Хитай даирилири "вәтәнпәрвәр" диний затларни чәтәлгә саяһәткә апарди

Хитай даирилири уйғур елидики диний затлардин өмәк тәшкилләп чәтәлгә зиярәткә апарған.
Мухбиримиз ирадә
2012-10-25
Share

Бу өмәктики диний затлар 12-23-өктәбиргичә данийә, полша вә русийә қатарлиқ дөләтләрдә зиярәттә болған. Өмәк дөләтлик дини ишлар идариси, аптоном районлуқ партком вә һөкүмәт тәрипидин тәшкилләнгән болуп, шинҗаң күндилик гезити бу һәқтики хәвиридә, бу диний затларниң партийиниң диний сияситидики мувәппәқийәтлирини тәшвиқ қилиш вә көзини ечип, идийисини азад қилиш үчүн чәтәлгә әвәтилгәнликини ейтқан. Өмәккә аптоном районлуқ парткомниң даимий әзаси шәвкәт имин рәһбәрлик қилған.

Шәвкәт имин сөзидә, бизниң вәтәнпәрвәр диний затлиримиз барған йеридә дөлитимиздә милләтләрниң инақ, җәмийәт тинч, һәр милләт хәлқиниң бәхт ичидә яшайдиғанлиқини намаян қилди, биз бу затларниң җайларға қайтип барғандин кейин, динниң сотсиялистик җәмийәткә маслишиши үчүн хизмәт қилишини арзу қилимиз, дегән.

Дуня уйғур қурултийи мәзкур хәвәргә дәрһал инкас қайтуруп, хитай һөкүмитиниң диний затларни тәшвиқат қоралиға айландурувалғанлиқини тәнқид қилди. Улар хитай һөкүмитиниң тәшвиқатиниң әксичә, районда әмәлийәттә диний бесимниң күнсайин күчийиватқанлиқини, хәлқниң наразилиқи көпийип, район вәзийитиниң күнсайин кәскинлишиватқанлиқини билдүрди.

Хитай һөкүмитиниң уйғурлар үстидики диний бесиминиң чекидин ешиватқанлиқи хәлқаралиқ кишилик һоқуқ органлири тәрипидин әйибләнмәктә. Техи бу йил рамзан мәзгилидә хитай даирилириниң уйғурларниң рози тутушини чәкләш үчүн қойған түрлүк чәклимилири хәлқараға ашкарилинип, күчлүк инкас пәйда қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт