Хитай һөкүмити хәлқ пулиға мунасивәтлик қанун лайиһисигә наразилиқ билдүрди

Бир қисим америка палата әзалири хитай һөкүмитиниң өз пулиниң алмаштуруш қиммитини қәстән төвән тутуватқанлиқиға қарши бир қанун лайиһиси тонуштурған. Бүгүн хитай ташқи ишлар министирлиқи баянат елан қилип, мәзкур қанун лайиһисигә наразилиқ билдүрди.
Мухбиримиз җүмә
2010.06.14

Хитай баянатчиси чиң гаң мундақ деди: "биз алақидар америка сиясийонлириниң башқиларни әйибләшниң орниға өз иқтисадидики қорулма характерлик мәсилиләр үстидә әстайидил ойлишип көрүшини үмид қилимиз."

Бир қисим ғәрб иқтисадшунаслири, хитай һөкүмитиниң хәлқ пулиниң алмаштуруш қиммитини базар нәрхидин қәстән төвән тутуп кәлгәнликини көрсәткән. Уларниң қаришичә, хитай шу арқилиқ хитай маллириниң тәннәрқини төвәнлитип, хәлқарада адаләтсиз базар риқабити пәйда қилған вә ғәрб ширкәтлириниң зиян тартишини кәлтүрүп чиқарған икән.

Мәзкур пикир америка һөкүмәт даирилири арисидиму барғанчә улғийишқа башлиған иди.

 Өткән пәйшәнбә күни, америка малийә министири тимитй гайтнер хитай даирилириниң хәлқ пулиниң алмаштуруш қиммитини тәңшәшни рәт қилиши дуня характерлик тәңсизлик пәйда қилғанлиқини оттуриға қойған иди.

Өткән пәйшәнбә күни йәнә, чарлез скумер қатарлиқ америка палата әзалири хәлқ пулиниң алмаштуруш қиммити мәсилисидә хитайни җазалайдиған бир қанун лайиһиси тонуштурған иди.

Мәлум болушичә, палата әзалири йәнә, мәзкур қанун лайиһисини мушу айниң ахириғичә қанун қилип түзүп чиқидиғанлиқини илгири сүрүшкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.