ཨ་རིས་ཐེ་ཝན་བློས་གཏོང་མི་བྱེད་རྒྱུའི་ཆོད་སེམས་བརྟན་པོ་ཡོད་པ་ནན་བརྗོད་གནང་འདུག

2022.08.03
ཨ་རིས་ཐེ་ཝན་བློས་གཏོང་མི་བྱེད་རྒྱུའི་ཆོད་སེམས་བརྟན་པོ་ཡོད་པ་ནན་བརྗོད་གནང་འདུག ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པེ་ལོ་སི་(Nancy Pelosi)་མཆོག་དང་ཐེ་ཝན་གྱི་སྲིད་འཛིན་ལྕམ་(Tsai Ing-Wen)་གཉིས་མཇལ་མོལ་སྐབས། ༠༨།༠༣།༢༠༢༢
@Taiwan's Presidential Office
  • ཨ་རིའི་གྲོས་ཚོགས་ཀྱི་ཚོགས་གཙོ་ཐེ་ཝན་ནས་ཕེབས་ཐོན་ཟིན་འདུག
  • ལྕམ་ནེན་སི་པེ་ལོ་སི་ཡིས་ཨ་རིས་ཐེ་ཝན་བློས་གཏོང་མི་བྱེད་པའི་ཆོད་སེམས་བརྟན་པོ་ཡོད་པ་ནན་བརྗོད་གནང་ཡོད་པ་རེད།

ལོ་ངོ་ཉི་ཤུ་རྩ་ལྔའི་རྗེས་ཐེ་ཝན་ནང་འཚམས་གཟིགས་ཕེབས་མཁན་ཨ་རིའི་དཔོན་རིགས་མཐོ་ཤོས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པེ་ལོ་སི་(Nancy Pelosi)་མཆོག་གཟའ་ལྷག་པའི་ཉིན། ཐེ་ཝན་གྱི་སྲིད་འཛིན་ལྕམ་(Tsai Ing-Wen)་དང་ཐེ་ཝན་གྲོས་ཚོགས་ཀྱི་འཐུས་མི་སོགས་དང་མཇལ་འཕྲད་འགྲུབ་རྗེས་གཟའ་ལྷག་པའི་ཕྱི་དྲོ་ཐེ་ཝན་ནས་ཕེབས་ཐོན་གནང་ཡོད་པ་རེད།
ཁོང་གི་ཐེ་ཝན་དུ་འཚམས་གཟིགས་ཀྱི་གནད་དོན་དེར་རྒྱ་ནག་གཞུང་གིས་མུ་མཐུད་དུ་ཁོང་ཁྲོའི་རྣམ་འགྱུར་ཤུགས་ཆེན་སྟོན་བཞིན་འདུག་ལ། ཐེ་ཝན་གྱི་ཕྱོགས་སུ་དམིགས་སྟེ་མེ་ཤུགས་འཕུར་མདེལ་ངོ་མ་བེད་སྤྱོད་ཀྱི་དམག་སྦྱོང་ཤུགས་ཆེ་བྱེད་བཞིན་ཡོད་པ་རེད།
ཕྱི་ཟླ་༨ཚེས་༣གཟའ་ལྷག་པའི་སྔ་དྲོ། ཐེ་ཝན་གྱི་སྲིད་འཛིན་ལས་ཁུངས་ནང་། ལྕམ་ནེན་སི་པེ་ལོ་སི་མཆོག་དང་ཐེ་ཝན་གྱི་སྲིད་འཛིན་ཚཡི་ཡིང་ཝན་(Tsai