Xitay awstraliye filim féstiwalini bayqut qildi

Roytérs agéntliqining xewirige qarighanda, xitay 8 - awghust awstraliyining mélborn shehiride échilmaqchi boluwatqan filim féstiwaligha rabiye qadir we Uyghurlargha a'it hüjjetlik filimning qatnashturulghanliqi we rabiye qadir xanimning kéler ay féstiwalning échilish murasimigha qatnishidighanliqigha naraziliq bildürüsh üchün féstiwaldin chékin'gen.

Awstraliyining eng chong filim féstiwali bolghan mélborn filim féstiwaligha rabiye qadir xanimning hayati tonushturulghan " muhebbetning on sherti" namliq hüjjetlik filim qatnashturulghandin kéyin, xitay hökümiti awstraliyide turushluq elchiliki arqiliq féstiwalning teshkilligüchisi richard morgha filimni qoymasliq heqqide bésim ishletken idi. Xitay terep özining üch filimini féstiwaldin chékindürgendin kéyin, richard mor özining buningdin intayin epsuslan'ghanliqini, emma féstiwalning siyaset bilen munasiwiti yoqluqini, rabiye qadir xanimningmu féstiwalgha méhman süpitide qatnishidighanliqini bildürdi.

Richard mor dölet radi'osigha qilghan sözide, bir filim féstiwalining siyasi bésimgha uchrishining intayin nachar bir ehwal ikenlikini éytip " biz tüzümimizde ching turimiz we bundaq zomigerlikke hergiz boyun egmeymiz," dégen we rabiye qadir xanimning hayati tonushturulghan hüjjetlik filimning féstiwalda dawamliq yer alidighanliqini bildürgen.