Хитай уйғур учқучилириниң иштин тохтитилғанлиқи мәсилиси һәққидә инкас билдүрди

Хитай даирилири, хитай һава йоллириниң үч уйғур учқучисини иштин тохтитип қойғанлиқи тоғрисидики хәвәрләрни рәт қилди.
Мухбиримиз әқидә хәвири
2008.08.20

 Хитай авиатсийә идарисиниң муавин башлиқи ли җйән сәйшәнбә күни баянат елан қилип, чәтәл мәтбуатлирида уйғур учқучиларниң иштин тохтитип қоюлғанлиқи тоғрисида чиққан хәвәрләрни рәт қилип," пүтүн учқучилар хәнзу яки уйғур болсун вақит җәдвили буйичә ишләватиду " деди.

Хитай һава йоллирида уч уйғур учқучиниң ишләйдиғанлиқини әскәрткән ли җйән, абабәкри мәмәт, әли иминнияз вә долқун исимлик бу учқучиларниң күндилик вәзиписини давамлаштуруватқанлиқини билдүрди.

Дүшәнбә күни әнглийидә чиқидиған мәшһур таймиз гезити, хитай даирилириниң хитай һава йоллирида ишләйдиған үч уйғур учқучини олимпик бихәтәрликини сәвәб көрситип, иштин тохтитип қойғанлиқини хәвәр қилған иди. Таймиз гезити хитай авиатсийә идарисиниң бир хадиминиң сөзини нәқил кәлтүрүп, уйғур елидики һава йоллирида ишләйдиған уйғур күткүчиләрниң хизмәт орунлири йөткилип хитайдики башқа районларда учидиған айропиланларниң хизмитигә алмаштурулғанлиқини әскәрткән иди.

Таймиз гезитиниң мәзкур хәвири хәлқара җамаәтниң диққитини қозғиған вә уйғур тәшкилатлири хитай даирилириниң уйғур учқучиларни хизмәттин тохтитиш қарарини, хитай һөкүмитиниң уйғурларға қаратқан кәмситиш сияситиниң испати дәп көрсәткән иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.