Ing-Wen)་རྣམ་གཉིས་མཇལ་འཕྲད་གནང་ཞིང་། ཨ་རིའི་གྲོས་ཚོགས་ཀྱི་ཚོགས་གཙོས་ལོ་ངོ་བཞི་བཅུའི་སྔོན། ཨ་རིས་ཐེ་ཝན་དང་དུས་རྟག་ཏུ་མཉམ་དུ་ལངས་རྒྱུའི་ཁས་ལེན་བྱས་ཡོད་པ་ལྟར། དེ་རིང་ང་ཚོའི་སྐུ་ཚབ་ཚོགས་པ་ཐེ་ཝན་དུ་ཡོང་བ་འདི་ཡང་ང་ཚོའི་ངོས་ནས་ཐེ་ཝན་བློས་གཏོང་མི་བྱེད་པའི་ཆོད་སེམས་བརྟན་པོ་ཡོད་པ་དེ་གསལ་སྟོན་བྱེད་ཆེད་ཡིན་པ་གསུངས་འདུག

US House Speaker Nancy taiwan1.jpg
སྐབས་དེར་ཐེ་ཝན་གྱི་སྲིད་འཛིན་ལྕམ་(Tsai Ing-Wen)་གྱིས། འདི་ལོ་ར་ཤེ་ཡས་ཡུཀ་རེན་(Ukraine)་ལ་བཙན་འཛུལ་བྱས་རྗེས། ཐེ་ཝན་གྱི་བདེ་འཇགས་དེ་འཛམ་གླིང་སྤྱི་ཡོངས་ཀྱིས་དོ་སྣང་བྱ་ཡུལ་དུ་གྱུར་ཡོད་ཅེས་དང་། གལ་ཏེ། ཐེ་ཝན་ལ་གཞན་གྱིས་བཙན་འཛུལ་བྱས་པའི་གནས་ཚུལ་ཞིག་བྱུང་ཚེ། ཞི་བདེ་རྒྱ་མཚོའི་མངའ་ཁུལ་དུ་གནོད་སྐྱོན་ཚབས་ཆེན་ཕོག་ངེས་པ་ཡིན་པ་གསུངས་པ་དང་། རྒྱ་ནག་གཞུང་གིས་དམག་གི་འཇིགས་སྐུལ་བྱེད་བཞིན་པར་ང་ཚོ་དུས་ནམ་ཡང་ཞུམ་རྒྱུ་མིན་ལ། ང་ཚོས་མུ་མཐུད་དུ་ཐེ་ཝན་གྱི་བདག་དབང་དང་མང་གཙོ་སོགས་སྲུང་སྐྱོབ་བྱེད་རྒྱུའི་ཆོད་སེམས་བརྟན་པོ་ཡོད་ཅེས་གསུངས་འདུག
ད་དུང་ཐེ་ཝན་ལ་འཕྲད་བཞིན་པའི་གཉན་ཕྲང་གི་དུས་འདིར་ཐེ་ཝན་ལ་རྒྱབ་སྐྱོར་མཚོན་ཆེད་ཨ་རིའི་གྲོས་ཚོགས་ཀྱི་ཚོགས་གཙོ་དབུས་པའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཕེབས་པ་རྣམ་པར་ཐུགས་རྗེ་ཆེ་ཞེས་གསུངས་ཡོད་པ་རེད།

US House Speaker Nancy taiwan2.jpg
ཡང་ཐེ་ཝན་གྱི་སྲིད་འཛིན་དང་ཨ་རིའི་གྲོས་ཚོགས་འོག་མའི་ཚོགས་གཙོའི་མཇལ་འཕྲད་དེའི་སྐབས། ལྕམ་པེ་ལོ་སི་མཆོག་གིས། ཐེ་ཝན་ནི་འཛམ་གླིང་ནང་རང་དབང་ཆེ་ཤོས་གྲས་ཀྱི་སྤྱི་ཚོགས་ཤིག་ཡིན་པ་མ་ཟད། འཛམ་གླིང་ནང་མིག་དཔེ་འོས་པ་ཞིག་ཡིན་པ་གསུངས་ཤིང་། ཁོང་གིས་ཐེ་ཝན་མི་མང་ནས་རང་ཉིད་ཀྱི་མངོན་འདོད་དང་། རེ་བ། སྙིང་སྟོབས་བཅས་འཛམ་གླིང་ལ་སྟོན་ཐུབ་པ་བྱུང་ཡོད་ཅེས་དང་། ད་ལྟའི་དུས་འདིར་ཨ་མི་རི་ཀས་ཐེ་ཝན་ལ་གདུང་སེམས་མཉམ་བསྐྱེད་བྱ་རྒྱུ་ནི་འགག་རྩ་ཅན་དུ་གྱུར་ཡོད། དེང་གི་འཛམ་གླིང་ནང་མང་གཙོ་དང་གཅིག་སྡུད་རིང་ལུགས་བར་འདམ་ཁའི་གདོང་ཐུག་འབྱུང་བཞིན་པའི་དུས་འདིར། ཨ་མི་རི་ཀས། ཐེ་ཝན་ནང་མང་གཙོའི་ལམ་ལུགས་རྒྱུན་འཁྱོངས་ཡོང་ཆེད་ཆོད་སེམས་བརྟན་པོས་རྒྱབ་སྐྱོར་ཞུ་རྒྱུ་ཙམ་མ་ཟད། མཉམ་རུབ་ཀྱིས་ཐེ་ཝན་གྱི་བདེ་འཇགས་ཐོག་ཕྱག་ལས་གནང་རྒྱུ་ཡིན་པ་བརྗོད་འདུག

US House Speaker Nancy taiwan1.jpg
ཐེ་ཝན་གྱི་(National Dong Hwa University)་གཙུག་ལག་སློབ་ཆེན་གྱི་སློབ་དཔོན་དང་ཐེ་ཝན་དུ་གནས་བཞུགས་ཐེ་ཝན་ཀྱི་ཕྱི་འབྲེལ་ཐོག་ཉམས་ཞིབ་གནང་མཁན་(Suzsa Anna Ferenczy)་ལགས་ཀྱིས། ལྕམ་(Pelosi)་ཐེངས་འདིར་ཐེ་ཝན་དུ་ཕེབས་འབྱོར་བྱུང་བ་དེས། རྒྱལ་སྤྱིའི་སྟེང་ཐེ་ཝན་ལ་ལྟ་ཕྱོགས་ཐད་ཤུགས་རྐྱེན་ཆེན་པོ་སྤྲད་ཡོད་པ་མ་ཟད། དེ་སྔོན་༢༠༢༡ལོར་ཡོ་རོབ་གྲོས་ཚོགས་ཀྱི་སྐུ་ཚབ་ཚོགས་ཆུང་ཐེ་ཝན་དུ་གཟིགས་སྐོར་ཕེབས་པ་དེས་ཡོ་རོབ་ཁུལ་དུ་ཐེ་ཝན་གྱི་གནད་དོན་ཐད་དམིགས་བསལ་དོ་སྣང་བྱེད་ཡུལ་ཞིག་ཏུ་གྱུར་ཡོད། ལྷག་པར་ཐེ་ཝན་དེ་བཞིན་མཉམ་འབྲེལ་རྒྱལ་ཚོགས་ཀྱི་ཚོགས་མིའི་ཁོངས་སུ་ཞུགས་ཐུབ་པའི་ནུས་པ་དང་གྲ་སྒྲིག་ཡོད་པ་འཛམ་གླིང་མི་མང་ནས་མཁྱེན་གསལ་རེད། འོན་ཀྱང་། ང་ཚོས་དངོས་ཡོད་གནས་ཚུལ་མཁྱེན་དགོས་པ་ཞིག་ནི། རྒྱ་ནག་གིས་ཞི་བདེའི་རྒྱ་མཚོའི་མངའ་ཁུངས་དང་ཁྱིམ་མཚེས་ས་ཁུལ་ཁག་ཏུ་སོ་སོའི་ལྟ་སྤྱོད་དང་མཐུན་པའི་བྱ་སྤྱོད་རིགས་སྤེལ་མུས་ཡིན་པ་དེས། ཐེ་ཝན་གྱི་ཞི་བདེ་དང་བདེ་འཇགས་ལ་ཤུགས་རྐྱེན་སྤྲོད་ངེས་ཡིན་ཞེས་འགྲེལ་བརྗོད་གནང་བྱུང་། ཁོང་གིས་དེ་སྔོན་ཡོ་རོབ་གྲོས་ཚོགས་ཀྱི་ཆབ་སྲིད་སློབ་སྟོན་པའི་ཐུགས་འགན་ཡང་བཞེས་མྱོང་ཡོད་པ་རེད། ཁོང་མོས་མུ་མཐུད་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུངས་ན། འཛམ་གླིང་གི་ཡུལ་གྲུ་གཞན་ལྟར། ཐེ་ཝན་མི་མང་ལ་ཡང་ཞི་བདེ་དང་བདེ་འཇགས་དགོས་ཀྱི་ཡོད། དེར་བརྟེན། ད་ལྟའི་གནད་དོན་དེའི་དབང་གིས་ཨ་རི་དང་རྒྱ་ནག་གཉིས་བར་དམག་རྒྱག་གི་རེད་བསམ་གྱི་མི་འདུག་ལ། རྒྱག་མི་སྲིད་པ་ཞིག་རེད། དམག་འཁྲུག་ཟེར་བ་དེ་ཐེ་ཝན་མང་ཚོགས་ལ་དེ་བས་འདོད་པ་མེད། འོན་ཀྱང་། རྒྱ་ནག་གི་ཕྱོགས་ནས་དམིགས་ཀར་དཔལ་འབྱོིར་གྱི་སྟོབས་ཤུགས་དང་ཐབས་བྱུས་འདྲ་མིན་བརྒྱུད་ནས་ཐེ་ཝན་ལ་མུ་མཐུད་དུ་གནོན་ཤུགས་སྤྲོད་སྲིད་པ་ཞིག་རེད། མདོར་ན། ཨ་རི་དང་རྒྱ་ནག་གཉིས་ཀྱིས་གྲོས་མོལ་གྱི་ལམ་ནས་གནད་དོན་དེ་ཐག་གཅོད་ཡོང་བའི་རེ་བ་བྱེད་ཀྱི་ཡོད་ཅེས་འགྲེལ་བརྗོད་གནང་བྱུང་།
རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་ནག་ཉམས་ཞིབ་ལྟེ་གནས་ཁང་གི་གཙོ་འཛིན་སྐུ་ཞབས་(Jayadeva Ranade)་ལགས་ཀྱིས། ལྕམ་(Nancy Pelosi)་ཐེ་ཝན་དུ་འཚམས་གཟིགས་གནང་བ་དེ་རྣོ་ངར་ཅན་བཟོ་མཁན་རྒྱ་ནག་གཞུང་ཡིན་པ་མ་ཟད། ཐེ་ཝན་དང་རྒྱ་ནག་སྐམ་ས་ཆེན་པོ་བར་གྱི་མཚོའི་ཁུལ་དུ་རྒྱ་ནག་གི་དམག་མིའི་གྲངས་འབོར་ཇེ་མང་དུ་བཏང་སྟེ། དམག་སྦྱོང་བྱེད་ཤུགས་ཆེ་རུ་བཏང་ཡོད། རྒྱ་ནག་གིས་རྒྱུན་དུ་རྒྱ་ནག་གཅིག་གི་སྲིད་བྱུས་ལ་འགྲེལ་བཤད་རྒྱག་ཕྱོགས་དང་། ཨ་རིས་དེ་ངོས་འཛིན་བྱེད་ཕྱོགས་གཉིས་བར་ཧེ་བག་ཆེན་པོ་ཡོད་པ་མ་ཟད། ད་རེས་ཨ་མི་རི་ཀའི་གྲོས་ཚོགས་འོག་མའི་ཚོགས་གཙོ་ཐེ་ཝན་དུ་མཚམས་གཟིགས་སུ་ཕེབས་པ་དེས། ཨ་རིའི་ཕྱོགས་ནས་ཐེ་ཝན་དེ་བཞིན་རང་བཙན་གྱི་ངོ་བོར་གནས་པའི་ས་ཁུལ་ཞིག་ལ་ངོས་འཛིན་བྱེད་ཀྱི་ཡོད་པ་རྒྱ་ནག་ལ་བརྡ་ལན་སྤྲོད་ཡོད་ཅེས་འགྲེལ་བརྗོད་གནང་བྱུང་།
