មន្ត្រីជាន់ខ្ពស់នៃទីចាត់ការការងារព្រំដែនកម្ពុជា បានឱ្យដឹងថា គេបានដាក់បញ្ចូលសំណើទៅក្នុងកិច្ចជួបប្រជុំគ្នារវាងមន្ត្រីទីចាត់ការការងារព្រំដែននៃប្រទេសទាំងពីរ ដែលបានជួបពិភាក្សាគ្នាជាលើកដំបូង ដោយពុំធ្លាប់មានពីមុនមកទាល់តែសោះនោះ ដោយសុំឱ្យភាគីថៃ បើកច្រករបៀងព្រំដែន តូចៗចំនួន ២ នៅក្នុងស្រុកបន្ទាយអំពិល ក្នុងខេត្តឧត្ដរមានជ័យ ឡើងវិញ។
លោកឧត្ដមសេនីយ៍ឯក សៀក សុជាតិ ជានាយកទីចាត់ការការងារព្រំដែននៃអគ្គបញ្ជាការកងយោធពលខេមរភូមិន្ទ។ លោកបានមានប្រសាសន៍កាលពីព្រឹកថ្ងៃអង្គារ ទី២៨ ខែកុម្ភៈ ថា កម្ពុជាចង់ឱ្យជីវភាពរបស់ប្រជាពលរដ្ឋដែលរស់នៅជាប់បន្ទាត់ព្រំដែនកម្ពុជា-ថៃ មានកម្រិតសមរម្យ និងការអភិវឌ្ឍផ្នែកសេដ្ឋកិច្ចឱ្យបានប្រសើរ។ លោកឧត្ដមសេនីយ៍បានមានប្រសាសន៍ទៀតថា ដោយសារកត្តាទាំងនោះ គឺលោកចង់ឱ្យច្រករបៀងព្រំដែនខ្មែរ-ថៃ តំបន់ជប់គគីរ នៅក្នុងឃុំអំពិល និងច្រកថ្មដូន នៅក្នុងឃុំគោកមន ស្រុកបន្ទាយអំពិល លើខ្នងភ្នំដងរែករបស់ខេត្តឧត្តរមានជ័យ បានបើកដំណើរការជាអចិន្ត្រៃយ៍ដូចធម្មតាឡើងវិញ។
លោកឧត្ដមសេនីយ៍ឯក សៀក សុជាតិ៖ «ខ្ញុំសំណើទៅខាងភាគីថៃហ្នឹង គឺយើងសុំបើកនូវច្រកជប់គគីរ និងច្រកថ្មដូន ដើម្បីឱ្យប្រជាពលរដ្ឋទាំងពីរមានចរាចរណ៍ទីផ្សារល្អ។ ឥឡូវនេះបើក១សប្ដាហ៍ម្ដង ប៉ុន្តែជាលក្ខណៈសំខាន់គឺអាជ្ញាធរខេត្ត (ឧត្តរមានជ័យ) គឺគាត់ចង់បានបើកជាអចិន្ត្រៃយ៍ ដើម្បីឱ្យប្រជាពលរដ្ឋពង្រីកនូវទីផ្សារ ហើយនិងនៅតាមព្រំដែន ឱ្យការអភិវឌ្ឍន៍»។
ច្រករបៀងព្រំដែនតំបន់ជប់គគីរដែលនៅទល់មុខគ្នានឹងស្រុកបាងក្រួត ខេត្តបូរីរ៉ាំ និងច្រកថ្មដូន ដែលនៅទល់មុខគ្នានឹងស្រុកភ្នំដងរែក ខេត្តសុរិន្ទរបស់ប្រទេសថៃ បានបិទរយៈពេលជាង ៣ឆ្នាំមកហើយ ចាប់តាំងពីប្រទេសកម្ពុជា និងថៃ បានកើតមានជម្លោះព្រំដែនជាមួយគ្នាកាលពីអំឡុងខែកក្កដា ឆ្នាំ២០០៨ ហើយកងទ័ពទាំងសងខាងធ្លាប់បានវាយប្រយុទ្ធគ្នាដ៏ខ្លាំងក្លាជាច្រើនលើកកន្លងទៅនោះ។
