ཧོང་ཀོང་ཉེན་རྟོག་པས་ཉེན་གཡོལ་བྱས་བསྡད་ཡོད་པའི་དམངས་གཙོ་དོན་གཉེར་བ་བརྒྱད་འཛིན་བཟུང་བྱེད་རྒྱུ་ཡིན་ཚུལ་བསྒྲགས་འདུག

དེ་ཡང་ཧོང་ཀོང་ནས་(Reuters)་གསར་ལས་ཁང་གིས་གནས་ཚུལ་སྤེལ་བར་གཞིགས་ན། འདི་ཚེས་༣རེས་གཟའ་ཟླ་བ་ཉིན་ཧོང་ཀོང་གི་ཉེན་རྟོག་པས་ཕྱི་རྒྱལ་ཡུལ་གྲུ་ཁག་ནང་ཉེན་གཡོལ་བྱས་བསྡད་ཡོད་པའི་ཧོང་ཀོང་གི་དམངས་གཙོ་དོན་གཉེར་བ་བརྒྱད་ཀྱིས། ཕྱིའི་རྒྱལ་ཁབ་ཁག་དང་ངན་པ་ལག་འབྲེལ་བྱས་ནས་རྒྱལ་ཁབ་གྱི་བདེ་འཇགས་ལ་ཉེན་ཚབས་ཆེན་པོ་བཟོ་བཞིན་ཡོད་པའི་ཉེས་འཛུགས་བྱས་སྟེ། མི་སྣ་དེ་དག་གི་གནས་ཚུལ་མཁོ་སྤྲོད་དང་འཛིན་བཟུང་བྱེད་ཕྱོགས་སོགས་ཀྱི་ཐད་མཐུན་འགྱུར་བྱས་བ་ཡིན་ན་མི་རེར་བྱ་དགའ་ཨ་སྒོར་འབུམ་གཅིག་ལྷག་སྤྲོད་རྒྱུ་ཡིན་པའི་གསལ་བསྒྲགས་བྱས་འདུག
མི་དེ་རྣམས་ནི་ཧོང་ཀོང་གི་དམངས་གཙོ་དོན་གཉེར་བ་(Nathan Law)་དང་། (Anna Kwok) ཧོང་ཀོང་གྲོས་ཚོགས་ཀྱི་འཐུས་མི་ཟུར་པ་(Dennis Kwok)་དང་། (Ted Hui) དེ་བཞིན་ཁྲིམས་རྩོད་པ་(Kevin Yam)་བཅས་ཡིན་པ་ཉེན་རྟོག་པས་གསར་འགོད་ལྷན་ཚོགས་ཐོག་བརྗོད་འདུག
ཡང་གནས་ཚུལ་ནང་མུ་མཐུད་དུ་བཀོད་པར་གཞིགས་ན། དམངས་གཙོ་དོན་གཉེར་བ་དེ་དག་ཨ་མི་རི་ཀ་དང་། དབྱིན་ཡུལ། ཨོསི་ཊརེ་ལི་ཡ་(Australia)་ལ་སོགས་པའི་རྒྱལ་ཁབ་ཁག་ནང་ཉེན་གཡོལ་ཕྱིན་ཡོད་པ་གསལ་སྟོན་བྱས་ཡོད་པ་དང་། (Reuters)་གསར་ལས་ཁང་གི་གསར་འགོད་པས་གནད་དོན་དེའི་སྐོར་འབྲེལ་ཡོད་ཁག་ལ་འབྲེལ་བ་ཞུས་ཡོད་ཀྱང་འབྲེལ་ལམ་མཐུད་ཐུབ་མི་འདུག
སྤྱི་ལོ་༢༠༢༠ལོར་རྒྱ་གཞུང་གིས་ཧོང་ཀོང་ནང་རྒྱལ་ཁབ་ཀྱི་བདེ་འཇགས་སྲུང་སྐྱོབ་ཀྱི་ཁྲིམས་གཞི་ལག་བསྟར་བྱས་པའི་རྗེས། ཧོང་ཀོང་ཉེན་རྟོག་པས་ཧོང་ཀོང་གྱི་དམངས་གཙོ་དོན་གཉེར་བ་མི་གྲངས་༢༦༠ལྷག་ཙམ་ཞིག་འཛིན་བཟུང་བྱས་ཡོད་པ་དང་། དེ་ཚོའི་ནང་ནས་མི་གྲངས་༧༩རྒྱལ་ཁབ་མགོ་རྟིང་སློག་མཁན་དང་། དྲག་སྤྱོད་རིང་ལུགས་པའི་ནག་ཉེས་བཙུགས་ནས་འཛིན་བཟུང་བཙོན་འཇུག་བྱས་ཡོད་ལུགས་ཧོང་ཀོང་ས་གནས་ཉེན་རྟོག་པས་གསར་འགོད་ལྷན་ཚོགས་ཐོག་གསལ་སྟོན་བྱས་འདུག།

གསར་འགོད་པ། དབྱངས་སྒྲོན།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།