རྒྱ་ནག་ཉམས་ཞིབ་ལྟེ་གནས་ཁང་གི་གཙོ་འཛིན་སྐུ་ཞབས་(Jayadeva Ranade)་ལགས་ཀྱིས། ཤར་ཨེ་ཤེ་ཡ་དང་རྒྱ་དཀར་ནག་གཉིས། དེ་བཞིན་བོད་བཅས་ཀྱི་འབྲེལ་ལམ་ཐབས་བྱུས་སྐོར་ལོ་ངོ་༤༠ལྷག་རིང་ཉམས་ཞིབ་གནང་སྟེ། ད་བར་དེ་འབྲེལ་གནད་དོན་སྐོར་དཔེ་དེབ་འགའ་ཞིག་བརྩམས་འདུག་པའི་ཁྲོད། དཔེ་དབེ་གསར་ཤོས་ཤིག་ནི་(Xi Jinping: China’s Third New Era)་ཞི་ཅིན་ཕིང་གི་སྣེ་ཁྲིད་པའི་རྒྱ་ནག་གི་དུས་སྐབས་གསུམ་པ་ཟེར་བ་དེ་ཡིན་པ་རེད་། ཁོང་གིས་མུ་མཐུད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་ན། ད་རེས་ལྕམ་(Pelosi)་ཐེ་ཝན་དུ་དངོས་སུ་གཟིགས་སྐོར་དུ་ཕེབས་པ་དེའི་རྐྱེན་པས་འཛམ་གླིང་ནང་མང་གཙོ་དང་རང་དབང་། དྲང་བདེན། དེ་བཞིན་གུ་ཡངས་ཀྱི་བསམ་བློ་བཅས་ལ་དགའ་ཞེན་ཆེ་བའི་མི་སྣ་ཚོར་ཞི་ལྷོད་ཀྱི་ཁོར་ཡུག་ཤིག་ཀྱང་བསྐྲུན་ཡོད་ཅེས་འགྲེལ་བརྗོད་གནང་གི་འདུག

US House Speaker Nancy taiwan1.jpg
སྤྱིར་བཏང་ཨ་མི་རི་ཀ་དང་ཐེ་ཝན་བར་གཞུང་འབྲེལ་གྱི་འབྲེལ་ལམ་མེད་པར་མ་ཟད། རྒྱ་ནག་མི་དམངས་སྤྱི་མཐུན་རྒྱལ་ཁབ་འདི་རྒྱ་ནག་གི་སྐུ་ཚབ་ངོ་མར་གཞུང་འབྲེལ་གྱིས་ངོས་ལེན་བྱེད་བཞིན་ཡོད་པ་རེད། འོན་ཀྱང་ཨ་རི་དང་ཐེ་ཝན་བར་དཔལ་འབྱོར་དང་ཚོང་ལས། རིག་གཞུང་སོགས་གཞི་ཡུལ་མི་འདྲ་བའི་བར་འབྲེལ་ལམ་ཤུགས་ཆེ་ཡོད་མུས་མ་ཟད། ཐེ་ཝན་སྲུང་སྐྱོབ་ཆེད་ཨ་མི་རི་ཀས་ཐེ་ཝན་ལ་གོ་མཚོན་མུ་མཐུད་དུ་ཚོང་བསྒྱུར་བྱེད་བཞིན་ཡོད་པ་རེད།
