Xitay da'iriliri 2012-yilida Uyghur élining bayliqlirini échish qedimini tézletmekchi

Xelq gézitining xewer qilishiche, 29-mart peyshenbe küni xitay da'iriliri béyjingda “Shinjangdiki muhim qurulush türlirini ilgiri sürüsh” xizmiti yighini chaqirip, bu yil Uyghur élide yolgha qoyulidighan zor qurulush türliri boyiche muzakire élip barghan.

Mezkur yighinda kompartiye siyasiy byurosining da'imiy ezasi, qanun komitéti bashliqi ju yungkang söz qilip: “Uyghur élide su, éléktr, qatnash türlirini échish muqimliqni berpa qilishta hayatiy ehmiyetke ige, Uyghur élige yardem bériwatqan 19 ölke-rayon mana bu nuqtini chongqur tonup yétishi kérek” dégen.

Xitay da'iriliri bu yilliq qurulush türlirining sani we uninggha sélin'ghan mebleghni ilgiriki yillardin hessilep ashurdi. Ular buni Uyghur élidiki xelqning turmushini yaxshilash emin qurulushi dep kökke kötürsimu, emma xelq'ara kishilik hoquq organliri buning eksini ilgiri sürmekte. Ular yuqiridikilerning héchbirining hazirghiche yerlik xelqlerge bir emeliy nep élip kelmigenlikini ilgiri süridu we uni Uyghur élini ilgirilep talan-taraj qilish we köchmen yötkesh herikiti dep qaraydu.