[ អានអត្ថបទជា ភាសាអង់គ្លេស៖ Mother of Cambodian teen found dead says she was working to pay family debts]
ឪពុកម្ដាយរបស់នារីរងគ្រោះឈ្មោះ ហេង សៀវលី ដែលអាជ្ញាធរជឿថា នាងត្រូវបាន ជនជាតិចិនមួយក្រុម រៀបចំផែនការសម្លាប់បំបិទមាត់នោះឱ្យដឹងថា កូនស្រីរបស់ពួកគាត់កតញ្ញូចំពោះឪពុកម្ដាយ និងមានអត្តចរិតស្លូតបូត។ ម្ដាយជនរងគ្រោះអះអាងថា ថ្វីត្បិតកូនស្រីមានអាយុត្រឹមតែ ១៨ឆ្នាំ ប៉ុន្តែកាលនៅមានជីវិត គឺនាងបានបោះបង់ការសិក្សាត្រឹមថ្នាក់ទី៩ និងខិតខំពុះពារស្វែងរកការងារ ដើម្បីបានប្រាក់ជួយទំនុកបម្រុងប្អូនៗឱ្យបានរៀនសូត្រ ជួយឪពុកម្ដាយសងបំណុលធនាគារ និងផ្គត់ផ្គង់ជីវភាពក្រីក្រ ខណៈឪពុកក៏វ័យចំណាស់ និងមានជំងឺប្រចាំកាយ។
ឪពុកម្ដាយ ពូមីងរបស់នារីរងគ្រោះអាយុ ១៨ឆ្នាំឈ្មោះ ហេង សៀវលី នៅតែតក់ស្លុត និងរំជួលចិត្តត្បិតសង្វេគកូនស្រីត្រូវបានឃាតករវាយដំសម្លាប់ និងយកសាកសពកប់ចោលទាំងអាក្រាតកាយនៅរាជធានីភ្នំពេញ។ សាច់ញាតិបានរៀបចំពិធីបុណ្យសពកូនស្រីគម្រប់ខួប ៧ថ្ងៃនៅស្រុកកំណើតស្ថិតក្នុងស្រុកកំពង់ត្រាច ខេត្តកំពត កាលពីថ្ងៃទី៤ ខែមីនា។
ឈឺចាប់ពេញមួយជីវិត ហើយគ្រួសារកាន់តែជួបបញ្ហាជីវភាព
លោកស្រី ទឹម សុភី មានវ័យជាង ៤០ឆ្នាំ គឺជាម្ដាយរបស់នារីរងគ្រោះឈ្មោះ ហេង សៀវលី បានរៀបរាប់ទាំងទឹកមុខក្រៀមក្រំលាយឡំនឹងទឹកភ្នែកថា លោកស្រីឈឺចាប់ និងមិនអាចទទួលយកបានចំពោះក្រុមឃាតករដែលបានសម្លាប់កូនស្រីរបស់លោកស្រីទាំងដែលនាងគ្មានកំហុសដោយអយុត្តិធម៌។ លោកស្រីបញ្ជាក់ថា អវត្តមានកូនស្រីដែលគ្មានថ្ងៃត្រឡប់ក្នុងរូបភាពនេះនឹងធ្វើឱ្យលោកស្រីចងចាំពីការឈឺចាប់ពេញមួយជីវិត ហើយគ្រួសារលោកស្រីកាន់តែជួបបញ្ហាជីវភាពប្រចាំថ្ងៃ។
លោកស្រី ទឹម សុភី ឱ្យដឹងទៀតថា កូនស្រីរបស់លោកស្រីបានបង្ខំចិត្តបោះបង់ការសិក្សាត្រឹមថ្នាក់ទី៩ និងចាកចេញពីផ្ទះតាំងពីអាយុ ១៥ឆ្នាំទៅធ្វើការងារជាអ្នកលក់អីវ៉ាន់នៅក្នុងអគារណានហៃ (Nanhai) នៅខេត្តព្រះសីហនុ ដោយសារតែជីវភាពក្រីក្រខ្លាំង និងជំពាក់បំណុលធនាគារ។
លោកស្រី ទឹម សុភី មានកូនចំនួន ៣នាក់ហើយកូនស្រីដែលឃាតករសម្លាប់គឺជាកូនស្រីច្បងក្នុងគ្រួសារ។ ម្ដាយរៀបរាប់ថា កាលនៅមានជីវិត សៀវលី ប្រៀបបីដូចចន្ទល់គ្រួសារជំនួសឪពុកដែលមានជំងឺប្រចាំកាយ ព្រោះបន្ទាប់ពីចេញពីផ្ទះទៅធ្វើការខេត្តព្រះសីហនុ នាងបានផ្ញើប្រាក់យ៉ាងហោច ១លានរៀលទៀងទាត់ជូនអ្នកផ្ទះក្នុងមួយខែ ដើម្បីឱ្យម្ដាយឪពុកទប់ទល់ការចំណាយជីវភាពក្នុងគ្រួសារ និងការសិក្សាប្អូនប្រុសចំនួន ២នាក់។
លោកស្រី ទឹម សុភី៖«ខ្ញុំទាមទារយុត្តិធម៌ឱ្យខ្ញុំ សម្លាប់កូនខ្ញុំអាក្រាតកាយទាំងអស់ ខ្ញុំជាម៉ែនិយាយលែងរួច រន្ធត់ចិត្តហ្មងទៅដល់ឃើញកូនគេដឹកចូលវត្តខ្ញុំអស់កម្លាំង អស់ព្រលឹងពីខ្លួនហើយ។ ខ្ញុំអាណិតកូនខ្ញុំណាស់ កូនខ្ញុំល្អលើសអីទាំងអស់ធ្វើការមិនដែលបាត់ប្រាក់ខែឱ្យម៉ែទេខែណាក៏ផ្ញើឱ្យម៉ែ ២រយ ៥០ដុល្លារ ៣រយដុល្លារ មិនទៀងទេ សូមជួយរកយុត្តិធម៌ដោះស្រាយឱ្យកូនខ្ញុំផង កុំឱ្យគ្នាស្លាប់ដោយគ្មានយុត្តិធម៌ពេក»។
លោកស្រី ទឹម សុភី បន្តរៀបរាប់ទៀតថា កូនលោកស្រីមានទំនាក់ទំនងស្នេហាក្នុងរយៈពេល ៦ខែចុងក្រោយនេះជាមួយជនជាតិចិនដែលសារភាពថា បានចូលរួមក្នុងផែនការសម្លាប់កូនស្រីរបស់លោកស្រី។ លោកស្រី ទឹម សុភី ឱ្យដឹងទៀតថា កូនស្រីក៏ធ្លាប់បាននាំមិត្តប្រុសជាជនជាតិចិន និងបក្ខពួកគេចំនួន ២នាក់មកលេងផ្ទះលោកស្រីស្ថិតភូមិកំពូលមាស ឃុំឫស្សីស្រុកខាងលិច ស្រុកកំពង់ត្រាច ខេត្តកំពត កាលពីថ្ងៃទី២៧ ខែមករា ពោលគឺក្នុងអំឡុងពិធីបុណ្យចូលឆ្នាំចិនដែរ។ ទោះជាយ៉ាងណា ម្ដាយជនរងគ្រោះអះអាងថា ជនជាតិចិនដែលជាសង្សារនោះគ្មានចេតនាចូលស្ដីដណ្ដឹងកូនស្រីតាមប្រពៃណីខ្មែរនោះទេ។
លោកស្រី ទឹម សុភី៖«កូនខ្ញុំមួយហ្នឹងបងគេបង្អស់ រៀនជិតចប់ហើយថ្នាក់ទី៩ ជិតបានប្រឡងនៅសល់តែមួយខែទៀតប្រឡងកូនខ្ញុំថា សុំឈប់ហើយ ម៉ាក់ ហាខ្ញុំជួយរកលុយម៉ាក់ឯង ទៅរកលុយទៅងាប់ខ្លួន ពេលហ្នឹងហៅមកផ្ទះក៏មិនបានដែរ នៅស្រឡាញ់គេតាមគេឡើងស្អិត។ គេសម្លាប់ថ្ងៃទី២៧ ខែកុម្ភៈ កូនខ្ញុំធ្លាប់តេ(Call)ប្រាប់ហើយៗខ្ញុំថា កូនអត់មានបណ្ដើរគ្នាអ៊ីចឹងទេ អត់ល្អមើលទេកូនអើយ យើងខ្មែរ។ កូនថា ប្រាប់ចិនដែរ ចិនថា ទុកពេលវេលាឱ្យគេគិតសិនគេនិយាយប៉ុណ្ណឹង»។
គ្រួសារលោកស្រី ទឹម សុភី ក្រីក្រខ្លាំង ហើយលោកស្រីបញ្ជាក់ថា សូម្បីតែពិធីបុណ្យសពកូនស្រីរៀបចំនៅស្រុកកំណើតនេះក៏គ្មានលទ្ធភាពធ្វើដែរ ប៉ុន្តែបានបងប្អូន និងអ្នកភូមិជួយរៃអង្គាសលុយគ្នារៀបចំពិធីបុណ្យសពជូនកូនស្រី។
គ្រួសារក្រីក្រ
លើសពីនេះទៀត សាច់ញាតិជនរងគ្រោះ និងអ្នកភូមិឱ្យដឹងថា ផ្ទះលោកស្រី ទឹម សុភី កំពុងស្នាក់នៅជុំកូន និងប្ដីក្នុងរយៈពេលជិត ១០ឆ្នាំចុងក្រោយនេះក៏ជាការជួយសាងសង់ដោយព្រះចៅអធិការវត្តកំពូលមាសដែរ។
ផ្ទះម្ដាយនារីរងគ្រោះមានទំហំប្រហែលជាង ៤ ម៉ែត្របួនជ្រុងបិទបាំងជញ្ជាំង និងប្រក់ដំបូលដោយស័ង្កសី រីឯរោងបាយនៅខាងឆ្វេងផ្ទះបិទបាំងដោយស្លឹកដូងមិនជុំ។
ចំណែក ឪពុកនារីជនរងគ្រោះ គឺលោក ហេង មៀន ថ្លែងទាំងអួលដើមកថា ដោយសារជីវភាពគ្រួសារលោកក្រីក្រ ហើយមិនសូវចេះអក្សរផងនោះ លោកមានតែជម្រើសធ្វើការងារដោយប្រើកម្លាំងបាយធ្វើជាកម្មករសំណង់នៅក្នុងភូមិ ដើម្បីបានលុយខ្លះទប់ទល់ជីវភាពគ្រួសារ ទោះបីជាលោកមានជំងឺប្រចាំកាយ និងត្រូវលេបថ្នាំប្រចាំថ្ងៃក្ដី។ លោកមានអារម្មណ៍រំជួលចិត្ត និងតក់ស្លុតក្រោយទទួលដំណឹង ថា កូនស្រីត្រូវបានគេសម្លាប់ និងកប់សាកសពទាំងអាក្រាតកាយ។
លោក ហេង មៀន៖«សុខភាពខ្ញុំប្រចាំថ្ងៃនេះលើសឈាមផង ឡើងជាតិអាស៊ីតផង ធ្វើការសំណង់រាល់ថ្ងៃជាកូនជាងគេហ្នឹងបានតែមួយថ្ងៃ ៤ម៉ឺនរៀលទេខំធ្វើយកលុយមក ដើម្បីដោះស្រាយជីវភាពក្នុងគ្រួសារ។ ធ្វើការបាន ៤ ទៅ ៥ថ្ងៃអ៊ីចឹងទៅខ្ចីគេ ១០ម៉ឺនរៀល ឬ ១៥ម៉ឺនរៀលអ៊ីចឹងទៅយកមកទិញអង្ករ ទិញម្ហូបហូប។ ថ្ងៃគេប្រាប់ដឹងដំណឹងថា កូនស្លាប់ឡើងឈាមដល់ ១៩»។
ជនជាតិចិន ៣នាក់ពាក់ព័ន្ធនឹងឃាតកម្ម
នាយកដ្ឋានព្រហ្មទណ្ឌនៃក្រសួងមហាផ្ទៃ បញ្ជាក់ថា ករណីឃាតកម្មលើនារីវ័យ ១៨ឆ្នំាំឈ្មោះ ហេង សៀវលី យ៉ាងហោចមានជនជាតិចិនចំនួន ៣នាក់ជាប់ពាក់ព័ន្ធ។ ក្នុងនោះជនជាតិចិនឈ្មោះ យ៉ាង ខៃស៊ីន (Yang Kaixin) កំពុងរត់គេចខ្លួននៅឡើយ និងជាមេខ្លោងរៀបចំផែនការសម្លាប់នារីរងគ្រោះកាលពីថ្ងៃទី២៧ ខែកុម្ភៈ និងរៀបចំសាកសពស្លាបសេកទាំងអាក្រាតកាយយកទៅកប់ក្នុងដីឡូត៍ជិតបឹងមួយកន្លែងក្នុងខណ្ឌដង្កោ រាជធានីភ្នំពេញ។ ចំណែក ជនសង្ស័យជនជាតិចិន ២នាក់ដែលសមត្ថកិច្ចចាប់ខ្លួនបានកាលពីថ្ងៃទី៣ ខែមីនា ម្នាក់មានឈ្មោះ ចេន កុង (Chen Cong) គឺជាមិត្តប្រុសរបស់នារីរងគ្រោះ និងម្នាក់ទៀតមានឈ្មោះ លី ហាវហាវ (Li HaoHao) ហើយពួកគេបានសារភាពថា ពិតជាបានចូលរួមក្នុងផែនការរបស់ជនជាតិចិនឈ្មោះ យ៉ាង ខៃស៊ីន សម្លាប់នារីរងគ្រោះព្រោះតែនាងបានដឹងរឿងរ៉ាវសម្ងាត់ច្រើនរបស់ក្រុមជនជាតិចិនទាំងនោះ។
វិទ្យុអាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ដើម្បីសាកសួរបន្ថែមជុំវិញរឿងករណីអំពើឃាតកម្មនេះបានទេនៅថ្ងៃទី៤ ខែមីនា។
អត្ថបទដែលទាក់ទង៖
ទាក់ទងរឿងរ៉ាវនារីរងគ្រោះដឹងរឿងរ៉ាវសម្ងាត់របស់ជនដៃដល់ទាំងនោះ ម្ដាយជនរងគ្រោះបញ្ជាក់ថា កូនស្រីរបស់ពួកគាត់មិនដែលបញ្ចេញព័ត៌មានទាំងនេះឱ្យបានដឹងនោះទេ។ លោកស្រី ទឹម សុភី អះអាងថា មិត្តប្រុស និងក្រុមជនជាតិចិនដែលធ្វើការអនឡាញទាំងនោះបានល្បួងឱ្យកូនលោកស្រីឈប់ធ្វើការងារនៅខេត្តព្រះសីហនុ និងឱ្យតាមពួកគេមករាជធានីភ្នំពេញ ដោយក្រុមជនជាតិចិនទាំងនោះធានាអំពីការចំណាយ និងកន្លែងស្នាក់នៅ។
លោកស្រី ទឹម សុភី៖«កូនខ្ញុំលក់អីវ៉ាន់នៅម៉ាត(Mart)ចិននៅហៃណានអគារជាន់ទី២២ ទៅ[ភ្នំពេញ]តាមចិនហ្នឹងវាល្បួងហៅទៅថា មិនបាច់ធ្វើការទេចាំគេចិញ្ចឹមគេថា អ៊ីចឹង។ ចូលធ្វើការដំបូងៗបានប្រាក់ខែ ២រយដុល្លារជាងហ្នឹង ២រយ ៥០ដុល្លារ ហើយកូនខ្ញុំរករាល់ថ្ងៃសម្រាប់ឱ្យម៉ែបង់អង្គការ ដល់ថ្ងៃទម្លាក់លុយមកឱ្យម៉ែបង់អង្គការរហូត»។
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADOH) លោក អំ សំអាត បានសង្កត់ធ្ងន់ដោយបន្តជំរុញឱ្យសមត្ថកិច្ចស៊ើបអង្កេតលើក្រុមជនសង្ស័យដែលជាជនជាតិចិនទាំងនោះ ព្រោះលោកយល់ថា រឿងសម្ងាត់ដែលជនរងគ្រោះបានដឹងនោះប្រសិនបើមិនមែនជាការប្រព្រឹត្តបទល្មើសឧក្រិដ្ឋទេនោះ ក៏ក្រុមឃាតករមិនអាចឈានដល់ការសម្លាប់ជនរងគ្រោះបំបិទមាត់ដែរ។ លោកក៏ទទូចឱ្យកម្លាំងជំនាញពន្លឿននីតិវិធីតាមចាប់មេខ្លោងយកមកកាត់ទោស និងផ្ដល់សំណង់ជំងឺចិត្តដល់ក្រុមគ្រួសារជនរងគ្រោះ។
លោក អំ សំអាត៖«ករណីឃាតកម្មលើស្ត្រីវ័យក្មេងអាយុទើបតែ ១៨ឆ្នាំនេះជាករណីឃាតកម្មមួយដ៏ឃោរឃៅ អមនុស្សធម៌។ បើមើលទៅឃាតកម្មនេះទីមួយធ្វើឱ្យស្ត្រីវ័យក្មេងបាត់បង់ជីវិត ទីពីរធ្វើឱ្យក្រុមគ្រួសារស្ត្រីវ័យក្មេងនេះតែលតោលបន្ថែមទៀត ព្រោះគ្រួសាររបស់គាត់គឺជាគ្រួសារក្រីក្រពឹងផ្អែកលើស្ត្រីវ័យក្មេងនេះ ជាអ្នកផ្គត់ផ្គង់លើគ្រួសារ តាមការរកចំណូលរបស់គាត់។ នៅពេលដែលបាត់បង់ជីវិតគាត់ទៅក្រុមគ្រួសារនឹងរស់នៅតែលតោលក្រីក្របន្ថែមទៀត ជាផលលំបាកបន្ថែមទៀតចេញពីឃាតកម្មដ៏សាហាវឃោរឃៅនេះ»។
ទីតាំងលាក់បាំងអំពើឆបោកតាមអនឡាញ ការប្រើប្រាស់គ្រឿងញៀនសេរី និងអំពើលាងលុយកខ្វក់
តំបន់អគារណានហៃ នៅខេត្តព្រះសីហនុដែលនារីរងគ្រោះធ្លាប់បម្រើការងារ គឺជាតំបន់ទីតាំងមួយក្នុងចំណោមទីតាំងច្រើនកន្លែងទៀតដែលរងចោទប្រកាន់ និងត្រូវបានពលរដ្ឋក្នុងខេត្តព្រះសីហនុដឹងថា ជាទីតាំងលាក់បាំងអំពើឆបោកតាមអនឡាញ ការប្រើប្រាស់គ្រឿងញៀនសេរី និងអំពើលាងលុយកខ្វក់ ជាដើម។ មជ្ឈមណ្ឌលនៃតំបន់អគារហៃណានរបស់ថៅកែចិន ភាគច្រើនជួលក្រុមកងសន្តិសុខមាឌធំៗជាជនជាតិនេប៉ាល់ ដើម្បីធានាការពារសុវត្ថិភាពឱ្យពួកគេ។ ក្នុងតំបន់អគារនេះជាញឹកញយ ក៏មានករណីក្រុមកាប់ដាវជនជាតិចិនមួយចំនួនប្រើប្រាស់អាវុធ បាញ់បោះសេរីដាក់គ្នាដែរ។
ទោះជាយ៉ាងណាក្ដី ក្នុងសំណុំរឿងឃាតកម្មនេះ ក្រុមគ្រួសារជនរងគ្រោះទទូចរកយុត្តិធម៌ឱ្យខាងតែបានតាមរយៈទាមទារសំណងជំងឺពីក្រុមឃាតករ និងការអនុវត្តច្បាប់របស់អាជ្ញាធរឱ្យបានត្រឹមត្រូវដើម្បីនាំខ្លួនជនល្មើសទាំងអស់យកមកអនុវត្តទោសតាមច្បាប់។ សាច់ញាតិជនរងគ្រោះក៏ចង់ឃើញលោក ហ៊ុន សែន លោក ហ៊ុន ម៉ាណែត ចេញមុខអន្តរាគមន៍ដោយធានាថា ក្រុមឃាតករ ឬអ្នកដែលពាក់ព័ន្ធក្នុងឃាតកម្មនេះថា ពិតជាត្រូវបានទទួលទោសតាមផ្លូវច្បាប់ និងគ្មានការសូកលុយដល់មន្ត្រីអនុវត្តច្បាប់ ដើម្បីជាថ្នូរនឹងការដោះលែងក្រុមឃាតករឱ្យមានសេរីភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។