ཨ་རིས་བོད་ནང་གི་ཆོས་དད་གནས་བབ་སྡུག་པོ་ཡོད་པ་གླེང་ནས་རྒྱ་ནག་ལ་སྐྱོན་བརྗོད་བྱས་འདུག

ཨ་རིའི་ཆོས་དད་རང་དབང་དར་སྤེལ་ཆེད་ཀྱི་ཆེས་མཐོའི་ལྷན་ཚོགས་ཐེངས་གཉིས་པའི་ཉིན་མཐའ་མའི་ཚོགས་ར། ༢༠༡༩།༧།༡༨

ཨ་མི་རི་ཀའི་སྲིད་འཛིན་གཞོན་པས་རྒྱ་ནག་གཞུང་གིས་བོད་ནང་དུ་ཆོས་དད་རང་དབང་ལ་རྡོག་རོལ་གཏོང་བཞིན་པ་དང་པཎ་ཆེན་རིན་པོ་ཆེའི་གནས་སྟངས་སྐོར་གླེང་ནས་རྒྱ་ནག་གཞུང་ལ་སྐྱོན་བརྗོད་གནང་འདུག
དེ་ཡང་ཨ་རིའི་ཕྱི་སྲིད་ལས་ཁུངས་ཀྱིས་འདུ་བསྐོང་གནང་པའི་ཆོས་དད་རང་དབང་དར་སྤེལ་ཆེད་ཀྱི་ཆེས་མཐོའི་ལྷན་ཚོགས་ཐེངས་གཉིས་པའི་ཉིན་མཐའ་མ་སྟེ་སྤྱི་ཚེས་༡༨་ཉིན། ཨ་རིའི་སྲིད་འཛིན་གཞོན་པ་སྐུ་ཞབས་(Mike Pence)་མཆོག་གིས་འཛམ་གླིང་ནང་གི་ཆོས་དད་རང་དབང་གྱི་གནས་བབ་ཐད་གསུངས་སྐབས། རྒྱ་ནག་གཞུང་གིས་སྡུག་སྦྱོང་གཏོང་ཡུལ་གྱི་ཆོས་ལུགས་དང་། ཡུལ་ལུང་། སྡེ་ཚན་ཁག་རེ་རེ་བཞིན་གསལ་བཏོན་གྱིས་གསུངས་སྐབས། དང་ཐོག་བོད་ནང་དུ་༡༩༩༥་ནས་བཟུང་ད་བར་ཆོས་དད་རང་དབང་གི་གནས་སྟངས་སྐྱོ་བོ་ཡོད་པ་དང་། ལྷག་པར་ཀུན་གཟིགས་པཎ་ཆེན་རིན་པོ་ཆེ་མཆོག་གི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་སྐུ་འཁོར་དང་བཅས་པ་འཛིན་བཟུང་བཙན་ཁྲིད་བྱས་ནས་ད་ཆ་གར་སོང་ཆ་མེད་གྱུར་ནས་ལོ་ ༢༤ ་སོང་བ་གསུངས་ཤིང་། ཨ་མི་རི་ཀའི་ངོས་ནས་རྒྱ་ནག་མཉམ་དུ་ཚོང་དོན་གྱི་གྲོས་མོལ་གང་འདྲ་ཞིག་གནང་ཡང་། རྒྱ་ནག་ནང་གི་ཆོས་དད་པ་ཚང་མའི་དཀའ་སྡུག་མཉམ་དུ་གླེང་རྒྱུ་ཡིན་པའི་ཁས་ལེན་ཡང་གནང་སོང་།
དེ་བཞིན་ཨ་རིའི་ཕྱི་སྲིད་ལས་ཁུངས་ཀྱིས་འདུ་བསྐོང་གནང་བའི་ཆོས་དད་རང་དབང་དར་སྤེལ་ཆེད་ཀྱི་ཆེས་མཐོའི་ལྷན་ཚོགས་ཐེངས་གཉིས་པའི་ཐོག་བཅར་མཁན་གྱི་རྒྱལ་ཁབ་ཁག་གི་གཞུང་འཛིན་མི་སྣར། རྒྱ་ནག་གཞུང་གིས་གནོན་ཤུགས་སྤྲད་ནས་འགོག་རྐྱེན་སྤྲད་ཐབས་བྱེད་ཡོད་པ་དེར་ཨ་རིའི་ཕྱི་སྲིད་དྲུང་ཆེ་(Mike Pompeo)་མཆོག་གིས་སྐྱོན་བརྗོད་གནང་བ་དང་སྦྲགས། རྒྱ་ནག་གཞུང་གི་གནོན་ཤུགས་ལ་མ་བརྩིས་པར་ད་རེས་ཚོགས་འདུའི་ཐོག་ལ་ཕེབས་ཞུགས་གནང་མཁན་ཡོངས་ལ་ལེགས་བསུའི་བསྔགས་བརྗོད་དང་གུས་བརྩི། དོ་སྣང་ཆེན་པོ་ཡོད་ཅེས་གསུངས་ཡོད་པ་རེད།
ཨ་རིའི་ཕྱི་སྲིད་དྲུང་ཆེ་(Mike Pompeo)་མཆོག་གིས་ད་དུང་། རྒྱ་ནག་དམར་ཤོག་གཞུང་འཛིན་གྱི་ངོས་ནས་རྒྱ་ནག་མི་མང་གི་ཚེ་སྲོག་དང་སེམས་ཁམས་ཡན་ལ་སྟངས་འཛིན་བྱེད་བཞིན་པར་སྐྱོན་བརྗོད་གནང་ཞིང་། རྒྱ་ནག་གཞུང་གི་སྟངས་འཛིན་འོག་ཆོས་དད་མི་སྣ་སྡུག་སྦྱོང་མྱོང་མཁན་ཡོངས་ལ་གདུང་སེམས་མཉམ་སྐྱེས་ཡོད་པ་ནན་བརྗོད་གནང་སོང་།
ལྷན་ཚོགས་ཐོག་ལ་རྒྱ་ནག་གཞུང་གི་སྡུག་རྩུབ་འོག་དགོངས་པ་རྫོགས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པའི་ཚ་མོ་ཉི་མ་ལྷ་མོ་ལགས་ཀྱིས། བོད་ནང་གི་ཆོས་དད་རང་དབང་གི་གནས་སྟངས་སྐྱོ་པོ་ཡོད་པ་དང་། ༧གོང་ས་༧སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་པཎ་ཆེན་རིན་པོ་ཆེ་གར་ཡོད་ཙམ་ཡང་ཤེས་རྟོགས་མེད་པ་སོགས་གླེང་སློང་གནང་ཞིང་། རེས་གཟའ་ལྷག་པའི་ཉིན་ཨ་རིའི་ཕོ་བྲང་དཀར་པོའི་ནང་ཨ་རིའི་སྲིད་འཛིན་མཆོག་དང་མཇལ་འཕྲད་སྐབས་བོད་ནང་གི་བོད་མི་ཚོར་རྒྱབ་སྐྱོར་དགོས་པ་དང་། ༧གོང་ས་མཆོག་བོད་ནང་དུ་ཆིབས་བསྒྱུར་གནང་ཐུབ་པར་རྒྱབ་སྐྱོར་གནང་རོགས་ཞེས་ཞུས་ཡོད་པ་ལྟར། ད་ཐེངས་བོད་ནང་གི་བོད་མིའི་མངོན་འདོད་ཞུ་སྐུལ་བྱེད་ས་བྱུང་བར་བློ་ཡིད་ཚིམ་པོ་བྱུང་ཞེས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།
ད་ཐེངས་ཀྱི་ལྷན་ཚོགས་ཉིན་གསུམ་པར་འཛམ་གླིང་གི་ཡུལ་གྲུ་གང་ས་ནས་རྒྱལ་ཁབ་འདྲ་མིན་གྱི་ཕྱི་སྲིད་བློན་ཆེན་༣༠་ཙམ་དང་། དེ་མིན་གྱི་ཆེས་མཐོའི་དཔོན་རིགས་བརྒྱ་ཕྲག་དང་ཆོས་དད་རང་དབང་དང་འབྲེལ་ནས་སྡུག་སྦྱོང་ཕོག་མཁན་ཆོས་ལུགས་འདྲ་མིན་གྱི་མི་སྣ་བཅས་མི་གྲངས་ལྔ་བརྒྱ་ལྷག་མཉམ་ཞུགས་གནང་ཡོད་པ་རེད།