ལྕམ་ནེན་སི་པེ་ལོ་སི་ཐེ་ཝན་དུ་ཕེབས་རྒྱུའི་ཐད་རྒྱ་ནག་གཞུང་གིས་ངོ་རྒོལ་ཤུགས་ཆེ་བྱས་པ་ཙམ་མ་ཟད། ཨ་རིའི་སྲིད་འཛིན་འཇོ་སྦཡེ་ཌན་དང་ཞི་ཅིན་ཕིང་གཉིས་དྲ་ལམ་བརྒྱུད་མཇལ་མོལ་སྐབས། རྒྱ་ནག་གི་སྲིད་འཛིན་གྱིས། མེ་དང་གཏུག་ན་རང་ཉིད་ཤུལ་མེད་དུ་འགྲོ་རྒྱུ་ཡིན་པ་དེ་ཤེས་དགོས་ཀྱི་རེད་ཅེས་འཇིགས་སྐུལ་བྱས་ཡོད་ལ། དེ་བཞིན་རྒྱ་ནག་མི་དམངས་བཅིངས་གྲོལ་དམག་གི་དམག་དཔོན་ཁག་གིས་ཨ་རིའི་གྲོས་ཚོགས་ཀྱི་ཚོགས་གཙོ་ཐེ་ཝན་དུ་ཕེབས་ཚེ་དྲག་པོའི་རྒོལ་རྡུང་གཏོང་རྒྱུའི་ཉེན་བརྡ་ཡང་བཏང་ཡོད་པ་རེད། འོན་ཀྱང་ཐེ་ཝན་ཐོག་ད་བར་དྲག་པོའི་རྒོལ་རྡུང་རིགས་ཕོག་མེད་ན་ཡང་། རྒྱ་ནག་གཞུང་གིས་ཐེ་ཝན་ལ་རང་བྱུང་བྱེ་མ་ཕྱིར་གཏོང་བྱ་རྒྱུ་བཀག་བསྡོམ་བྱས་འདུག་པ་མ་ཟད། ཐེ་ཝན་ནས་ཤིང་ཏོག་རིགས་དང་ཉ་སོགས་རྒྱ་ནག་དུ་ནང་འདྲེན་བྱ་རྒྱུ་བཀག་བསྡོམ་བྱས་འདུག
དེའི་ཐད་གསར་འགོད་པ་ཞིག་གིས། ལྕམ་(Pelosi)་མཆོག་ལ། རྒྱ་ནག་གཞུང་གིས་ཐེ་ཝན་ལ་དཔལ་འབྱོར་གྱི་ཉེས་ཆད་བཏང་བ་དེའི་ཐད་དགོངས་ཚུལ་ཇི་ཡོད་སྐོར་བཅར་འདྲི་ཞུས་སྐབས། སྤྱིར་རྒྱ་ནག་གིས་ལས་དོན་ཅི་འདྲ་ཞིག་བྱས་རུང་། རང་ཉིད་ཀྱི་ཁེ་ཕན་ཁོ་ནར་དམིགས་ཏེ་བྱེད་ཀྱི་རེད། དེ་ལས་ལྡོག་སྟེ་ད་ལྟ་འགག་རྩའི་དུས་འདིར་ཨ་མི་རི་ཀའི་གྲོས་ཚོགས་གོང་འོག་གཉིས་ཚུད་པའི་མང་གཙོ་ཚོགས་པ་དང་། སྤྱི་མཐུན་ཚོགས་པ་བཅས་ནས་མ་འོངས་པར་ཐེ་ཝན་དེ་བཞིན་ནུས་པ་ལྡན་པ་ཞིག་ཏུ་བསྐྲུན་རྒྱུའི་ཆེད་ད་ལྟ་ནས་དེའི་བདེ་འཇགས་སྲུང་སྐྱོབ་བྱ་རྒྱུའི་ཆོས་སེམས་བརྟན་པོ་ཡོད་ཅེས་ལན་འདེབས་གནང་འདུག
གནད་དོན་དེའི་ཐད་རྒྱ་ནག་གི་ཕྱི་སྲིད་བློན་ཆེན་གྱིས། (Pelosi)་ཐེ་ཝན་དུ་ཕེབས་པ་དེས་ཐེ་ཝན་གྱི་བདེ་འཇགས་དང་ཞི་བདེ་སོགས་ལ་གནོད་སྐྱོན་ཚབས་ཆེན་བཏང་ཡོད་པ་མ་ཟད། རྒྱ་ནག་དང་ཨ་རི་གཉིས་ཀྱི་འབྲེལ་བར་ཡང་ཤུགས་རྐྱེན་སྤྲོད་ངེས་ཡིན་ལ། ལྷག་ཏུ་རྒྱ་ནག་གི་བདག་དབང་དང་མངའ་ཁོངས་ལ་བརྡལ་བཤིག་བཏང་བར་ངོས་འཛིན་བྱེད་ཀྱི་ཡོད་པ་བརྗོད་འདུག
