خىتاي دائىرىلىرى «ۋەتەنپەرۋەر» دىنىي زاتلارنى چەتئەلگە ساياھەتكە ئاپاردى

خىتاي دائىرىلىرى ئۇيغۇر ئېلىدىكى دىنىي زاتلاردىن ئۆمەك تەشكىللەپ چەتئەلگە زىيارەتكە ئاپارغان.
مۇخبىرىمىز ئىرادە
2012-10-25
Share

بۇ ئۆمەكتىكى دىنىي زاتلار 12-23-ئۆكتەبىرگىچە دانىيە، پولشا ۋە رۇسىيە قاتارلىق دۆلەتلەردە زىيارەتتە بولغان. ئۆمەك دۆلەتلىك دىنى ئىشلار ئىدارىسى، ئاپتونوم رايونلۇق پارتكوم ۋە ھۆكۈمەت تەرىپىدىن تەشكىللەنگەن بولۇپ، شىنجاڭ كۈندىلىك گېزىتى بۇ ھەقتىكى خەۋىرىدە، بۇ دىنىي زاتلارنىڭ پارتىيىنىڭ دىنىي سىياسىتىدىكى مۇۋەپپەقىيەتلىرىنى تەشۋىق قىلىش ۋە كۆزىنى ئېچىپ، ئىدىيىسىنى ئازاد قىلىش ئۈچۈن چەتئەلگە ئەۋەتىلگەنلىكىنى ئېيتقان. ئۆمەككە ئاپتونوم رايونلۇق پارتكومنىڭ دائىمىي ئەزاسى شەۋكەت ئىمىن رەھبەرلىك قىلغان.

شەۋكەت ئىمىن سۆزىدە، بىزنىڭ ۋەتەنپەرۋەر دىنىي زاتلىرىمىز بارغان يېرىدە دۆلىتىمىزدە مىللەتلەرنىڭ ئىناق، جەمئىيەت تىنچ، ھەر مىللەت خەلقىنىڭ بەخت ئىچىدە ياشايدىغانلىقىنى نامايان قىلدى، بىز بۇ زاتلارنىڭ جايلارغا قايتىپ بارغاندىن كېيىن، دىننىڭ سوتسىيالىستىك جەمئىيەتكە ماسلىشىشى ئۈچۈن خىزمەت قىلىشىنى ئارزۇ قىلىمىز، دېگەن.

دۇنيا ئۇيغۇر قۇرۇلتىيى مەزكۇر خەۋەرگە دەرھال ئىنكاس قايتۇرۇپ، خىتاي ھۆكۈمىتىنىڭ دىنىي زاتلارنى تەشۋىقات قورالىغا ئايلاندۇرۇۋالغانلىقىنى تەنقىد قىلدى. ئۇلار خىتاي ھۆكۈمىتىنىڭ تەشۋىقاتىنىڭ ئەكسىچە، رايوندا ئەمەلىيەتتە دىنىي بېسىمنىڭ كۈنسايىن كۈچىيىۋاتقانلىقىنى، خەلقنىڭ نارازىلىقى كۆپىيىپ، رايون ۋەزىيىتىنىڭ كۈنسايىن كەسكىنلىشىۋاتقانلىقىنى بىلدۈردى.

خىتاي ھۆكۈمىتىنىڭ ئۇيغۇرلار ئۈستىدىكى دىنىي بېسىمىنىڭ چېكىدىن ئېشىۋاتقانلىقى خەلقئارالىق كىشىلىك ھوقۇق ئورگانلىرى تەرىپىدىن ئەيىبلەنمەكتە. تېخى بۇ يىل رامزان مەزگىلىدە خىتاي دائىرىلىرىنىڭ ئۇيغۇرلارنىڭ روزى تۇتۇشىنى چەكلەش ئۈچۈن قويغان تۈرلۈك چەكلىمىلىرى خەلقئاراغا ئاشكارىلىنىپ، كۈچلۈك ئىنكاس پەيدا قىلغان ئىدى.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت