Айропиланда бомба тәһдити салған хитай аялға 3 йиллиқ қамақ җазаси берилди

2011-Йили бейҗиңдин үрүмчигә қарап учқан айропиланда бомба тәһдити селип қолға елинған хитай аялға 3 йил икки айлиқ қамақ җазаси берилди. Мәзкур хәвәрниң 3 уйғурға “айропилан булаш вә партлитишқа урунуш җинайити” билән өлүм җазаси берилип, узун өтмәй оттуриға чиқиши диққәтни тартти.
Мухбиримиз җүмә
2013.01.09
Share on WhatsApp
Share on WhatsApp

Ваң фамилилик хитай аял 2011-йили 13-өктәбир үрүмчигә қарап учқан айропиланда өзидә бомба барлиқини, айропиланни партлитидиғанлиқини билдүрп тәһдит салғандин кейин, айропилан җяйүгуән айродромиға җиддий қондурулған.

Айропилан хадимлири ваңни қолға алмақчи болғанда ваң өзини өлтүрүвелиш тәһдити селип, қолға елишқа қаршилиқ билдүргән.

Шинхуа ахбаратиниң хәвәр қилишичә, ваңға “террорлуқ бимәнә чақчиқи қилиш” вә “сахта кимлик ясаш җинайити” артилған.

Хәвәргә қариғанда, ваң фамилилик бу хитай аялниң “артуқчә һаяҗанлинип кетиш кесили” бар болғачқа, у еғир җинайи җавабкарлиққа тартилмиған.

Хитай даирилири өткән айниң 11-күни 3 уйғурға “йолучилар айропиланини булаш җинайити” артип өлүм җазаси, йәнә бир уйғурға өмүрлүк қамақ җазаси бәргән.

Бу уйғурлар 2012-йили 6-айниң 9 күни хотәндин үрүмчигә қарап учуш алдидики “йолучилар айропиланни булашқа урунди” дегән җинайәт билән қолға елинған.

Бу уйғурларға пәқәт 6 ай ичидә һөкүм елан қилған болса, ваң фамилилик хитай йолучиға бир йил 3 айдин кейин һөкүм елан қилған.

Илгири ғәрб көзәткүчилири уйғурлар артиливатқан аталмиш “террорлуқ” җинайәтлириниң сиясий характери күчлүк икәнликини илгири сүргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.