Хитайниң муавин дөләт бихәтәрлик министириниң бир ярдәмчиси америкиға җасуслуқ қилиш билән әйиблинип қолға елинған

Хитай муавин дөләт бихәтәрлик министириниң бир ярдәмчиси америкиға җасуслуқ қилиш билән әйиблинип, буниңдин бир қанчә ай илгири мәхпий қолға елинған.
Мухбиримиз әркин
2012.06.01
Share on WhatsApp
Share on WhatsApp

Ройтерс ахбарат агентлиқиниң ашкарилишичә, америка билән хитай мәзкур мәсилә икки дөләт арисида йәнә кризис кәлтүрүп чиқиришидин әнсирәп, бу вәқәни мәхпий тутқан. Хәвәрдә муавин дөләт бихәтәрлик министири вә униң америкиға җасуслуқ қилип қолға елинған ярдәмчисиниң исми ашкариланмиған болсиму, бирақ бу ярдәмчиниң бир қанчә йилдин буян америка мәркизи истихбарат идарисигә хитайниң чәтәлдики җасуслуқ паалийитигә даир нурғун учурларни йоллиғанлиқи илгири сүрүлгән.

Ройтерс агентлиқиниң билдүрүшичә, вәзийәттин хәвәрдар 3 учур мәнбәси мәзкур министир ярдәмчисиниң америка мәркизи истихбарат идарисини “сиясий, иқтисади вә истратегийилик истихбарат билән тәминлигән” лики вә униң бу йил 1‏-айдин 3‏-айғичә болған арилиқтики мәлум бир күни қолға елинғанлиқини билдүргән. Исмини ашкарилашни халимайдиған хәвәр мәнбәлириниң илгири сүрүшичә, мәзкур ярдәмчиниң җасуслуқ паалийити хитайға “зор бузғунчилиқ салған.”

Көзәткүчиләрниң билдүрүшичә, мәзкур җасуслуқ вәқәси хитай җ х министирлиқи ташқи ишлар идарисиниң башлиқи йү чяңшеңниң 1985‏-йили америкиға қечип кетиш вәқәсидин буян йүз бәргән әң еғир җасуслуқ сәтчиликлиридин бири икән. Йү чяңшең америкиға қечип берип, америка мәркизи истихбарат идарисиниң хитай ирқидин болған бир анализчисиниң узун йиллиқ хитай җасуси икәнликини паш қилған. Паш қилинған мәзкур хитай җасуси әйни чағда пенсийигә чиқип кәткән иди. Кейин у түрмидә өзини өлтүрүвалған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.