرنى تېررورچىلىق بىلەن ئەيىبلىگەن ۋە مۇناسىۋەتلىك دۆلەتلەرنىڭ ئۇلارنى تۇتۇشقا ھەمكارلىشىشنى تەلەپ قىلغاندىن كېيىن، جۈمە كۈنى تۈركىستان ئىسلام پارتىيىسى نامىدىن بايانات ئېلان قىلغان "قوماندان سەيفۇللاھ" ئىسىملىك باياناتچى، خىتاي دائىرىلىرىنىڭ تىزىملىكتىكى كىشىلەرگە دائىر بايانلىرىنى رەت قىلدى ۋە تىزىملىكتىكى 8 كىشىنىڭ بەشىنىڭ مەزكۇر تەشكىلات بىلەن ئالاقىسى يوقلۇقىنى بىلدۈردى.
مۇخبىرىمىز ئەركىن
2008-10-24
Share

سىنئالغۇغا ئېلىنغان بايانات جۈمە كۈنى ئامېرىكىنىڭ yuotube سىنئالغۇ تور بېكىتىگە چاپلانغان بولۇپ، باياناتتا "قوماندان سەيفۇللاھ" تىزىملىكتىكى كىشىلەرنىڭ " تېررورچى" ئەمەسلىكىنى، ئۇلارنىڭ ئەركىنلىك جەڭچىسى ئىكەنلىكىنى، لېكىن تىزىملىكتىكى 5 كىشىنىڭ تۈركىستان ئىسلام پارتىيىسى بىلەن مۇناسىۋىتى يوقلۇقىنى ئىلگىرى سۈردى. ئۇ يەنە، خىتاي ج خ مىنىستىرلىقى ئېلان قىلغان رەسىملەردىكى كۆپچىلىك ئۇيغۇرلارنىڭ ئەمەلىيەتتىكى ئىسمى، خىتاينىڭ تىزىملىكىدىكى ئىسىملار بىلەن ماس كەلمەيدىغانلىقىنى، ئۇلارغا مۇناسىۋەتلىك بەزى ئۇچۇرلارنىڭ توغرا ئەمەسلىكىنى بىلدۈردى.

"قوماندان سەيفۇللاھ" باياناتتا يەنە، خىتاي ج خ خەۋپسىزلىك مىنىستىرلىقى "تېررورچى " دەپ ئېلان قىلغان تىزىملىكتىكى بەزى ئۇيغۇرلار تۈركىستان ئىسلام پارتىيىسىدىكىلەر بىلەن پەقەت "سالاملىشىپلا قويغان" كىشىلەر ئىكەنلىكىنى تەكىتلەيدۇ.

تۈركىستان ئىسلام پارتىيىسى ئولىمپىك ھارپىسىدا ئېلان قىلغان يەنە بىر باياناتتا گۇيجۇ، گۇاڭشى ۋە شاڭخەيدىكى پارتلاش ۋەقەلىرىگە جاۋابكار بولىدىغانلىقىنى جاكارلىغان، لېكىن خىتاي ھۆكۈمىتى بۇ جايلاردا يۈز بەرگەن ۋەقەلەرنىڭ " تېررورلۇق"بىلەن مۇناسىۋەتلىك ئىكەنلىكىنى رەت قىلغان ئىدى.

خىتاي ج خ مىنىستىرلىقى سەيشەنبە كۈنى 2 ‏ - تۈركۈمدىكى شەرقىي تۈركىستان " تېررورچىلار"تىزىملىكى ئېلان قىلىپ، مەمتىمىن تۇرسۇن، ئەمەت ياقۇپ، مەمەت تۇرسۇن ئىمىن قاتارلىقلارنى ئۆز ئىچىگە ئالغان 8 كىشىنى "تېررورلۇق " بىلەن ئەيىبلىگەن ۋە بۇ كىشىلەرنىڭ جەنۇبىي ۋە غەربىي ئاسىيا ئەللىرىدە پائالىيەت ئېلىپ بارىدىغانلىقىنى تەكىتلىگەن.


پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت