دۇنيا ئۇيغۇر قۇرۇلتىيى مىڭ جيەنجۇنىڭ ئۈرۈمچىدە قىلغان سۆزىنى تەنقىد قىلدى

مىڭ جيەنجۇ ئالدىنقى كۈنى خىتاينىڭ ئۈرۈمچىدە چاقىرىلغان «تېررورلۇققا قارشى تۇرۇش» مەملىكەتلىك خىزمەت يىغىنىدا سۆز قىلىپ، ئاتالمىش «بۆلگۈنچىلىك» ۋە «زوراۋانلىق» بىلەن شۇغۇللانغان ھەرقانداق كىشىنى قاتتىق جازالايدىغانلىقىنى، «رەھىم-شەپقەت» ۋە «يۇمشاق قوللۇق» قىلمايدىغانلىقىنى تەكىتلىگەن ئىدى.

ئۇ يەنە، يەرلىك دائىرىلەرنى «ھەرخىل مۇداپىئە تەدبىرلىرىنى كۈچەيتىشكە چاقىرىپ، ئاتالمىش زوراۋان تېررورلۇقنىڭ مەنبەسىنى يىلتىزىدىن يوقىتىش» نى ئوتتۇرىغا قويغان.

دۇنيا ئۇيغۇر قۇرۇلتىيى باياناتچىسى دىلشات رىشىت، خىتاي دائىرىلىرىنىڭ تېررورلۇققا قارشى تۇرۇشنى باھانە قىلىپ، ئۇيغۇرلارنى باستۇرۇشنى كۈچەيتىشى، ئۇيغۇرلارنى تېخىمۇ چوڭقۇر ئۈمىدسىزلىككە مەجبۇرلاپ، شەرقىي تۈركىستان ۋەزىيىتىدە ئىلگىرىلەپ قالايمىقانچىلىق پەيدا قىلىدىغانلىقىنى بىلدۈردى.

ئۇ، بېيجىڭ ھۆكۈمىتى شەرقىي تۈركىستان ۋەزىيىتىنىڭ مۇقىملىقىنى ئويلىسا، ئۇيغۇر خەلقىنىڭ تەلەپلىرىگە شەرتسىز ھۆرمەت قىلىشى كېرەك، دەپ كۆرسەتتى.