يىغىندا تەشۋىقات بۆلۈمىنىڭ مۇئاۋىن باشلىقى لو شۇگاڭ، لېي فېڭ روھىنىڭ بۈگۈنكى دەۋردىكى ئەھمىيىتى ھەققىدە توختالغان. ئۇ بۇ ھەقتە، كىشىلەرنى سەمىمىي بولۇشقا يېتەكلەش، ئېتىقادسىزلىق ۋە غايىسىزلىكتىن قۇتۇلدۇرۇش، مىللىتىنىڭ ۋە كومپارتىيىنىڭ ئۇلۇغلۇقىنى ھېس قىلدۇرۇش جەھەتتە لېي فېڭ روھىنىڭ ئىشقا يارايدىغانلىقىنى بايان قىلغان.
خىتاي ئىچىدىكى بىر قىسىم مۇستەقىل ئۇچۇر-مۇلاھىزىلەردە، لېي فېڭ روھىنىڭ ئاللىقاچان ۋاقتى ئۆتكەنلىكى تەكىتلەنسە، چەتئەلدىكى خىتايچە ئۇچۇر ۋاسىتىلىرىدە لېي فېڭ روھى خىتاي كومپارتىيىسىگە شەرتسىز بويسۇنۇشنى تەشەببۇس قىلىدىغان قۇلچىلىق روھىي دەپ تەنقىدلىنىپ كەلگەن.
خىتاي ھۆكۈمىتى ئۇيغۇر ئېلىدە يېرىم ئەسىردىن بۇيان لېي فېڭ روھىنى تەشۋىق قىلىش بىلەن بىرلىكتە، «قۇربان تۇلۇم روھىي» نىمۇ تەشۋىق قىلغان، يېقىندىن بۇيان يەنە«ئالىم خالىق روھىي»نى بازارغا سېلىپ، ئۇيغۇرلارنى خىتاي ھاكىمىيىتىگە شەرتسىز بويسۇندۇرۇشقا ئۇرۇنۇپ كەلمەكتە.