Қәшқәр мәкит наһийисидә ропаш аялларниң йүзи мәҗбури ечиветиш наразилиқ қозғиди

Дуня уйғур қурултийи баянатчиси дилшат ришитниң билдүрүшичә, 3-авғуст қәшқәр мәкит наһийиси булиқавус мәһәллисидики аяллар комитети “диний йосунда кийинишни чәкләш, идийини азад қилиш” дегән намда40 тәк ропаш аялни мәҗбури йиғивелип, аялларниң ромаллирини мәҗбури алдурувәткән.

“чай зияпити” баһанисидә бу аялларни кәмпүт қатарлиқ татлиқ турумларни йейишкә зорлап, уларни розисини бузушқа мәҗбурлиған. Радиомиз игилигән учурлардин мәлум болушичә, мәкиттә йүз бәргән аялларниң йүзини мәҗбури ачқузуветиш һәм роза тутмаслиққа мәҗбурлаш қилмиши нөвәттә уйғурларниң наразилиқни күчәйткән.

Қәшқәр вилайитидики һәрқайси наһийиләрдә бу йил рамзан кириштин илгирила, рамзан мәзгилидики диний назарәтни күчәйтиш, муқимлиққа капаләтлик қилиш сәпәрвәрлик йиғинлири ечилған.

Қәшқәр йопурға наһийилик хәлқ һөкүмити 30-июл чиқарған бир һөҗҗитидә йопурға наһийисидә 27-июл рамзан мәзгилидики диний назарәтни күчәйтиш, муқимлиқни сақлаш сәпәрвәрлик йиғини ечилғанлиқи, йиғин роһиға асасән һәрқайси йеза мәһәллиләргә рамзан мәзгилидики назарәт һәм чәклимиләрни күчәйтиш тәләп қилинғанлиқи уқтурулған.