Хитайда сүпәтсиз сүт парашокидин зәһәрләнгән балилар техиму көп болуши мумкин

Хитай һөкүмити дүшәнбә күни пүтүн хитай базиридики балилар сүт парашоклири үстидин тәкшүрүш елип баридиғанлиқини елан қилди. Мәлум болушичә, 15 - сентәбиргә қәдәр шиҗяҗуаң сәнлу ширкити ишләпчиқарған сәнлу маркилиқ бовақлар парашоки сәвәблик зәһәрлинип кесәллик көрүлгән балилар 1253гә йәткән.
Мухбиримиз гүлчеһрә
2008-09-16
Share

  Буниң ичидә иккиси һаятидин айрилған, 913 нәпириниң һаяти қутқузуп қелинған, арисида йәнә 53 нәпириниң сақлиқи йәнила хәп ичидә болуп җиддий давалаш елип берилмақта икән.

Дүшәнбә күни чүштин бурун хебей өлкиси хәлқ һөкүмитидә ечилған ахбарат елан қилиш йиғинида сәнлу гуруһи муавин баш ледири җаң ченлиң, сәнлу бовақлар сүт парашокиниң булғинишиға учриғанлардин тазим арқилиқ кәчүрүм сориған.

Һазирға қәдәр йәнила 700 тоннидин артуқ вақти өткән бу хил мәһсулат хитай базарлирида тарқилип йүрмәктә шундақла сәнлу маркилиқ бовақлар сүт парашокиниң зәһәрлишигә учриған балилар техиму көп болуши мумкин икән. Бәзи хәвәрләрдә көрситилишичә, сәнлу гуруһи интайин зор төләмгә учриши мумкин.

Тәкшүрүлүшичә, һазирға қәдәр хитайда йәнә 69 ширкәт һәм завутниң ишләпчиқарған балилар сүт парашоклирида мәсилә көрүлгән.

Бүгүн хитай сәһийә министирлиқиниң 150 тин көпрәк сүпәт тәкшүрүш органлири 24 саәт ичидә пүтүн хитай базарлиридики бовақлар сүт парашоклири үстидин җиддий һәм қаттиқ тәкшүрүш елип берип, бир ‏ - икки күн ичидә нәтиҗисини елан қилидикән.

Хитай даирилири бүгүнгә қәдәр зәһәрлик сүт парашок мәсилисигә мунасивәтлик 19 кишини қолға алған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт