Гуәнтанамодики 4 нәпәр уйғур әркинликкә еришти

Гуәнтанамода тутуп турулуватқан 17 нәпәр уйғур тутқунлардин 4 нәпири бүгүн қоюп берилди. Улар шималий атлантик окяндики тақим арал дөлити бермудаға қоюп берилгән болуп, әркинликкә еришкән бу төт нәпәр уйғурниң исми төвәндикичә: абдуллаһ абдуқадир 30 яш, хелил мамут 31 яш, абликим турахун 38 яш, салаһидин аблаәхәт 32 яш.
Мухбиримиз ирадә
2009-06-11
Share

Шималий атлантик окянға җайлашқан бермуда әнгилийә һамийлиқида болған бир тақим арал дөлити. Бермуда тақим араллири җәмий 138 аралдин тәшкил тапқан болуп, йүз өлчими 53 квадират километр, нопуси 61 миң. Бермуданиң асаслиқ иқтисадий кирими саяһәт ишлири болуп,   2005 - йили йиллиқ киши беши оттуричә кирими дуня бойичә алдинқи қатарға өткән.

Игилинишичә әркинликкә еришкән 4 нәпәр уйғур бүгүн йәни  11 - июн әтигән саәт 5:30 да бермуданиң пайтәхти хамилтонға йетип кәлгән болуп, улар икки нәпәр адвокат, бир тәрҗиман вә бир қисим америка һөкүмәт тармақлириниң хадимлири билән бирликтә мәхсус айрупилан билән бу дөләткә әвәтилгән.

Түнүгүн тенч окянға җайлашқан арал дөлити палав гөәнтанамодики 17 нәпәр уйғурни қобул қилидиғанлиқини елан қилған иди. Буниң билән хитай һөкүмити ташқи ишлар министирлиқи баянатчиси дәрһал баянат елан қилип, бу уйғурлар террорчи, улар бизгә қайтуруп берилиши керәк, дәп америкини бу уйғурларға  3 - дөләт издәшни тохитишқа чақирған иди. 4 Нәпәр уйғурниң әркинликкә чиққанлиқ хәвири вашингтон почтиси, ройтерис, бирләшмә хәвәр агентлиқи қатарлиқ пүтүн даңлиқ хәвәр агентлиқлирида хәвәр қилинди.

Хәвәрләрдә әмди қалған 13 нәпәр уйғурниң палавға йәрләштүрүлидиғанлиқи тәхмин қилиниватқан болсиму, әмма бу 4 нәпәр уйғурниң нәччә вақиттин бери исми тилға елинмиған бермудаға туюқсизла орунлаштурулуши қалған 13 нәпәр уйғурниң палавдин башқа дөләтләргиму орунлаштурулуш еһтималлиқини күчләндүрмәктә.
    

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт