خىتاي ھۆكۈمىتى خەلق پۇلىغا مۇناسىۋەتلىك قانۇن لايىھىسىگە نارازىلىق بىلدۈردى

بىر قىسىم ئامېرىكا پالاتا ئەزالىرى خىتاي ھۆكۈمىتىنىڭ ئۆز پۇلىنىڭ ئالماشتۇرۇش قىممىتىنى قەستەن تۆۋەن تۇتۇۋاتقانلىقىغا قارشى بىر قانۇن لايىھىسى تونۇشتۇرغان. بۈگۈن خىتاي تاشقى ئىشلار مىنىستىرلىقى بايانات ئېلان قىلىپ، مەزكۇر قانۇن لايىھىسىگە نارازىلىق بىلدۈردى.
ﻣﯘﺧﺒﯩﺮﯨﻤﯩﺰ ﺟﯜﻣﻪ
2010-06-14
Share

خىتاي باياناتچىسى چىڭ گاڭ مۇنداق دېدى: "بىز ئالاقىدار ئامېرىكا سىياسىيونلىرىنىڭ باشقىلارنى ئەيىبلەشنىڭ ئورنىغا ئۆز ئىقتىسادىدىكى قورۇلما خاراكتېرلىك مەسىلىلەر ئۈستىدە ئەستايىدىل ئويلىشىپ كۆرۈشىنى ئۈمىد قىلىمىز."

بىر قىسىم غەرب ئىقتىسادشۇناسلىرى، خىتاي ھۆكۈمىتىنىڭ خەلق پۇلىنىڭ ئالماشتۇرۇش قىممىتىنى بازار نەرخىدىن قەستەن تۆۋەن تۇتۇپ كەلگەنلىكىنى كۆرسەتكەن. ئۇلارنىڭ قارىشىچە، خىتاي شۇ ئارقىلىق خىتاي ماللىرىنىڭ تەننەرقىنى تۆۋەنلىتىپ، خەلقئارادا ئادالەتسىز بازار رىقابىتى پەيدا قىلغان ۋە غەرب شىركەتلىرىنىڭ زىيان تارتىشىنى كەلتۈرۈپ چىقارغان ئىكەن.

مەزكۇر پىكىر ئامېرىكا ھۆكۈمەت دائىرىلىرى ئارىسىدىمۇ بارغانچە ئۇلغىيىشقا باشلىغان ئىدى.

 ئۆتكەن پەيشەنبە كۈنى، ئامېرىكا مالىيە مىنىستىرى تىمىتي گايتنېر خىتاي دائىرىلىرىنىڭ خەلق پۇلىنىڭ ئالماشتۇرۇش قىممىتىنى تەڭشەشنى رەت قىلىشى دۇنيا خاراكتېرلىك تەڭسىزلىك پەيدا قىلغانلىقىنى ئوتتۇرىغا قويغان ئىدى.

ئۆتكەن پەيشەنبە كۈنى يەنە، چارلېز سكۇمېر قاتارلىق ئامېرىكا پالاتا ئەزالىرى خەلق پۇلىنىڭ ئالماشتۇرۇش قىممىتى مەسىلىسىدە خىتاينى جازالايدىغان بىر قانۇن لايىھىسى تونۇشتۇرغان ئىدى.

مەلۇم بولۇشىچە، پالاتا ئەزالىرى يەنە، مەزكۇر قانۇن لايىھىسىنى مۇشۇ ئاينىڭ ئاخىرىغىچە قانۇن قىلىپ تۈزۈپ چىقىدىغانلىقىنى ئىلگىرى سۈرۈشكەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت