Уйғур мәшрипи б д т 'җиддий қоғдилидиған ғәйри маддий мәдәнийәт мираси' тизимликигә киргүзүлди

Уйғур мәшрипи бирләшкән дөләтләр тәшкилатиниң "җиддий қоғдилидиған ғәйри маддий мәдәнийәт мираси" тизимликигә киргүзүлди. Н п р агентлиқиниң хәвәр қилишичә, найробида ечилған б д т пән мәдәнийәт тәшкилати ғәйри маддий мәдәнийәтләрни қоғдаш комитетиниң 15 - ноябир күни тәстиқлиши билән уйғурларниң миллий музика вә усуллуқ йиғилиши бу тизимликкә киргүзүлди.
Мухбиримиз ирадә
2010.11.18
Share on WhatsApp
Share on WhatsApp

Б д т ғәйри маддий мәдәнийәтләрни қоғдаш комитетиниң мәсул хадими франк просчәйнниң н п р ға билдүрүшичә, бу тизимликкә киргүзүлгән миллий мәдәнийәтләр адәттә дуня җамаәтчилики тәрипидин анчә билинип кәтмәйдиған, әмма җиддий қоғдилишқа тегишлик болған миллий мәдәнийәтләр болуп, бу тизимликкә киргүзүлгән мәдәнийәтләр һәммиси дуня җамаәтчиликиниң диққитигә вә қоғдишиға еришидикән.

Игилинишичә, хитай мәдәнийәт министирлиқи бу йил 4 түр бойичә бу комитетқа илтимас сунған болуп, уйғур мәшрипидин башқа "җуңго су өтмәс айропилан бөлмиси ясаш техникиси" вә "мих мәтбәә техникиси" қатарлиқ 3 түр б д т ниң тәстиқлишиға еришкән.

Н п р мухбири комитет мәсул хадими франк просчәйттин, "мәнчә нурғун кишиләр буни көргәндә хитай һөкүмити уйғурларниң мәдәнийитини йоқ қилишқа урунуватқан идиғу, қандақ болуп уни йәнә қоғдашқа илтимас қилиду? дәп сориши мумкин, сиз буниңға немә дәп җаваб берисиз" дәп сориған.

Франк просчәйт буниңға җавабән: "бир җәһәттин елип ейтиқанда, бу қәдимий өрп - адәт вә мәдәнийәтләргә йошурунған бир хил хасийәтни көрситип бериду. Йәни һөкүмәтләр бизниң комитетимизға илтимас йоллаш арқилиқ, өзиниң һәқиқәтән миллий мәдәнийәтләрни йетәрлик қоғдиялмайватқанлиқини, уларниң һазирқи иҗтимаий иқтисадий вәзийәтниң хирисиға дуч келиватқанлиқини билдүриду. Йәни бу җәһәттә һәқиқәтән мәсилисиниң барлиқини қобул қилиду" дәп җаваб бәргән.

Бирләшкән дөләтләр тәшкилатиниң "җиддий қоғдилидиған ғәйри маддий мәдәнийәт мираси" тизимликигә бундин илгири уйғур 12 муқами елинған иди. Мәшрәп бу тизимликкә киргән иккинчи уйғур мәдәний ядикарлиқи болуп һесаблиниду.
 
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт