ئۇيغۇر ساقچى باشلىقى خىتاينىڭ دىنىي چەكلەش سىياسەتلىرىنى ئاقلىدى

«جەنۇبىي جۇڭگو سەھەر پوچتىسى» نىڭ خەۋەر قىلىشىچە، يىغىن جەريانىدا مۇخبىرلارنىڭ زىيارىتىنى قوبۇل قىلغان قەشقەر ساقچى ئىدارىسىنىڭ مۇئاۋىن باشلىقى كۈرەش كەنجى ئۇيغۇرلارنىڭ دىنىي يوسۇندا كىيىنىشىگە چەك قويۇلمىغانلىقىنى بىلدۈردى.

ئۇيغۇرلارنىڭ دىنىي يوسۇندا كىيىنىشىنى بىر «قالاقلىق» دەپ سۈرەتلىگەن كۈرەش كەنجى مۇنداق دېدى: كىشىلەرنىڭ ئەنئەنىۋى يوسۇندا كىيىنىشىنى چەكلىمىدۇق. بىز ھازىر بىر زامانىۋى جەمئىيەتتە ياشاۋاتىمىز. شۇڭا زامانىۋى مەدەنىيەت ئارقىلىق قالاق مەدەنىيەتنى يېتەكلەشنى ئارزۇ قىلمىز.

بۇ يىل كىرگەندىن بۇيان قەشقەر ۋە خوتەندىكى بىرى قىسىم سودا سارايلىرى دىنىي يوسۇندا كىيىنگەن، يۈزىنى ئورىغان ئاياللارنى، ساقال قويغان ئەرلەرنى سودا سارايلىرىغا كىرگۈزمەيدىغانلىقى ئېلان قىلغان. بىر قىسىم بانكىلار دىنىي يوسۇندا كىيىنگەن كىشىلەرگە مۇلازىمەت قىلمايدىغانلىقىنى ئۇقتۇرغان ئىدى.

كۈرەش كەنجى بۇلارنى تىلغان ئالمىغان ۋە قانداق مەدەنىيەتنىڭ «قالاق مەدەنىيەت» كاتېگورىيىسىگە ياتىدىغانلىقىنى شەرھلىمىگەن.