روزا ھېيت ھارپىسىدا ئىسمائىل تىلىۋالدى قەشقەردە مۇقىملىقنى تەكشۈردى

ئىسمائىل تىلىۋالدى قەشقەردە ئاساسلىق قەشقەر ۋىلايەتلىك 6 - ئوتتۇرا مەكتەپ، كونا شەھەر ناھىيىلىك 1 - ۋە 2 - ئوتتۇرا مەكتەپ، قەشقەر پىداگوگىكا ئىنىستىتۇتى قاتارلىق مەكتەپلەردە تەكشۈرۈش ئېلىپ بېرىپ " شىنجاڭنىڭ تەرەققىيات مۇقىملىقى كەلگۈسىدە مائارىپقا تايىنىشقا توغرا كېلىدۇ، " دەپ سۆزلىگەن.

ئۇ، ھېيتگاھ مەسچىتى قاتارلىق جامئەلەردىمۇ مەخسۇس زىيارەتتە بولۇپ، جۈمە داموللا قاتارلىق ۋەتەنپەرۋەر دىنىي زاتلارغا قەشقەرنىڭ مۇقىملىق خىزمىتىگە تۆھپە قوشقانلىقىغا رەخمەت ئېيتقان ھەمدە قەشقەردىكى زىيارىتى داۋامىدا بۇ خىل ۋەتەنپەرۋەر دىنىي زات، مىللىي ئوقۇتقۇچى - ئوقۇغۇچى ھەمدە مىللىي كادىرلارغا قەشقەردىن ئىبارەت مىللىي بۆلگۈنچىلىككە قارشى كۈرەشنىڭ ئالدىنقى سېپىدە تۈرلۈك مۇقىملىق تەدبىرلىرىنى كۈچەيتىپ، "مۇقىملىق ھەممىنى بېسىپ چۈشىدۇ" دەيدىغان ئىدىيە بىلەن زەربە بېرىش سالمىقىنى ئاشۇرۇش ھەققىدە يوليورۇق بەرگەن.

ئىسمائىل تىلىۋالدىنىڭ بۇ قېتىمقى قەشقەر زىيارىتى قەشقەردە مۇقىملىق تەدبىرلىرى ھەسسىلەپ كۈچەيتىلگەن، مائارىپنى ئۆز ئىچىگە ئالغان بارلىق ساھەلەردە "ئۈچ خىل كۈچلەر"گە قارشى سىياسىي ئىدېئولوگىيە بويىچە تەربىيىلەش باشلانغان بىر مەزگىلگە توغرا كەلدى.

خىتاي دائىرىلىرى قەشقەردە 4 - ئاۋغۇست ۋە 12 - ئاۋغۇست ۋەقەلىرىدىن كېيىن مۇقىملىق باھانىسىدا ئۇيغۇرلارغا قاراتقان سىياسىي ھەمدە دىنىي بېسىملارنى يەنىمۇ كۈچەيتكەن ئىدى.