Хитай “явро-асия йәрмәнкиси” дә бихәтәрлик тәдбирлирини күчәйтип, үрүмчи һава бошлуқини контрол қилди

Үрүмчи һава бошлуқи контрол астиға елинип, ләгләк, кәптәр қатарлиқларни учуруш чәкләнди. Учидиған маторлуқ қоралларни контрол қилиш тәдбири йәнә корла, санҗи, турпан, шихәнзә қатарлиқ шәһәрләрдә йолға қоюлған.

Үрүмчи кочилириға толуқ қоралланған аманлиқ күчлирини орунлаштуруп, чарлаш күчәйтилгән. Хәлқ мәйданиға нурғун сақчи аптомобиллириниң тохтитип қоюлғанлиқи вә чарлаш елип бериватқан қораллиқ сақчи қисимлири мухбирларниң диққитини қозғиған.

Чәтәл ахбарат васитилириниң бу һәқтики хәвәрлиридә бейҗиң, шаңхәй вә хитайниң башқа шәһәрлиридин үрүмчигә учидиған йолучиларға қарита тәкшүрүш күчәйтилип, учуш сәпәрлириниң кечикишини кәлтүрүп чиқарғанлиқи билдүрүлди.

 Бейҗиң қатарлиқ шәһәрләрдики айродромларда уйғур елигә учидиған йолучилар айрим тәкшүрүлүп, йолучилардин айиғини селиш, бәлвеғини чиқириш тәләп қилинған вә йолучиларниң қолидики йүк-тақа, нәрсә керәкләр қайта-қайта тәкшүрүлмәктә икән.

Үрүмчи “явро-асия йәрмәнкиси” 1‏-сентәбир башлинип 5‏-сентәбиргә қәдәр давам қилиду. Көзәткүчиләр хитай һөкүмитиниң мәзкур йәрмәнкә арқилиқ уйғур мустәқиллиқ һәрикитигә қарши дипломатик үстүнлүккә еришмәкчи болуватқанлиқини илгири сүрмәктә.

Хәвәрләрдин мәлум болушичә, йәрмәнкигә хитайниң муавин баш министири ли кечяң, пакистан президенти зәрдари, қирғизистан президенти отанбайива қатарлиқ шәхсләр қатнишидикән.