Дүшәнбә күни гәнсуда йәнә бир тибәт өзини көйдүрүп, хитай һөкүмитигә наразилиқ билдүрди

Лондонни база қилған “әркин тибәт һәрикити” намлиқ кишилик һоқуқ тәшкилатиниң билдүрүшичә, дундуп исимлик 50 яшлардики бу тибәт, далай ламаниң тибәткә қайтип келишни тәләп қилип шоар товлиған. Дундуп, гәннан аптоном областида йеқинқи бир айдин буян өзини көйдүрүп, хитайға наразилиқ билдүргән 4‏-киши. Шундақла гәннән областиға қарашлиқ саңчу наһийисидә олтурушлуқ тибәтләрдин йеқинқи 3 күн ичидә өзини көйдүргән 2‏-кишидур. Саңчу наһийисидики лабраң ибадәтханиси тибәт буддизминиң галу еқимиға мәнсуп 6 чоң ибадәтханиниң бири.

Әркин тибәт һәрикити тәшкилатиниң билдүрүшичә, лабраң ибадәтханиси хитай һөкүмитиниң тибәт сияситигә қаршилиқ қилиш билән тонулған ибадәтханиларниң бири. Дундуп өзигә от қоюп бәргәндин кейин, лабраң ибадәтханисиниң әтрапида турушлуқ хитай қораллиқ сақчилири йетип келип, дундупқа су чечип отни өчүрүвалған вә әтраптики коча-койларни қамал қилған. Сүргүндики гу чу сом тибәт һәрикити намлиқ сабиқ тибәт мәһбуслири тәшкилатиниң билдүрүшичә, хитай сақчи қисимлири дундупни елип кәткәндин кейин, униң өлүк яки тирикликидин хәвәр алалмиған.