Бейҗиңда икки нәпәр адвокат 'сот тәртипини қалаймиқан қилиш' билән әйибләнди

Бүгүн бейҗиң шәһәрлик әдлийә идариси икки нәпәр кишилик һоқуқ адвокатиниң делосини көрүп чиқишқа башлиди. Игилинишичә, таң җитйән вә лю вей исимлик икки нәпәр адвокат хитай әдлийә даирилири тәрипидин "сот тәртипини қалаймиқан қилиш" билән әйибләнгән.
Мухбиримиз ирадә
2010.04.22

Ройтерс агентлиқиниң хәвәр қилишичә, бу икки адвокатниң сотиға бүгүн бейҗиң шәһәрлик әдлийә идарисиниң бинасида қарап чиқилған болуп, сақчилар бинаниң алдини қоршап, мухбирлар вә шундақла униң қоллиғучилиридин тәркиб тапқан 500 дин артуқ кишиниң бинаға йеқинлишишини тосиған.

Бүгүн саәт 9 дин башлап саәт 1 гичә давам қилған сотта бир қарар чиқмиған. Әмма көзәткүчиләр, әгәр хитай даирилири бу икки адвокатни әйиблигән "сот тәртипини қалаймиқан қилиш" җинайитини бекиткән тәқдирдә уларниң адвокатлиқ салаһийитиниң елип ташлинишидин әнсиримәктә.

Мәлум болушичә, бу икки нәпәр адвокат фалунгуң муритлириниң зиянкәшликкә учраш әнзилири вә җәмийәтниң төвән қатлимидики хәлқләрниң әнзилирини ишлигән адвокатлар болуп, адвокат таң җитйән йәнә кишилик һоқуқ вә демократийә тәләп қилип, хитай мәркизи һөкүмитигә йолланған "2008 низамнамиси"ғиму қол қойғучиларниң бири иди.

Униң қоллиғучилири бу икки адвокатниң әнә шу сәвәбтин аваричилиққа йолуқуватқанлиқини билдүрмәктә. Хитайдики адвокатлиқ кинишкиси инавәтсиз қилинған адвокатлардин бири болған таң әпәнди ройтерс агентлиқиға қилған сөзидә: " хитай һазир барғансери кәйнигә чекинип кетиватиду, хитайдики әдлийә тармақлири қанунға әмәс, сиясәткә тайинип иш көриду. Биз адвокатларниң буни әскәртип қоюш һоқуқимиз бар," дегән.

Мәзкур дело һазир хәлқара җамаәтниң диққитини тартиватқан болуп, бу дело хитайдики адвокатларниң хәлқниң авази болуш һоқуқиға игә болған - болмиғанлиқини көрситип бәргәнлики үчүн муһим дәп қаралмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.