སློབ་ཕྲུག་རྣམས་ཀྱི་རིགས་ལམ་གོ་རྟོགས་རྒྱུན་གནས་ཐུབ་ཆེད་རྒྱ་གར་ལྷོ་ཕྱོགས་སུ་རིགས་ལམ་འདུ་འཛོམས་གནང་བཞིན་འདུག

ཟླ་བ་འདིའི་ཕྱི་ཚེས་༢༨་ནས་དབུ་འཛུགས་ཀྱིས་ཕྱི་ཟླ་༩་པའི་ཚེས་༤་བར་གྱི་བདུན་ཕྲག་གཅིག་གི་རིང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་ལམ་སྟོན་ལྟར། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱིས་གོ་སྒྲིག་དང་རྒྱ་གར་ལྷོ་ཕྱོགས་སྦེ་ལ་ཀོ་པིར་ཡོད་པའི་ཆོས་སྡེ་ཆེན་པོ་བཀྲ་ཤིས་ལྷུན་པོ་དགོན་པས་འཕྱར་གྲུ་མཉམ་འདེགས་གནང་བའི་འོག་བཀྲ་ཤིས་ལྷུན་པོ་དགོན་པའི་ཆོས་རྭའི་ནང་དུ། རྒྱ་གར་ལྷོ་ཕྱོགས་སྦེ་ལ་ཀོ་པི་ལུགས་བདེ་གཞིས་ཁུངས་གཉིས་དང་། སྦེ་ལ་ཀོ་པི་བོད་ཕྲུག་ཁྱིམ་སྡེ། དེ་བཞིན་རྒྱ་གར་ལྷོ་ཕྱོགས་མོན་གྷོ་དང་ཀོ་ལེ་གྷལ་དང་ཧོན་སུར་དང་གཞན་ཡང་ཨོ་རི་ས་ཕུན་ཚོགས་གླིང་བཅས་རྒྱ་གར་ལྷོ་ཕྱོགས་ཁུལ་གྱི་གཏན་ཉིན་སློབ་གྲྭ་ཁག་གི་རིགས་ལམ་འདུ་འཛོམས་གནང་བཞིན་ཡོད་པ་དང་། དེ་ནི་བོད་རིགས་སློབ་ཕྲུག་རྣམས་ཀྱི་རིགས་ལམ་གོ་རྟོགས་རྒྱུན་གནས་ཐུབ་རྒྱུར་དམིགས་པ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་བོད་ཡིག་ཤེས་ཡོན་ཚན་པའི་འགན་འཛིན་དངོས་གྲུབ་བསྟན་པ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་བྱུང་།
ད་ལན་རིགས་ལམ་འདུ་འཛོམས་འདིའི་ནང་སློབ་གྲྭ་ཁག་བདུན་གྱི་སློབ་ཕྲུག་འཛིན་གྲྭ་དྲུག་པ་ནས་དགུ་པ་བར་ཁྱོན་བསྡོམས་སློབ་མ་༩༥་མཉམ་ཞུགས་གནང་འདུག་ལ་ད་ལན་སྔར་དང་མི་འདྲ་བར་སློབ་ཕྲུག་༣༠་ལ་གོ་སྐབས་འཕར་མ་ཐོབ་ཡོད་འདུག

ཀོ་ལེ་གྷལ་དོན་ལྡན་གླིང་སློབ་གྲྭའི་ལྟ་གྲུབ་དགེ་རྒན་བློ་བཟང་འབྱོར་རྒྱས་ལགས་ཀྱིས་གསུངས་ན། རིགས་ལམ་སློབ་སྦྱོང་བྱེད་པའི་སློབ་ཕྲུག་ཚོ་ནི་སློབ་ཕྲུག་གཞན་དང་མི་འདྲ་བར་བསམ་བློ་གཏང་ཕྱོགས་སོགས་ཀྱི་ཐད་ཁྱད་པར་ཆེན་པོ་ཡོད་པ་རེད་འདུག
བདུན་ཕྲག་གཅིག་རིང་གི་རིགས་ལམ་འདུ་འཛོམས་འདིའི་ནང་ཞོགས་པ་སློབ་གྲྭ་སོ་སོའི་སློབ་ཕྲུག་མཉམ་འཛོམས་ཀྱི་སློབ་ཕྲུག་ཚོས་ཉིན་རེ་རིགས་ལམ་གྱི་ཐད་གོ་རྟོགས་བྱུང་བ་དང་མ་བྱུང་བའི་གནད་དོན་ཁག་གི་ཐད། ལྟ་གྲུབ་དགེ་རྒན་དང་ལྷན་དུ་གོ་བསྡུར་སྦྱངས་ཤེས་བྱ་རྒྱུ་དང་རྟགས་གསལ་བཟོ་རྒྱུ། སློབ་ཕྲུག་རེ་རེ་དང་འཛིན་གྲྭ་རེ་རེ། དེ་བཞིན་སློབ་གྲྭ་དང་སློབ་གྲྭ་བྱས་ཏེ་དམ་བཅའ་ཆེན་མོ་ཚོགས་རྒྱུ་སོགས་ཀྱི་ལས་རིམ་བང་སྒྲིག་ཡོད་པ་མ་ཟད། ད་དུང་སེར་བྱེས་གྲྭ་ཚང་དང་བཀྲིས་ལྷུན་པོའི་དགེ་འདུན་པ་རྣམ་པའི་ཆོས་ར་ཚོགས་སྐབས་རྟོག་ཞིབ་ཀྱི་ཆེད་ཁྲིད་གནང་གི་ཡོད་པ་དངོས་གྲུབ་བསྟན་པ་ལགས་ཀྱིས་གསུངས་བྱུང་།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་དགོངས་དོན་གཞིར་བཟུང་གིས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས། ཕྱི་ལོ་༢༠༡༢་ལོར་བོད་པའི་སློབ་གྲྭ་ཁག་གི་རིགས་ལམ་འདུ་འཛོམས་དབུ་འཛུགས་གནང་བ་དང་། དེ་ཡང་རྒྱ་གར་ལྷོ་ཕྱོགས་ཁུལ་དང་བྱང་ཤར་ཁུལ། དེ་བཞིན་མ་སུ་རི་ཁུལ་དང་རྡ་ས་ཁུལ་བཅས་ས་ཁུལ་སོ་སོར་འདུ་འཛོམས་གནང་གི་ཡོད་པ་རེད། རིང་མིན་ཕྱི་ཟླ་༩་པའི་ཟླ་མཇུག་ཙམ་ནས་རྒྱ་གར་བྱང་ཤར་ཁུལ་དུ་རིགས་ལམ་འདུ་འཛོམས་གནང་གི་ཡོད་པ་རེད་འདུག

གསར་འགོད་པ། པདྨ་དངོས་གྲུབ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།