Тибәт - хитай диалог йиғини ахирлашти

Әнгилийә б б с агентлиқиниң бу һәқтики хәвиридә ейтилишичә, үч күнлүк йиғин җәрянида тибәтниң тарихи, аптономийиси вә хитайниң демократийилишиш қатарлиқ көплигән мәсилиләр бойичә музакирә елип берилип, пикир ортақлиқлири шәкилләнгән һәмдә аридики ихтилаплиқ мәсилиләрни һәл қилиш үчүн тәклипләр оттуриға қоюлуп, тибәтләр билән хитайлар оттурисидики диалогни илгири сүрүш тәшәббус қилинған.

Хәвәрдә көрситилишичә, далай лама тәшәббус қиливатқан алий аптономийә һәмдә униң мустәқиллиқ билән болған пәрқи, аптономийиниң мәна уқуми вә башқилар муназирә қилинған. Чүнки, бейҗиң һөкүмити изчил түрдә далай ламаниң алий аптономийә тәлипини рәт қилип, уни мустәқилчилик вә бөлгүнчилик билән әйибләватқан иди. Хитай зиялийлири болса, тибәт мәсилисиниң һәл қилинишиниң хитайниң демократийлишиши билән мунасивәтлик икәнликини тәкитлигән.

Йиғин иштиракчилири бу қетимқи тибәт - хитай диалог йиғинини юқири баһалаш билән бир вақитта йәнә пәқәт тибәт билән хитай хәлқлири арисидики аммиви диалогла миллий мәсилини һәл қилалайду, бу миллий мунасивәтләрни яхшилаштики асаслиқ амил, дегәнгә охшаш пикирләрни оттуриға қоюшқан.

Тибәт - хитай диалог йиғини далай ламаниң вәкиллири билән бейҗиң һөкүмити арисида елип бериливатқан сөһбәт билән мунасивәтлик болуп, йиғинниң мәқсити бейҗиң һөкүмити билән тибәтләр арисидики узунға созулуп кәткән сөһбәтниң яхши нәтиҗигә еришишини үмид қилиш биләнму мунасивәтлик икән.