Йүннәндә өйи чеқилған аһалиләр йол тосуп наразилиқ билдүрди

Радиомиз хитайчә бөлүминиң хәвәр қилишичә, хитайниң йүннән өлкисиниң сүйҗяң наһийисидики бир қисим деһқанлар, җүмә күнидин башлап наһийә базирида топлишип намайиш қилған вә йол тосуп һөкүмәткә наразилиқ билдүргән.
Мухбиримиз шөһрәт һошур
2011.03.29

Мәлум болушичә, наһийидә йеңидин қурулуватқан шяңҗяба су су тосмиси әтраптики бирқанчә йүз аилиниң өйлириниң чеқилишиға сәвәб болған.

Төләм үчүн берилгән пул йетәрлик болмиған һәм көрситилгән йеңи җайлиқ йәрму көңүлдикидәк болмиғачқа, аһалиләр дәсләптә язма тәклип сунуп һөкүмәттин төләм пулини көпәйтип беришни вә йеңи җайлиқ йәрни йәңгүшләп беришни тәләп қилған.

Һөкүмәт аһалиләрниң тәлипигә дәрһал җаваб қайтурмиғачқа, наһийә базириға топлиниш вә йол тосуш шәклидә һөкүмәткә наразилиқ билдүргән.

Хәвәргә алақидар сүрәтләрдин көрүлүшичә, йол тосушқа қетилғанларниң сани бирқанчә йүз болуп, бирқанчә күндин бери әтраптики йолларда қатнаш паләч һаләткә чүшкән.

Мухбиримизниң соаллириға җаваб бәргән сақчилар вәқәниң бәшинчи күни йәни бүгүн әтраптики йолларда қатнашниң әслигә кәлгәнликини, әмма аһалиләрниң наразилиқ кәйпиятиниң техи бесиқмиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.