Уйғурлар фәирфакис шәһиридә йеңи йилни қарши алди

Америка уйғурлири җәмийити вә хәлқара уйғур кишилик һоқуқ вә демократийә фонди җәмийитиниң тәшкиллиши билән америка пайтәхти вашингтон шәһири вә униң әтрапидики вирҗиня,марйланд һәм шуниңдәк башқа штатлардин кәлгән көп санда уйғурлар фәирфакис шәһиридә 2012 - йилини күтүвелиш паалийити өткүзди.
Мухбиримиз үмидвар
2012-01-01
Share

Тәхминән 150дин артуқ адәм қатнашқан мәзкур паалийәт һәммә адәм бирдәк һалда өрә туруп, уйғур миллий марши оқуш билән башланди. Арқидин дуня уйғур қурултийиниң рәиси рабийә қадир ханим нутуқ сөзләп, уйғурларниң йеңи йилини тәбриклиди шуниңдәк барлиқ уйғур җамаити һәмдә ана вәтәндики уйғур хәлқиниң йеңи йилиниң мувәппәқийәтлик, аман - есәнчилик вә үмид билән толған йил болушини тилиди.

Уйғур миллий һәрикитиниң рәһбири рабийә қадир ханим сөзидә өткән бир йилдики қолға кәлтүрүлгән нәтиҗиләрни хуласиләп, 2011 - йилиниң уйғурлар үчүн йәнила мувәппәқийәтлик болғанлиқи, қилинған көплигән хизмәтләр ичидә гәвдиликлириниң бириниң җәнвәдә ечилған б д т ниң йиғинида рабийә қадир башлиқ дуня уйғур қурултийи вәкиллириниң хитай тәрәп вәкиллириниң уларни қарилаш һәрикитини мәғлуп қилип, б д т әзалири вә дуня җамаәтчиликигә уйғурлар мәсилисини аңлитишни қолға кәлтүргәнлики икәнликини билдүрди. Рабийә ханим бу йиғинда америка һөкүмити вәкиллири хитай вәкиллиригә қарши чиқип, дуня уйғур қурултийи вәкиллирини қоллиғанлиқини тәсирлик һалда әсләп өтти.

Рабийә қадир ханим сөзидә йәнә йеқинда гума наһийисидә хитай сақчилириниң 7 уйғурни етип өлтүрүп, балиларни тутқун қилғанлиқи, шуниңдәк өткән 7 - айда йүзбәргән хотән вә қәшқәр вәқәлирини әсләтти. У йәнә 2011 - йили, америкидики уйғурлар үчүн уйғур өйи сетивелинғанлиқи вә өзиниң кәлгүси пиланлири һәққидиму тохталди. Униң сөзлири қизғин чаваклар билән қарши елинди.

Бу қетимқи йеңи йил паалийитиниң өзгичилики шуки, бу қетим паалийәткә қатнашқан яшларниң нисбити алаһидә юқири болуп, яшлар өзлириниң юқири қизғинлиқини намаян қилди. 2011 - Йили, 12 - ноябир күнидики җумһурийәт күни паалийитидиму яшлар өзлириниң юқири актиплиқини көрсәткән болуп, көпчилик, яш әвладларниң бу хил миллий қизғинлиқидин апирин оқушти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт