༧གོང་ས་མཆོག་གིས་བསྟན་པ་སྤྱི་བཙན་གནད་འགག་ཆེ་བ་བཀའ་གནང་འདུག

སྤྱི་ནོར་༧གོང་ས་ཆེན་པོ་མཆོག་གིས་བོད་ནང་བསྟན་པ་སྤྱི་བཙན་གྱི་གནད་འགག་ངོས་བཟུང་རྒྱུར་ལྷོད་ཡངས་སོང་ཡོད་པ་བཀའ་གནང་འདུག
དེ་ཡང་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས། སྤྱི་ཚེས་ ༡༡ ཉིན། འཛམ་གླིང་གི་ས་ཁུལ་གང་ས་ནས་ཆེད་བཅར་ཞུས་པའི་དད་ལྡན་མང་ཚོགས་ལ་ལ་དྭགས་ལྡུམ་རའམ་ནུབ་ར་བདེ་དགོན་དགའ་ལྡན་བཀྲ་ཤིས་ཆོས་གླིང་གི་གསུང་ཆོས་རྭ་བར་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་། སློབ་དཔོན་ཀ་མ་ལ་ཤི་ལས་མཛད་པའི་སྒོམ་རིམ་བར་པའི་བཀའ་ཆོས་དབུ་འཛུགས་གནང་པ་དང་། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་སྔོན་འགྲོའི་བཀའ་ཆོས་སྐབས།  བོད་ནང་སངས་རྒྱས་ཀྱི་གསུང་གཞི་བདེན་པ་གཉིས་དང་བདེན་བཞིའི་ཆོས་ཚུལ་གཏན་ལ་ཕབ་པའི་བསྟན་པ་སྤྱི་བཙན་གྱི་གནད་འགག་ཐད་ཕྲན་བུའི་ལྷོད་ཡངས་སུ་ཕྱིན་ཡོད་པར་གཟིགས་ཀྱི་ཡོད་པ་བཀའ་གནང་འདུག
ལམ་རིམ་དང་བློ་ལྡོག་རྣམ་བཞིའི་སྐོར་དང་། དེ་བཞིན་ཡི་དམ་གྱི་དབང་བསྐུར་ཉམས་ལེན་དེ་དག་ནི་གཙོ་བོ་གང་ཟག་སྒེར་བཙན་གྱི་དབང་དུ་བྱས་པ་ལས་བསྟན་པ་སྤྱི་བཙན་ཞིག་ཆགས་ཀྱི་མེད་པ་བཀའ་གནང་ཞིང་། འོན་ཀྱང་ལོ་ངོ་བརྒྱ་ཕྲག་འགའ་ཤས་རིང་གང་ཟང་སྒེར་བཙན་གཙོ་བོ་གནང་པའི་ཕྱག་རྒྱུན་དེས་མི་མང་པོ་ཞིག་ལ་ཕན་ཐོགས་ཆེན་པོ་བྱུང་ཡོད་ན་ཡང་། བཀའ་འགྱུར་དང་བསྟན་འགྱུར་པོ་ཏི་གསུམ་བརྒྱ་ལྷག་ཡོད་པ་དེ་དག་གི་ནང་དོན་ཧ་ལས་པའི་གཟབ་ཁྱད་ཡོད་པ་དེ་དག་ཆེས་འཁྲུག་ཆ་དོད་པའི་དུས་རབས་ཉི་ཤུ་རྩ་གཅིག་པའི་འཛམ་གླིང་གི་གནས་དུས་འདིར། བསྟན་པ་སྤྱི་བཙན་གྱི་རྣམ་པའི་ཐོག་ནས་སྡོམ་རྒྱབ་ཐུབ་པ་ཞིག་དགོས་རྒྱུ་གལ་ཆེན་པོ་ཡིན་པ་བཀའ་གནང་ཡོད་པ་རེད།
དཔེར་ན། སངས་རྒྱས་བཅོམ་ལྡན་འདས་ཀྱིས་བདེན་བཞི་དང་ཤེར་ཕྱིན་གྱི་མདོ་དེ་དག་གསུངས་ཡུལ་གྱི་འཁོར་རྒྱ་ཆེན་པོ་ཡོད་པ་དེས། བསྟན་པ་སྤྱི་མཚན་གྱི་དབང་དུ་བྱས་ནས་གསུངས་པ་མཚོན་ཐུབ་ལ། དེ་བཞིན་དེ་སྔ་བོད་ཀྱི་རིས་མེད་ཀྱི་བཤད་གྲྭ་ཆེན་མོ་དེ་དག་གི་ནང་ལ་ཡང་བསྟན་པ་སྤྱིའི་རྣམ་བཞག་གཏན་ལ་ཕབ་པའི་ཕྱག་སྲོལ་ཞིག་ཡོད་ཀྱང་། རིམ་པས་གང་ཟག་སྒེར་མཚན་གྱི་རང་བཞིན་ཤུགས་ཆེ་རུ་སོང་སྟེ། ལུང་པ་རེ་ལ་བླ་མ་རེ། བླ་མ་རེ་ལ་ཆོས་ལུགས་རེ་ཟེར་བ་ལྟ་བུ་ཆགས་ཏེ། ཕྱི་ཕྱོགས་ནས་བོད་བརྒྱུད་ནང་བསྟན་དེ་བླ་མའི་རིང་ལུགས་ཟེར་བ་ཞིག་ཏུ་ངོས་འཛིན་བྱེད་པ་ཆགས་པ་དེ་འདྲ་མི་ཡོང་བ་བྱ་དགོས་པའི་བཀའ་སློབ་ཕེབས་ཡོད་པ་རེད།

གསར་འགོད་པ་འགན་འཛིན་གཞོན་པ་སྐལ་ལྡན་བློ་གྲོས་དང་། ཀེ་ཐོ།