ពលរដ្ឋ និងក្រុមយុវជនសំដែងមតិផ្សេងគ្នាជុំវិញពិធីមង្គលការ កូនស្រីទីពីររបស់ឧបនាយករដ្ឋមន្ត្រីលោក នេត សាវឿន ដែលបានចំណាយលុយមហាសាលបែបអភិជន បង្អួតពលរដ្ឋ ដែលកំពុងលំបាកវេទនា គ្មានការងារធ្វើ ជំពាក់បំណុលធនាគារ និងធ្វើចំណាកស្រុកកាន់តែច្រើន។
ពលរដ្ឋ និងយុវជនរស់នៅរាជធានីភ្នំពេញ និងតាមបណ្ដាខេត្តមួយចំនួនកំពុងមានមន្ទិលចំពោះការសម្ញែងទ្រព្យសម្បត្តិយ៉ាងច្រើនសន្ធឹកសន្ធាប់ របស់លោក នេត សាវឿន ក្នុងពិធីមង្គលការឱ្យកូនស្រីទីពីរ របស់លោក ។
ពលរដ្ឋឆ្ងល់អំពីប្រភពទ្រព្យសម្បត្តិ
ពលរដ្ឋឆ្ងល់ថា តើទ្រព្យសម្បត្តិរបស់អតីតមេប៉ូលិសរូបនេះមានប្រភពមកពីណា? បើធៀបនឹងប្រាក់ខែដែលលោកទទួលបានពីពលរដ្ឋបង់ពន្ធមិនដល់ ២លានរៀលផង (១៩៣០.០០០) ក្នុងមួយខែ ការណ៍ដែលលោកធ្វើជាអគ្គស្នងការនគរបាលជាតិ អស់រយៈពេល ១៥ឆ្នាំ គឺចាប់ពីឆ្នាំ២០០៨ ដល់ឆ្នាំ២០២៣។
ពលរដ្ឋរស់នៅរាជធានីភ្នំពេញ កញ្ញា ខេម ស្រីម៉ុម បង្ហាញអារម្មណ៍សង្វេគយ៉ាងខ្លាំងពីជោគវាសនាជាតិ ខណៈដែលមន្ត្រីធំៗ ក្នុងជួររដ្ឋាភិបាលមានទ្រព្យសម្បត្តិច្រើនកប់ពពករីឯពលរដ្ឋក្រីក្រវិញ នៅតែលំបាកវេទនាគ្មានអង្ករច្រកឆ្នាំង។
កញ្ញាសង្ស័យថា ការសម្ញែងទ្រព្យសម្បត្តិនេះ បង្ហាញពីអំពើពុករលួយ និងខ្វះឆន្ទៈបម្រើរាស្ត្រ។
លោក ខេម ស្រីម៉ុម៖«ក្នុងនាមជាពលរដ្ឋម្នាក់ខ្ញុំមានអារម្មណ៍ថាសង្វេគខ្លាំងមែនទែន ព្រោះក្នុងជួររដ្ឋាភិបាលអ្នកធ្វើការមានលុយកប់ពពក ប្រាក់ខែតិចតួចទេ តែមានលុយវាល់លាន។ ដោយសារអីនេះជាចម្ងល់ពលរដ្ឋ?ហើយពេលពលរដ្ឋអ្នកក្រគឺក្រខ្លាំងបំផុត ក្រខ្លាំងមែនទែន។ តែអ្វីដែលយើងមើលឃើញគឺអំពើពុករលួយនឹងហើយ ដែលធ្វើឱ្យអ្នកមានមានខ្លាំង អ្នកក្រខ្លាំង»។
មង្គលការកូនស្រីទីពីររបស់ឧបនាយករដ្ឋមន្ត្រី និងជាអតីតអគ្គស្នងការនគរបាលជាតិលោក នេត សាវឿន បែបអភិជននេះ កំពុងផ្ទុះការចាប់អារម្មណ៍ភាពពីពលរដ្ឋ ដែលពួកគាត់មើលឃើញថា ទ្រព្យសម្បត្តិរបស់មន្ត្រីធំៗ ហាក់មានគម្លាតដាច់ស្រឡះ បើធៀបនឹងពលរដ្ឋសាមញ្ញ។