དབུས་བོད་མིའི་སྒྲིག་འཛུགས་ཀྱི་ཐེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས། རྒྱ་ནག་གཞུང་གིས་ལྕམ་(Pelosi)་ཐེ་ཝན་དུ་མ་ཕེབས་གོང་མཚོ་ཁར་དམག་སྦྱོང་བྱས་པ་ལ་སོགས་སྡིགས་ར་བསྐུལ་བ་དེ་དག་ནི་འུར་ཤོབ་བཤད་པ་ཙམ་ལས། དོན་དངོས་ཐོག་ལྕམ་སྐུ་མཆོག་ཐེ་ཝན་དུ་ཞི་བདེ་ངང་ཕེབས་ཡོད་པ་མཐོང་གསལ་རེད་ཅེས་གསུངས་བྱུང་། གཟའ་ལྷག་པའི་ཉིན་ལྕམ་ནེན་སི་པེ་ལོ་སི་མཆོག་གིས་ཐེ་ཝན་ནང་ཡོད་པའི་འགྲོ་བ་མིའི་ཐོབ་ཐང་དོན་གཉེར་བ་དང་ལས་འགུལ་བ་ཁག་ཅིག་མཇལ་འཕྲད་གནང་ཞིང་། དེའི་ཁོངས་སུ་དབུས་བོད་མིའི་སྒྲིག་འཛུགས་ཀྱི་ཐེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱང་ཡོད་ལ། ཁོང་གིས་ལྕམ་(Pelosi)་ལ་བོད་ཀྱི་གནས་བབས་དང་༧གོང་ས་སྐྱབས་མགོན་ཆེན་པོ་མཆོག་གི་སྐོར་སོགས་ཞུས་ཡོད་པ་ཨེ་ཤེ་ཡ་རང་དབང་རླུང་འཕྲིན་ཁང་གསུངས་བྱུང་།
ལྕམ་པེ་ལོ་སི་ཐེ་ཝན་དུ་ཕེབས་པར་སྤྱིར་ཐེ་ཝན་མི་དམངས་ཀྱི་ངོས་ནས་དགའ་བསུ་ཆེན་པོ་ཞུས་འདུག་ན་ཡང་། ཁོང་ལ་ངོ་རྒོལ་བྱ་མཁན་ཡང་བྱུང་འདུག ཐེ་ཝན་དུ་གནས་སྡོད་བོད་དོན་ལས་འགུལ་བ་བཀྲིས་ཚེ་རིང་ལགས་ཀྱིས། ལྕམ་(Pelosi)་མཆོག་ཐེ་ཝན་དུ་ཕེབས་པའི་སྐབས། གཞི་རྩའི་ཐེ་ཝན་མང་ཚོགས་ནས་དགའ་སྣང་ལྡན་པའི་ངང་སྣེ་ལེན་དགའ་བསུ་གཟབ་རྒྱས་ཞུས་ཡོད་ཀྱང་། རྒྱ་ནག་གཞུང་གིས་དངུལ་སྤྲད་ནས་མངགས་གཏོང་བྱས་པའི་མི་སྣ་ཁག་ཅིག་གིས་ངོ་རྒོལ་བྱེད་བཞིན་པ་མཐོང་རྒྱུ་འདུག་ཅེས་འགྲེལ་བརྗོད་གནང་བྱུང་།
