སྤྱི་ཚོགས་གཅིག་གྱུར་གྱི་འདུ་ཤེས་འཛིན་རྒྱུ་གལ་ཆེན་པོ་རེད།

བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཟངས་དཀར་རུ་ཆོས་འབྲེལ་གསུང་ཆོས་བསྩལ་སྐབས། རིགས་རུས་མཐོ་དམན་བརྩི་བ་དང་ཆོས་ལུགས་ཀྱི་མིང་ཐོག་ནས་ནང་ཁུལ་མི་མཐུན་པ་བྱེད་རྒྱུ་མཚམས་འཇོག་དགོས་པའི་བཀའ་སློབ་བསྩལ་འདུག།
༧གོང་ས་༧སྐྱབས་མགོན་ཆེན་པོ་མཆོག་ཟངས་དཀར་རུ་ཕྱི་ཚེས་ ༡༥ ཉིན་ཞབས་སོར་འཁོད་མ་ཐག་ཟངས་དཀར་དང་པ་འདམ་ཁུལ་ནང་པ་དང་ཁ་ཆེའི་དབར་འདས་པའི་ལོ་ཤས་གོང་ནས་མི་མཐུན་པ་བྱུང་ཞིང་། ནང་པ་ཚོས་ཁ་ཆེའི་ཚོང་ཁང་སོགས་ནས་ཉོ་ཆ་མི་རྒྱབ་པའི་བྱ་འགུལ་སྤེལ་བ་སོགས་ཀྱི་རྐྱེན་པས་ས་ཁུལ་དེ་དག་གི་ནང་པ་དང་ཁ་ཆེའི་དབར་འགལ་ཟླའི་གནས་ཚུལ་བྱུང་བཞིན་པ་གསན་ཐོས་འདུག་པས། གནས་ཚུལ་དངོས་འབྲེལ་ཡིན་ན་དེ་ནི་རྩ་བ་ནས་ཡག་པོ་མིན་པ་བཀའ་གནང་ཡོད་པ་རེད་ལ། ༧གོང་༧སྐྱབས་མགོན་ཆེན་པོ་མཆོག་གིས་སྤྱན་རས་གཟིགས་ཀྱི་བཀའ་དབང་བསྩལ་སྐབས་ནང་པ་ཚོའི་ངོས་ནས་ཆོས་ལུགས་མི་འདྲ་བའི་མིང་གི་ཐོག་ནས་ཁ་ཆེ་བ་ཚོར་འཁོན་འཛིན་གྱི་བྱ་ཐབས་བཟུང་རྒྱུ་མེད་པ་ནན་ཏན་གྱི་བཀའ་སློབ་ཕེབས་ཡོད་པ་རེད།  དེ་བཞིན་དམིགས་བསལ་ཁ་ཆེའི་འགོ་ཁྲིད་དང་ཡུལ་མི་སོགས་ཟུར་མཇལ་གྱིས་ཆོས་ལུགས་ཀྱི་མིང་ཐོག་ནས་འགལ་ཟླའི་རིགས་རྩ་བ་ནས་བྱེད་རྒྱུ་མེད་པའི་བཀའ་སློབ་གནང་པ་དང་། ༧གོང་༧སྐྱབས་མགོན་ཆེན་པོ་མཆོག་གིས་ཆོས་ལུགས་ཀྱི་དད་པ་དང་ཉམས་ལེན་ཞེས་པ་དེ་མི་སྒེར་སོ་སོ་དང་འབྲེལ་བ་ཡོད་པ་ཞིག་རེད་ཅེས་དང་།  འོན་ཀྱང་སྤྱི་ཚོགས་ནི་ཐོུང་གི་གནས་བབས་ཞིག་ཡིན་པས།  སྒེར་ཆོས་ལུགས་ཀྱི་གནས་སྟངས་ཐོག་ནས་སྤྱི་ཚོགས་ལ་གནོད་གཞིའི་རིགས་བྱེད་ན་འགྲིག་པ་བཀའ་གནང་འདུག
༧གོང་ས་༧སྐྱབས་མགོན་ཆེན་པོ་མཆོག་གི་ཟངས་དཀར་ཁུལ་གྱི་མཛད་འཆར་ཁག་གྲུབ་སྟེ། ལ་དྭགས་སླེ་རུ་ཕྱི་ཚེས་ ༡༩ ཉིན་ཞབས་སོར་འཁོད་གནང་མཛད་ཡོད་པ་དང་། ཕྱི་ཟླ་ ༧ ཚེས་ ༢༨ ནས་ ༣༠ བར་མང་ཚོགས་ལ་སྤྱོད་མཇུག་ཆེན་མོའི་སྒོ་ནས་གསུང་ཆོས་སྩོལ་གནང་མཛད་རྒྱུའི་མཛད་འཆར་ཡོད་པ་རེད།

གསར་འགོད་པ་ཚེ་དབང་ནོར་བུ།