មង្គលការកូនស្រីរបស់លោក នេត សាវឿន ឈ្មោះ នេត ធីតាច័ន្ទធីម៉ា កាលពីថ្ងៃទី១៥-១៦ ខែកុម្ភៈ បានរៀបចំទ្រង់ទ្រាយធំ តុបតែងអាគារទំនើប អមដោយផ្កាស្រស់ចម្រុះពណ៌ប្រណីតនាំចូលពីក្រៅប្រទេស និងមានក្រុមតារាចម្រៀងល្បីៗ ច្រៀងកំដររោង។ លើសពីនេះទៀត ឪពុកម្ដាយកូនក្រមុំគឺលោក នេត សាវឿន និងអ្នកស្រី ហ៊ុន គឹមឡេង ព្រមទាំងសាច់សារលោហិត មានក្រុមគ្រួសារលោក ហ៊ុន សែន និងអ្នកកាន់អំណាចធំៗ ជាច្រើននាក់ទៀតចូលរួម។
ចំណែកឯយុវជនរស់នៅខេត្តស្វាយរៀង លោក យ៉ឹង ដាវីត យល់ថា កម្មវិធីនេះហាក់បង្ហាញពីឥទ្ធិពលអំណាច និងទឹកលុយមហាសាលរបស់មន្ត្រីធំៗ បង្កប់ភាពមិនប្រក្រតីច្រើន ស្របពេលដែលពលរដ្ឋក្រីក្ររកមួយថ្ងៃរស់មួយថ្ងៃ ហើយពលរដ្ឋខ្លះទៀតរកលុយបង្វិលសងធនាគារសឹងតែមិនបាន។
លោក យ៉ឹង ដាវីត៖«នៅពេលដែលពួកគាត់មានលុយចាយលែងអស់បែបហ្នឹង គឺជះឥទ្ធិពលអាក្រក់ដល់ប្រជាជនណាស់ ដោយសារតែការចាយវាយរបស់ពួកគាត់ចូលចិត្តខ្ជះខ្ជាយបែបហ្នឹង ឬក៏មិនដឹង?ប៉ុន្តែទៅលើការបង្ហាញទាំងនោះគឺគាត់ចង់បង្ហាញឥទ្ធិពល និងអំណាចខណៈដែលប្រជាពលរដ្ឋស្ទើរគ្រប់គ្នារកលុយមួយថ្ងៃចាយមួយថ្ងៃ ខ្លះទៀតសងធនាគារមិនទាន់ផង»។
អត្ថបទដែលទាក់ទង៖
មង្គលការកូនស្រីទីពីររបស់លោក នេត សាវឿន ផ្ទុះការចាប់អារម្មណ៍ជាថ្មី
[ ការតែងតាំងកូនស្រី លោក នេត សាវឿន ជាទីប្រឹក្សាលោក ហ៊ុន ម៉ាណែត រងការរិះគន់Opens in new window ]
[ ក្មួយស្រីរបស់លោក ហ៊ុន សែន ទិញវីឡានៅប្រទេសស៊ីបតម្លៃ២លាន៧សែនដុល្លារOpens in new window ]
[ មេប៉ូលិសជាន់ខ្ពស់កម្ពុជា លោក នេត សាវឿន មិនហ៊ាននិយាយរឿងដកហូតសញ្ជាតិស៊ីបOpens in new window ]
យុវជនម្នាក់ទៀត រស់នៅខេត្តកំពង់ស្ពឺ លោក គឹម ឆេងឡេង មើលឃើញថា តួនាទី និងប្រាក់ខែរបស់លោក នេត សាវឿន ដែលធ្វើការនៅស្ថាប័នរដ្ឋជាច្រើនឆ្នាំមកនេះ ហាក់មិនស៊ីសង្វាក់គ្នាដាច់ស្រឡះ នឹងការចំណាយខ្ទង់លានដុល្លារក្នុងពិធីនេះ។
