ប៉ូលិសថៃ (Thailand) សម្រេចឃុំខ្លួនមនុស្សប្រមាណ ១រយនាក់ នៅថ្ងៃទី៥ ខែមីនា បន្ទាប់ពីពួកគេត្រូវបានចាប់ខ្លួនពាក់ព័ន្ធនឹងប្រតិបត្តិការក្នុងមជ្ឈមណ្ឌលឆបោកតាមអនឡាញ (Online) នៅកម្ពុជា។
សារព័ត៌មានរ៉យទ័រ (Reuters)បានរាយការណ៍ដោយ ដកស្រង់សម្ដីអគ្គស្នងការនគរបាលថៃ លោក ថាតឆៃ ភីតាណេឡាបុត្រ (Thatchai Pitaneelaboot) ថា តុលាការថៃក៏បានចេញដីកាចាប់ខ្លួនជនជាតិចិនពីរនាក់ដែលជាមេក្រុមក្នុងអំពើឆបោកតាមអនឡាញដែលប៉ូលិសកម្ពុជា និងថៃបានបើកប្រតិបត្តិការបង្ក្រាបទ្រង់ទ្រាយនៅមជ្ឈមណ្ឌលឆបោកតាមអនឡាញក្នុងក្រុងប៉ោយប៉ែត ខេត្តបន្ទាយមានជ័យកាលពីចុងខែកុម្ភៈ។ ប្រភពដដែលបញ្ជាក់ថា មនុស្សប្រមាណ ១រយនាក់ដែលត្រូវបានឃាត់ខ្លួន ត្រូវបានប៉ូលិសថៃកំពុងសម្របសម្រួលការធ្វើមាតុភូមិនិវត្តន៍ ហើយពួកគេភាគច្រើនជាជនរងគ្រោះនៃការជួញដូរមនុស្ស។ ប៉ូលិសថៃឱ្យដឹងទៀតថា មនុស្សប្រមាណ ១រយនាក់នោះគឺជាផ្នែកមួយនៃក្រុមឧក្រិដ្ឋជនដែលដំណើរការប្រតិបត្តិការឆបោកតាមអនឡាញ។
កម្លាំងនគរបាលកម្ពុជា និងថៃ កាលពីថ្ងៃទី២២ និងទី២៣ ខែកុម្ភៈ បានសហការគ្នាចុះបង្ក្រាបទីតាំងមជ្ឈមណ្ឌលឆបោកតាមអនឡាញចំនួន ២ទីតាំង ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត បន្ទាប់ពីស៊ើបអង្កេតអស់រយៈពេលជាង ៣ខែមក។ នៅក្នុងប្រតិបត្តិការនោះអាជ្ញាធរបានរកឃើញជនបរទេសសរុបចំនួន ២៣០នាក់ ក្នុងនោះមានជនជាតិថៃ ១២៣នាក់ ដែលពួកគេបានសម្ងំធ្វើប្រតិបត្តិការឆបោកតាមអនឡាញខុសច្បាប់។
អត្ថបទដែលទាក់ទង៖
អាជ្ញាធរកម្ពុជាកាលពីថ្ងៃទី១ ខែមីនា ក៏បាន បណ្ដេញជនជាតិថៃ ១១៩នាក់ ដោយសារតែពួកគេបានលួចចូលធ្វើការងារ និងស្នាក់នៅខុសច្បាប់ក្នុងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។