ចាប់តាំងពីអំឡុងខែសីហា ឆ្នាំ២០១១ អាជ្ញាធរខេត្តឧត្តរមានជ័យ របស់កម្ពុជា បានជួបប្រជុំជាមួយអាជ្ញាធរខេត្តបូរីរ៉ាំរបស់ថៃ ដើម្បីស្វែងរកកិច្ចសហការនៅតាមបន្ទាត់ព្រំដែនឡើងវិញ និងបានបើកច្រករបៀងព្រំដែននៅតំបន់ជប់គគីរ ឱ្យប្រជាពលរដ្ឋទាំងសងខាងអាចដោះដូរទំនិញ គ្នាបាន ក្នុង១សប្ដាហ៍ម្ដង ដោយដំណើរនោះបានបន្តរហូតមកដល់ពេលនេះ ក៏ប៉ុន្តែចំពោះច្រករបៀងព្រំដែនតំបន់ថ្មដូនវិញ គឺនៅបន្តបិទទ្វារនៅឡើយ។
លោកឧត្ដមសេនីយ៍ទោ វរ៉ាវីត ដារុនឈូ (Voravit Darunchoo) ជានាយកទីចាត់ការការងារព្រំដែន នៃក្រសួងការពារជាតិថៃ។ លោកបានមានប្រសាសន៍ថា ចំពោះសំណើរបស់កម្ពុជា ដែលបានសុំឱ្យមានការបើកច្រករបៀងព្រំដែនចំនួន ២ឡើងវិញនោះ គឺលោកសន្យាថា នឹងពាំនាំយកទៅជំរាបដល់ថ្នាក់ដឹកនាំនៃរដ្ឋាភិបាលថៃ ដើម្បីឱ្យធ្វើការសំរេចចិត្តទៅលើរឿងនោះ៖ «ចំពោះអ្នកដែលអាចធ្វើការសំរេចចិត្តថា អាចបើកបាន ឬមិនបាននោះ គឺជាវាអាស្រ័យទៅក្រសួងមហាផ្ទៃរបស់ប្រទេសថៃជាអ្នកសំរេច»។
លោក វរ៉ាវីត បានមានប្រសាសន៍ថា ក្នុងការជួបប្រជុំគ្នាកាលពីព្រឹកថ្ងៃអង្គារ គឺភាគីទាំងពីរបានស្វែងរកកិច្ចសហប្រតិបត្តិការល្អរវាងកងទ័ពទាំងសងខាងនៅតាមបន្ទាត់ព្រំដែន ដោយមានគោលដៅធ្វើយ៉ាងណាឱ្យប្រជាពលរដ្ឋទាំងពីរដែលរស់នៅតាមតំបន់ព្រំដែនមានសុខសន្តិភាព។
ទាក់ទិននឹងបញ្ហាទាហានថៃ តែងបាញ់សម្លាប់ប្រជាពលរដ្ឋខ្មែរដែលលួចឆ្លងដែនទៅកាប់ឈើគ្រញូងយកមកលក់ដូរខុសច្បាប់នោះ មន្ត្រីទីចាត់ការការងារព្រំដែននៃក្រសួងការពារជាតិថៃ បានស្នើសុំឱ្យមន្ត្រីព្រំដែនកម្ពុជា ធ្វើការផ្សព្វផ្សាយដល់ប្រជាពលរដ្ឋឱ្យបានយល់ កុំឱ្យប្រជាពលរដ្ឋបន្តលួចឆ្លងដែនទៅធ្វើអ្វីខុសច្បាប់ទៀត ក៏ប៉ុន្តែប្រសិនបើប្រជាពលរដ្ឋខ្មែរគ្រាន់តែចូលទៅសួរសុខទុក្ខសាច់ញាតិដោយខុសច្បាប់នោះ គឺអាជ្ញាធរថៃ អាចអនុវត្តតាមបែបជាមនុស្សធម៌បាន ដូចជាអាចបញ្ជូនត្រឡប់មកវិញជាដើម៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
I wonder why is the government always request to Thai to open the new way, doe Cambodia get adventage from this way? For my idea the government must to create manufacture/create new job and can receive adventage together as farmer and worker. In Battambang was 3 manufacture and, now, is sold to take money put in private pocket
Feb 28, 2012 08:54 PM