លោកចាប់អារម្មណ៍ខ្លាំង ពីទ្រព្យសម្បត្តិរបស់មន្ត្រីធំៗ ឆ្លុះបញ្ចាំងពីការប្រើប្រាស់អំណាចជាមន្ត្រីរាជការ ដើម្បីរកស៊ីបម្រើប្រយោជន៍ផ្ទាល់ខ្លួន។
លោក គឹម ឆេងឡេង៖«សម្រាប់ខ្ញុំមិនដឹងថាគាត់បានលុយមកពីប្រភពណា?ឬមុខជំនួញអ្វីផ្សេងៗខ្ញុំអត់ដឹង ប៉ុន្តែរឿងនេះគួរឲ្យចាប់អារម្មណ៍គឺរឿងនេះមិនធម្មតា ព្រោះបើយើងនិយាយពីតួនាទីរបស់គាត់វាមិនអាចសល់លុយដល់ការចំណាយរាប់ពាន់រាប់លានដុល្លារអ៊ីចឹងទេ»។
អារម្មណ៍ពលរដ្ឋ ចំពោះការសម្ញែងទ្រព្យសម្បត្តិដូច្នេះ
រីឯពលរដ្ឋរស់នៅខេត្តភាគឦសានឯនោះវិញ ក៏ចាប់អារម្មណ៍អំពីពិធីមង្គលការកូនមន្ត្រីធំៗ នេះដែរ ដោយពួកគាត់យល់ថា ទង្វើនេះកំពុងធ្វើបាបពលរដ្ឋដោយប្រយោល និងមិនខ្វល់ពីការលំបាកវេទនារបស់រាស្ត្រនោះឡើយ។
ជនជាតិដើមភាគតិចកួយរស់នៅខេត្តស្ទឹងត្រែង លោក ថាន់ វ៉ន យល់ថា ការសម្ញែងទ្រព្យសម្បត្តិដូច្នេះ កំពុងធ្វើបាបផ្លូវចិត្តពលរដ្ឋ ដែលពួកគាត់ខ្លះគ្មានការងារធ្វើ ត្រូវបង្ខំចិត្តធ្វើចំណាកស្រុកស្ងាត់ភូមិ ព្រាត់ប្រាស់ក្រុមគ្រួសារ។
លោក ថាន់ វ៉ន៖«មន្ត្រីធំៗ ធ្វើអញ្ចឹង ស្មើនឹងធ្វើបាបរាស្ត្រទៅវិញទេ ព្រោះរាស្ត្រកំពុងតែដាច់បាយ ជំពាក់ធនាគារ សេដ្ឋកិច្ចមិនដើរ។ ការដែលកូនមន្ត្រីរាជការធ្វើដល់ថ្នាក់នោះ មានន័យថាមន្ត្រីនោះមិនគិតគូរពីផលវិបាករបស់ប្រជាជនទេ "អាណាកើតអីកើតទៅ សំខាន់ឱ្យតែអញមានលុយសម្ញែង"ទ្រព្យសម្បត្តិតែជាមួយខ្មែរគ្នាឯង»។
លោក នេត សាវឿន មានកូនស្រីចំនួន៣នាក់ ហើយលោកបានបញ្ជូនពួកគាត់ទាំងអស់ ឲ្យទៅរស់នៅធំធាត់និងរៀនសូត្រក្នុងប្រទេសអង់គ្លេស ហើយថែមទាំងចំណាយលុយរាប់លានដុល្លារទិញសញ្ជាតិស៊ីប (Cyprus) ដោយស្ងាត់ៗកាលពីឆ្នាំ២០១៧។
លោកធ្វើជាមន្ត្រីរាជការស្ទើរពេញមួយជីវិត បង្កើតទ្រព្យសម្បត្តិមហាសាលយ៉ាងលឿន ជាមួយនឹងភរិយា គឺលោកស្រី ហ៊ុន គឹមឡេង ត្រូវជាក្មួយស្រីបង្កើតរបស់លោក ហ៊ុន សែន។
លោក នេត សាវឿន និងភរិយាបានដើរទិញផ្ទះជាច្រើនកន្លែងទៀត នៅទ្វីបអឺរ៉ុប និងអាស៊ីក្នុងតម្លៃជាច្រើនលានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។