Yünnendiki tagh ghulash weqeside mekteptiki balilar hayatidin ayrildi

Da'iriler hazirghiche weqede 16 balining ölgenlikini élan qildi. Mekteptiki qalghan oqughuchilar we xarabe astida qalghan yéza ahalilirini qutquzush xizmetliri dawam qiliwatqan bolup, 2000 dek ahale qolliri bilen xarabiliklerni kolap adem qutquzushqa tirishmaqta iken.

Fransiye agéntliqining éytishiche, weqe yüz bergen waqitta balilar mektepte ders oquwatqan bolup, xitayda dölet bayrimi munasiwiti bilen tetil qoyuwetken mezgilde, néme üchün balilarning mektepke oqushqa orunlashturulghanliqi kishilerni ejeblendürgen. Yerlik da'iriler bu balilarning aldinqi ayda yünnende yüz bergen yer tewresh sewebidin kem qalghan derslirini toluqlash üchün ders oqushqa orunlashturulghanliqini éytqan.

Da'irilerning jawabi xitaydiki tor qollan'ghuchiliri arisida küchlük inkas peyda qilghan. Chünki aldinqi ayda yüz bergen yer tewreshte yézidiki mektepler nahayiti éghir zeximige uchrighan bolup, balilar téxi rémont qilinmighan siniplarda ders oqushqa orunlashturulghan. Mulahizilerde da'iriler, balilarning hayati bixeterliki bilen oynashti dep tenqid qilin'ghan.

Xitaydiki mekteplerning qurulush süpitidiki mesililerning qanchilik derijide éghirliqi 2008-yili sichüende yüz bergen yer tewresh apitide ashkarilan'ghan. U yer tewreshte jem'iy 80 mingdin artuq kishi hayatidin ayrilghan bolup, bularning köpini mektep binalirida ders oquwatqan balilar teshkil qilidu.