ھېلارى كلىنتون خىتاي زىيارىتىدە ئاراللارنىڭ ئىگىلىك ھوقۇق ئىختىلاپى ۋە كىشىلىك ھوقۇق مەسىلىسىنى سۆزلىشىدۇ

ئامېرىكا دۆلەت ئىشلار مىنىستىرلىقىنىڭ ئاشكارىلىشىچە، ھېلارى كلىنتون 4- ۋە 5-سېنتەبىر كۈنلىرى بېيجىڭنى زىيارەت قىلغاندا خىتاي بىلەن قوشنا ئەللەر ئارىسىدىكى جەنۇبىي دېڭىز ۋە سېنكاكۇ ئاراللىرىنىڭ ئىگىلىك ھوقۇقى پەيدا قىلغان ئىختىلاپ ۋە تىبەتنى ئۆز ئىچىگە ئالغان كىشىلىك ھوقۇق مەسىلىسى ھەققىدە سۆزلىشىپ، خىتاينى ئاراللارنىڭ ئىگىلىك ھوقۇق مەسىلىسىنى قورال كۈچىگە تايىنىپ ھەل قىلىشقا قارشى ئىكەنلىكى ھەققىدە ئاگاھلاندۇرىدىكەن.
مۇخبىرىمىز ئەركىن
2012.08.29

ئامېرىكا دۆلەت ئىشلار مىنىستىرلىقى باياناتچىسى ۋىكتورىيە نۇلاند سەيشەنبە كۈنى مۇخبىرلارغا زىيارەت ھەققىدە ئۇچۇر بېرىپ، كلىنتوننىڭ بۇ مەسىلىلەر ھەققىدە مۇزاكىرە ئېلىپ بارىدىغانلىقىنى بىلدۈرگەن. ئۇ: بىز جەنۇبىي دېڭىز ۋە ھەرقانداق بىر ئىختىلاپنى قوراللىق كۈچكە تايىنىپ تەھدىت سېلىش ئارقىلىق ھەل قىلىشنى خالىمايمىز. بىز بۇ خىل مەسىلىلەرنى سۆھبەت ئارقىلىق ھەل قىلىشنى تەلەپ قىلىمىز، دېگەن. ۋىكتورىيە نۇلاند يەنە، كلىنتوننىڭ خىتاي زىيارىتىدە تىبەت مەسىلىسىنىڭ ئوتتۇرىغا قويۇلۇش- قويۇلماسلىقىغا ئىزاھات بېرىپ، كىشىلىك ھوقۇق مەسىلىسى ئاساسەن دائىم ئوتتۇرىغا قويۇلىدىغان مەسىلە. ئۇ خىتاي رەھبەرلىرى بىلەن ئۇچراشقاندا دائىم بۇ مەسىلىلەرنى سۆزلىشىدۇ. شۇڭا بۇ قېتىممۇ بۇ مەسىلىلەر ئوتتۇرىغا قويۇلىدۇ، دېيىشكە بولىدۇ، دەپ كۆرسەتكەن.

كلىنتون خانىم پەيشەنبە كۈندىن باشلاپ تىنچ ئوكياندىكى كۇك تاقىم ئاراللىرى، ھىندونېزىيە، خىتاي، شەرقىي تىمۇر، برۇنېي قاتارلىق دۆلەتلەرگە قىلىدىغان زىيارىتىنى باشلايدۇ. ئۇ 8‏- ۋە 9-ئاۋغۇست كۈنلىرى پرېزىدېنت ئوباماغا ۋاكالىتەن، رۇسىيىنىڭ يىراق شەرق رايونىدىكى ۋىلادوۋىستوك شەھىرىدە ئېچىلىدىغان ئاسىيا-تىنچ ئوكيان ھەمكارلىق تەشكىلاتىنىڭ باشلىقلار يىغىنىغا قاتنىشىدۇ.

ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭ
قىسقا خەۋەرلەر
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.