ད་ལོ་དགུང་གྲངས་༨༢ལ་ཕེབས་པའི་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནེན་སི་པེ་ལོ་སི་མཆོག་ནི། ལོ་ངོ་༣༠ལྷག་རིང་བོད་དོན་ཐད་ཚད་མཐོའི་རྒྱབ་སྐྱོར་གནང་མཁན་ཞིག་ཡིན་མ་ཟད་། ༧གོང་ས་སྐྱབས་མགོན་ཆེན་པོ་མཆོག་དང་ཧ་ཅང་ཐུགས་ཉེ་པོ་ཡོད་མཁན་ཞིག་ཀྱང་ཡིན་པ་རེད། ལྕམ་པེ་ལོ་སི་མཆོག་དེ་སྔོན་གྲོས་ཚོགས་ཀྱི་ཚོགས་གཙོ་ཐེངས་དང་པོ་གནང་སྐབས་ཏེ། ཕྱི་ལོ་༢༠༠༨ལོར་བཞུགས་སྒར་རྡ་རམ་ས་ལར་ཆེད་ཕེབས་གནང་ཞིང་། སྐབས་དེ་དུས་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོའི་ལས་འགུལ་སྤེལ་བཞིན་པའི་ཐོག རྒྱ་ནག་གཞུང་གིས་སྡུག་རྩུབ་ཆེན་པོས་བོད་མི་མང་པོ་དམར་བསད་དང་འཛིན་བཟུང་བཙོན་འཇུག་བྱས་པའི་དུས་སྐབས་དང་འཁེལ་ཡོད་པ་རེད། དེ་རྗེས་ཕྱི་ལོ་༢༠༡༧ལོར་ཨ་རིའི་གྲོས་ཚོགས་འོག་མའི་ཁ་གཏད་ཚོགས་པའི་དབུ་ཁྲིད་གནང་པའི་སྐབས། ཨ་རིའི་སྲིད་དོན་ཚོགས་པ་གཉིས་ཀྱི་འཐུས་མི་ལས་གྲུབ་པའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ཞིག་སྣེ་ཁྲིད་གནང་སྟེ་སླར་ཡང་བཞུགས་སྒར་རྡ་རམ་ས་ལར་ཆེད་ཕེབས་གནང་ཡོད་པ་རེད། ཡང་ཕྱི་ལོ་༢༠༡༥ལོར་བོད་ཀྱི་རྒྱལ་ས་ལྷ་སར་ཆེད་ཕེབས་གནང་སྟེ། རྒྱ་ནག་གཞུང་གིས་བོད་ཀྱི་ཐོུང་མ་ཡིན་པའི་ཆོས་དང་རིག་གཞུང་། སྐད་ཡིག་དང་བཅས་པ་འཆར་གཞི་ལྡན་པའི་ཐོག་ནས་རྩ་མེད་གཏོང་ཐབས་བྱེད་བཞིན་ཡོད་པ་ཡང་ཡང་གསུངས་ཡོད་པ་རེད།

གསར་འགོད་པ། བློ་བཟང་དགེ་ལེགས།
རྩོམ་སྒྲིག་པ། རྡོ་རྗེ་དགྲ་འདུལ།
དྲ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲ་ཐོག་སྤེལ་མཁན། ཀླུ་འབུམ།

བལྟ་བཤེར་མང་ཤོས་བྱས་པའི་གནས་ཚུལ།
གསར་འགྱུར།
ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་གི་ལས་བསྡོམས་གྲོས་ཚོགས་སུ་སྙན་སྒྲོན་གནང་སོང་།
མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