བོད་ཀྱི་ཛ་དྲག་གནས་སྟངས་ཐད་བསྒྲཌ་གཏམ།

༄༅༎ཕྱི་ཟླ་༡ཚེས་༢༨ཉིན་བོད་མི་མང་སྤྱི་འཐུས་ལྷན་ཚོགས་ནས་བོད་ནང་གི་ཛ་དྲག་གི་གནས་སྟངས་ཐད་ཡོངས་ཁྱབ་གསར་འགོད་བསྒྲགས་གཏམ་ཞིག་སྤེལ་བའི་སྐོར་ཨེ་ཤེ་ཡ་རང་དབང་རླུང་འཕྲིན་ཁང་གི་གསར་འགོད་པ་དོན་གྲུབ་རྡོ་རྗེ་ལགས་ཀྱིས་གནས་ཚུལ་ཕྱོགས་སྒྲིག་ཞུས་པར་གསན་རོགས། གཤམ་འཁོད་བོད་མི་མང་སྤྱི་འཐུས་ཀྱི་ཡོངས་ཁྱབ་གསར་འགོད་བསྒྲགས་གཏམ་གྱི་ཆ་ཤས།
ཕྱི་ལོ་ ༡༩༤༩ ལོར་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་པ་ནས་བཟུང་། རྒྱ་གཞུང་གིས་བོད་ནང་མི་སེར་སྤེལ་ཡུལ་རིང་ལུགས་པའི་སྲིད་ཇུས་རྒྱུན་མཐུད་སྤེལ་ཏེ། དྲག་ཆར་རླུང་འཚུབ་ལྟ་བུའི་ཆབ་སྲིད་ཀྱི་ལས་འགུལ་སྣ་ཚོགས་ཁྲོད། བོད་མི་ས་ཡ་གཅིག་ལྷག་དུས་མིན་རྐྱེན་འདས་སུ་གྱུར་ཡོད་པ་དང་། ཆོས་བྱེད་བསྟི་གནས་དགོན་སྡེ་དྲུག་སྟོང་ལྷག་གཏོར་བཅོམ། རང་བྱུང་གཏེར་ཁ་སྔོག་འདོན་དང་གདོད་མའི་ནགས་ཚལ་གཅོད་འབྲེག སྐམ་གཤེར་དུ་གནས་པའི་སྲོག་ཆགས་བསད་བཟུང་སོགས་སྣོད་བཅུད་གཉིས་ཀར་འཕྲོག་བཅོམ་རང་བཞིན་གྱི་གཏོར་བཤིག་བཏང་སྟེ། ཡུལ་གྱི་བདག་པོ་བོད་མི་རྣམས་རང་ཡུལ་དུ་མུ་མཐུད་འཚོ་གནས་ལ་སྒོ་ཀུན་ནས་ཉེན་ཁ་འཕྲད་པ་དང་། བོད་མི་མི་ཐོག་རིམ་བརྒྱུད་ཀྱིས་ཞི་བའི་ལམ་ནས་རེ་འདུན་འདོན་པ་དང་སྐད་འབོད་བྱེད་པའི་སྐབས་འཕྲལ་སོ་སོར་དྲག་གནོན་འབུར་འཇོམས་ཀྱི་རྩུབ་སྤྱོད་ཞེ་ཅིག་ལག་ལེན་དུ་བསྟར་རྐྱང་བྱེད་པ་དང་། ལྷག་པར་དུ་ས་བྱི་ཞི་རྒོལ་ཆེན་མོ་ནས་བཟུང་། རིག་གཞུང་རྩ་གཏོར་གྱི་སྲིད་ཇུས་ཕྱོགས་ཡོངས་ནས་མངོན་སུམ་འཛེམས་མེད་དུ་སྤེལ་བར། བོད་རིགས་གཞོན་སྐྱེས་ཚོས་བཟོད་ཐབས་བྲལ་ཏེ་རང་ལུས་ཞུགས་འབུལ་གྱི་ལམ་ནས་རང་གི་འདོད་འདུན་གསལ་སྟོན་གྱི་ལས་འགུལ་གཅིག་རྗེས་གཉིས་མཐུད་དུ་རྩོམ་དགོས་བྱུང་ཡོད།