Хитай 12-5 йиллиқ пиланда уйғур елидә муқим мүлүккә 3 терлион 6 милярд йүән мәбләғ салмақчи икән

Хитай ахбарат васитилириниң ашкарилишичә, хитай даирилириниң 12-5 йиллиқ пилан мәзгилдә уйғур елидә муқим мүлүккә салидиған мәблиғиниң өзила 3 терлион 600 милярд йүән.

Бу уйғур аптоном райониниң 2010-йилдики ички ишләпчиқириш омуми дарамитиниң аз кәм 3 дән 2 қисмиға тәң келиду.

Уйғур аптоном райониниң 2010-йилдики ички ишләпчиқириш омуми дарамити 5 терлион йүән әтрапида дәп елан қилинған.

“хәлқара тор” қатарлиқ хитай ахбарат васитилириниң бу һәқтики хәвәрлиридә мәзкур мәбләғниң су-иншаат, таш йол қурулуши, йеңи аһалиләр олтурақ нуқтилири қурулуши қатарлиқ асаси әслиһәләргә селинидиғанлиқи илгири сүрүлгән.

Хәвәрдә, бу “2010-йили мәркәз йолға қойған шинҗаңниң һалқима тәрәққиятини алға сүрүп, узун муддәтлик әмлинликни ишқа ашуруш тоғрисидики истратегийилик орунлаштуруш” ниң бир қисми икәнлики тәкитләнгән.

Бу хитайниң 11-5 йиллиқ пилан мәзгилидә уйғур елидә муқим мүлүккә салған мәблиғидин 3 һәссә көп болуп, аптоном районниң рәиси нур бәкри буниң һәр җәһәттин “мисли көрүлүп бақмиғанлиқи” ни илгири сүргән.

Хәвәрләрдин мәлум болушичә, муқим мүлүккә селинидиған юқириқи мәбләғниң 620 милярд йүәни 12-5 йиллиқ пиланниң дәсләпки йилида сәрп қилинидикән.

Көзәткүчиләр болса бундақ зор көләмлик мәбләғ хитай көчмәнлирини уйғур илиға илгириләп җәлп қилип, уйғурларниң иҗтимаи-сияси, мәдәнийәт, нопус вә турмуш усулиға келиватқан бузғунчилиқни еғирлаштурупла қалмай, хиянәтчилик, пул пахаллиқи, муһит вәйранчилиқини еғирлаштуруветидиғанлиқини агаһландурди.