Xitay ishchilar partiyisining mu'awin re'isining béyjingda tuyuqsiz ölüp kétishi xongkongliqlarning gumanini qozghidi

Xitay ishchilar partiyisining mu'awin re'isi jong gu'oxu'a üchün xongkongda matem murasimi ötküzülgen bolup, buninggha xitay kommunistliri bilen oxshimighan köz qarashqa ige zatlar, partiye - guruhlarning wekilliri ishtirak qilghan.
Muxbirimiz ümidwar
2008-09-28
Share

Amérika awazining xewer qilishiche, 43 yashliq jong gu'oxu'a ishchilar partiyisining qurghuchiliridin biri bolup, mu'awin re'islik wezipisini zimmisige alghan. U 9 - ayda béyjinggha kelgen bolup, 9 - ayning 7 - küni kech sa'et 9 - da béyjingdiki muhajirlar méhmanxanisidiki özining yataqxanisigha kirip kétip chiqmighan hemde etisi tang seherde uning jesiti sézilgen bolup, béyjing da'iriliri uning "tuyuqsiz qozghalghan yürek késili" bilen wapat bolghanliqini élan qilghan.

Xitay ishchilar partiyisining re'isi fang yü'en matem murasimida söz qilip, jong gu'oxu'a yatiqigha kirip kétip, ölgiche bolghan ariliqta üch sa'et ötken bolup, uning ölüm aldida héch qandaq qutuldurush charisi qollanmighanliqidin heyran ikenlikini bildürgen. Bu partiyining ezaliri özlirining jong gu'oxu'aning tuyuqsiz ölümidin guman qilidighanliqini bildürgen.

Ishchilar partiyisi xitay hökümitidin jong gu'oxu'aning ölümining tepsiliy ehwalini éniqlap bérishni telep qilghan. Jong gu'oxu'a eslide gu'angdong ölkisidin bolup, xongkonggha köchmen bolghan hemde axbaratchiliq kespiy bilen shughullinip, bir qanche gézitlerde ishligen hemde "paytext " gézitining ijra'iye bash muherrirlik wezipisini atqurghan idi.

U yene ishchilar partiyisining axbarat we teshwiqat ishlirigha mes'ul bolghan. U özige bashqa texellusi qollan'ghan bolup, méyiplar olimpik mezgilide béyjing hökümitining ruxsiti bilen chong quruqluqqa kélip, ziyaret qilish we xewer bérish ishliri bilen shughullan'ghan iken. Emma u, bu jeryanda tuyuqsiz ölgen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet