༧གོང་ས་མཆོག་གིས་བྱིས་པ་ལྟར་འཇུག་པའི་དབང་བདུན་བསྩལ་བ།

༧གོང་ས་མཆོག་གིས་རྒྱ་གར་རྡོ་རྗེ་གདན་དུ་དུས་དབང་ཐེངས་སོ་བཞི་བ་གནང་བཞིན་པ། ༢༠༡༧།༡།༡༢

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་བོད་ཟླ་༡༡་ཚེས་༡༥་ཕྱི་ཟླ་༡་ཚེས་༡༢་ཉིན་ཆོས་ཞུ་བ་ཉི་འབུམ་ལྷག་ལ་དཔལ་དུས་ཀྱི་འཁོར་ལོའི་བསྐྱེད་རིམ་ལ་དབང་བར་བྱེད་པའི་བྱིས་པ་ལྟར་འཇུག་པའི་དབང་བདུན་སྩལ་གནང་མཛད་ཡོད་པ་རེད།
གསུང་ཆོས་དབུ་འཛུགས་མ་གནང་གོང་ཉིན་སྔོན་མ་ལྟར་ཐོག་མར་པ་ལཱིའི་སྐད་ནང་གནས་བརྟན་སྡེ་པའི་དགེ་འདུན་པ་ཁག་གཅིག་ནས་བཀྲ་ཤིས་པའི་མདོ་གསུང་བཏོན་དང་། དེ་རྗེས་སོག་པོའི་དགེ་འདུན་པ་ཁག་གཅིག་ནས་སོག་སྐད་ནང་ཤེས་རབས་སྙིང་པོའི་མདོ་གསུངས་བཏོན་གནང་ཡོད་པ་རེད།
༧གོང་ས་སྐྱབས་མགོན་ཆེན་པོ་མཆོག་གིས་འདས་པའི་ཉིན་གྲངས་བསྟུད་མར་བཀའ་གནང་ཟིན་པ་ལྟར། མ་རིག་པ་ནི་དངོས་ཡོད་གནས་ཚུལ་ལ་རྒྱབ་འགལ་གྱི་ཐོག་ནས་བལྟས་ཏེ། སྲིད་པར་འཁོར་བྱེད་ཀྱི་རྒྱུ་གཙོ་བོ་ཡིན་སྟབས། སྡུག་བསྔལ་བའི་རྒྱུ་གཙོ་བོ་དེ་ཡང་ཡིན་པ་རེད་ཅེས་དང་། མ་རིག་པའི་མུན་པ་སེལ་བའི་ཐབས་གཙོ་བོ་ནི་སྟོང་པ་ཉིད་ཡིན་པས་ན། སྟོང་པ་ཉིད་ཀྱི་དོན་ལ་ཐོས་བསམ་ཡང་ཡང་བྱས་ནས། བསམ་བྱུང་སྐྱེ་བ་ཞིག་དགོས་པ་དང་། བསམ་བྱུང་ལས་སྒྲོ་འདོགས་ཡག་པོ་ཞིག་གཅོད་ཐུབ་པ་བྱས་ཏེ། སྟོང་པ་ཉིད་ལ་སྩོལ་བའི་བསྒོམ་དང་། རིམ་པས་སྩོལ་མེད་ཀྱི་ཉམས་རྟོགས་སྐྱེ་བ་ཞིག་དགོས་རྒྱུ་ཧ་ཅང་གལ་འགངས་ཆེན་པོ་ཡིན་པ་བཀའ་གནང་ཡོད་པ་རེད།
གསང་སྔགས་བླ་མེད་ཀྱི་ཆོས་ཚན་གང་འདྲ་ཞིག་ཡིན་ཡང་། དེར་བསྐྱེད་རིམ་དང་རྫོགས་རིམ་གཉིས་ཀྱི་ཉམས་ལེན་ཡོད་ཅིང་། དབང་ཞུ་བའི་དགོས་པ་གཙོ་བོ་ནི། བསྐྱེད་རྫོགས་ཀྱི་ལམ་དེ་དག་ཉམས་ལེན་བྱ་རྒྱུར་བདག་བརྒྱུད་སྨིན་བྱེད་དང་བྱེད་ཆོག་པའི་ཆོག་ཆན་ཐོབ་ཆེད་ལྟ་བུ་ཡིན་ཞིང་། དཔལ་དུས་ཀྱི་འཁོར་ལོར་ཆ་བཞག་ན། བསྐྱེད་རིམ་བསྒོམ་པ་ལ་དབང་བའི་བུམ་དབང་ལ་དབང་བདུན་དང་། རྫོགས་རིམ་བསྒོམ་པ་ལ་དབང་བའི་དབང་གོང་མ་གསུམ་དང་གོང་ཆེན་བཞི། སློབ་མ་གཙོ་བོ་སྟེ་དཔལ་དུས་ཀྱི་འཁོར་ལོའི་རྒྱུད་འཛིན་སྐྱོང་སྤེལ་གསུམ་གནང་མཁན་ཁག་གཅིག་ལ་སྩོལ་རྒྱུའི་རྡོ་རྗེ་སློབ་དཔོན་བདག་པོ་ཆེན་པོའི་དབང་བཅས་ཡོད་པ་ནས་བུམ་དབང་གི་རིམ་པ་རྣམས་དེ་རིང་ལེགས་གྲུབ་ཟིན་སྟེ། བོད་ཚེས་༡༦་ཉིན་༧གོང་ས་སྐྱབས་མགོན་ཆེན་པོ་མཆོག་གིས་གོང་མ་གོང་ཆེན་གྱི་དབང་རྣམས་དང་། དམིགས་བསལ་ད་རེས་ཆོས་ཞུ་བའི་ཁོངས་སུ་དཔལ་ས་སྐྱ་བདག་ཁྲི་རིན་པོ་ཆེ་དང་། རྒྱལ་བ་ཀརྨ་པ་རིན་པོ་ཆེ། དགའ་ལྡན་ཁྲི་ལས་ཟུར་རྣམ་པ་དང་། ཀ་ཐོག་དགེ་རྩེ་རིན་པོ་ཆེ་ལ་སོགས་པ་བོད་བརྒྱུད་ནང་བསྟན་གྱི་རིས་མེད་ཀྱི་བསྟན་བདག་དང་། བླ་ཆེན་ཁག་ཆེད་ཕེབས་ཡོད་སྟབས་རྡོ་རྗེ་སློབ་དཔོན་བདག་པོ་ཆེན་པོའི་དབང་སྩོལ་གནང་མཛད་རྒྱུ་ཡིན་པ་རེད།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གཞན་ལ་ཆོས་གསུང་གནང་མཁན་གྱི་བླ་མ་རྣམས་ནས་དངོས་ཡོད་གཞུང་ཆེན་པོའི་ནང་གི་གནད་ལུགས་ཆ་ཚང་བ་མཁྱེན་པའི་ཐོག་ནས་གཞན་ལ་འགྲེལ་བཤད་སྐྱོན་དགོས་པ་དང་། དེང་དུས་རིག་གསར་ཚན་རིག་པ་ཚོའི་འདོད་ཚུལ་ཡང་མཁྱེན་པ་གནང་རྒྱུ་ཧ་ཅང་གལ་ཆེ་ཡིན་པ་བཀའ་གནང་སྟེ། དུས་རབས་ཉི་ཤུ་རྩ་གཅིག་པའི་གནས་ལུགས་དང་མཐུན་པའི་ཐོག་ནས་སངས་རྒྱས་ཀྱི་ཆོས་ངོ་སྤྲོད་གནང་དགོས་པ་གསུངས་ཡོད་པ་རེད།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མགུལ་ཆམ་གྱི་རྐྱེན་པས་མགུལ་གློ་ཕྲན་བུ་སྐྱོན་བཞིན་འདུག་ཀྱང་། སྐུ་ངལ་འཛེམས་མེད་ཀྱིས་སྔ་ཐོག་ནས་སྒྲུབ་བཞག་ཏུ་ཆིབས་བསྒྱུར་བསྐྱངས་ཐོག་དབང་བསྐུར་ཡོངས་རྫོགས་སྩལ་གནང་མཛད་ཡོད་པ་རེད།
ཆོས་ཞུ་བའི་ཁོངས་སུ་ཡང་ཆམ་ནད་དང་གྲོད་ཁོག་བཤལ་བ་སོགས་ན་མཁན་ཇེ་མང་དུ་འགྲོ་བཞིན་ཡོད་པ་འཕྲོད་བསྟེན་ཚན་པའི་མི་སྣས་འགྲེལ་བརྗོད་བྱེད་བཞིན་འདུག།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས།