ཕྱི་རྒྱལ་ཡུལ་གྲུ་ཁག་གི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཡིག་སློབ་དེབ་གསར་པ།

དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ངོས་ནས་ཕྱི་རྒྱལ་ཡུལ་གྲུ་ཁག་གི་བོད་ཕྲུག་ཚོའི་ཆེད་བོད་ཀྱི་སྐད་ཡིག་དང་། རིག་གཞུང་། ལེགས་བྱང་བཅས་མི་ཉམས་རྒྱུན་འཛིན་ཡོང་བར་ཚོགས་འདུ་རིམ་ཚོགས་ཀྱིས་བགྲོ་གླེང་དང་། ལས་གཞི་མི་ཉུང་བ་ཞིག་སྤེལ་བཞིན་ཡོད་པ་དང་། ཕྱི་རྒྱལ་ཡུལ་གྲུ་ཁག་གི་སློབ་གྲྭ་ཚང་མའི་ནང་གཅིག་འགྱུར་གྱི་རྩ་འཛིན་ཐུབ་པའི་སློབ་དེབ་གཏན་འབེབས་གནང་རྒྱུའི་ཆེད་ཚོགས་ཆེན་རིམ་པར་ཚོགས་གནང་ཡོད་པ་རེད། ལས་གཞི་འདིའི་འོག་འདས་པའི་ལོ་མང་ནས་བསམ་ཚུལ་བསྡུ་ལེན་དང་། དེ་སྔ་གཏན་འབེབས་གནང་བའི་བྱང་ཨ་རིའི་བོད་ཀྱི་སྐད་ཡིག་འཛིན་གྲྭའི་སློབ་དེབ་ཁག་དང་། ཡང་ས་གནས་ཁག་ཅིག་གིས་ས་གནས་ཀྱི་གནས་སྟངས་ལ་གཞིགས་ནས་རྩོམ་སྒྲིག་གཏན་འབེབས་གནང་པའི་སློབ་དེབ་བཅས་ལ་བསྐྱར་ཞིབ་གནང་སྟེ། སྔོན་འགྲོ་འོག་མ་ནས་འཛིན་རིམ་བཞི་པའི་བར་གྱི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཡིག་སློབ་དེབ་ཅེས་པ་པར་སྐྲུན་འགྲེམས་སྤེལ་གནང་ཡོད་པ་རེད། དཔེར་ན་འཛིན་རིམ་བཞི་པའི་སློབ་དེབ་དེ་བཞིན་དེ་སྔ་གཏན་འབེབས་གནང་པའི་བྱང་ཨ་རིའི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཡིག་སློབ་དེབ་དང་བསྡུར་ན། ཁྱོན་ཡོངས་ཀྱི་བསླབ་གཞི་རྒྱ་ཆེ་རུ་བཏང་ཡོད་པས་མ་ཚད། བོད་ཀྱི་ལོ་རྒྱུས་སྤྱི་དང་། བྱེ་བྲག་ཏུ་བོད་ཀྱི་ནང་ཆོས་སྐོར་དང་། ལྷག་པར་ནང་ཆོས་ཀྱི་བསླབ་བྱའི་ནང་ནས་རྒྱུན་གཏན་བོད་ཕྲུག་གི་འཚར་ལོངས་ལ་དགོས་མཁོ་ཆེ་བའི་བསླབ་བྱ་དང་ཉམས་ལེན་ཁག་ཟུར་འདོན་ཞུས་ཡོད་པ་རེད། ཕྱོགས་མཚུངས་ཕྱི་རྒྱལ་ཡུལ་གྲུ་ཁག་གི་བོད་ཕྲུག་ནང་ཁུལ་བོད་སྐད་མ་སྐྱོན་པའི་དཀའ་ངལ་ཡོད་སྟབས། བརྗོད་གཞི་འདྲ་མིན་གྱི་ཐོག་གླེང་མོལ་གྱི་ལེ་ཚན་ཁག་ཅིག་ཀྱང་འཆར་སྒྲིག་གནང་ཡོད་པ་རེད།
ཕྱི་ལོ་ ༢༠༡༨ ལོར་ཤེས་རིག་ལས་ཁུངས་ནས་ཕྱི་རྒྱལ་ཡུལ་གྲུ་ཁག་གི་བོད་ཀྱི་སྐད་ཡིག་དང་རིག་གཞུང་སློབ་གྲྭ་སྤྱི་ལ་ཁྱབ་པའི་བསླབ་གཞིའི་རྩ་འཛིན་ཞིག་དགོས་གལ་གཟིགས་ཏེ་བོད་ཀྱི་སྐད་ཡིག་དང་རིག་གཞུང་སློབ་གྲྭ་ཁག་གི་དགེ་རྒན་དང་། སློབ་ཕྲུག་གི་གནས་སྟངས་ལ་ཞིབ་འཇུག་གནང་སྟེ་བསླབ་གཞི་རྩ་འཛིན་བཟོ་འགོད་བྱ་ཕྱོགས་ཐད་བོད་ཀྱི་སྐད་ཡིག་དང་རིག་གཞུང་སློབ་གྲྭ་ཁག་ནས་བསྡུ་ལེན་བྱས་པའི་དགོངས་འཆར། སྐད་ཡིག་གཞན་གྱི་བསླབ་གཞིའི་ལེགས་ཆ་བཅས་པ་གཞིར་བཞག་གིས་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བསླབ་གཞིའི་རྩ་འཛིན་ཞེས་པ་བཟོ་འགོད་ཀྱི་རགས་ཟིན་གཏན་འབེབས་བྱས་པ་དང་། ཕྱི་ལོ་ ༢༠༡༩ ལོར་ཤེས་རིག་ལས་ཁུངས་དང་། བྱང་ཨ་རི་སྐུ་ཚབ་དོན་ཁང་གཉིས་ཀྱིས་གོ་སྒྲིག་འོག་ཨ་རིའི་ནིའུ་ཡོག་གྲོང་ཁྱེར་དུ་བསྐོངས་ཚོགས་གནང་པའི་ཕྱི་རྒྱལ་ཡུལ་གྲུ་ཁག་གི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་ཚོགས་ཆེན་དང་པོའི་སྟེང་སྤྱི་མོས་ཀྱིས་གཏན་འབེབས་གནང་ཡོད་པ་རེད།
བོད་ཀྱི་སྐད་ཡིག་དང་རིག་གཞུང་སློབ་གྲྭ་ཁག་གི་དགོངས་འཆར་བསྡུ་ལེན་བྱས་པའི་ཐོག བོད་མིའི་སྒྲིག་འཛུགས་ཀྱི་སྔོན་རྩིས་ཀྱི་རྩིས་ལོ་ ༢༠༢༣-༢༤ ནང་སྔོན་འགྲོ་འོག་མ་ནས་འཛིན་རིམ་བཞི་པ་བར་གྱི་སློབ་དེབ་གཏན་འབེབས་དང་པར་སྐྲུན་གནང་སྟེ་བོད་ཀྱི་སྐད་ཡིག་དང་རིག་གཞུང་སློབ་གྲྭ་ཁག་ལ་ཚོད་ལྟའི་ཚུལ་དུ་འཛིན་རིམ་རེ་ཡི་སློབ་དེབ་གྲངས་ལྔ་རེ་རིན་མེད་ཀྱི་ཐོག་ནས་འགྲེམས་སྤེལ་གནང་རྒྱུའི་གསལ་བསྒྲགས་གནང་ཡོད་པ་རེད་ལ། འདི་ལོ་བོད་ཀྱི་སྐད་ཡིག་དང་རིག་གཞུང་སློབ་གྲྭའི་འཛིན་རིམ་ལྔ་པ་ནས་བདུན་པ་བར་གྱི་སློབ་དེབ་རྩོམ་སྒྲིག་ཞུ་བཞིན་ཡོད་འདུག
ཕྱི་རྒྱལ་ཡུལ་གྲུ་ཁག་གི་ནང་ཚར་ལོངས་བྱུང་བཞིན་པའི་བོད་ཕྲུག་རྣམས་ཀྱི་བོད་ཀྱི་སྐད་ཡིག་དང་རིག་གཞུང་ཡར་རྒྱས་གོང་སྤེལ་སླད། ས་གནས་མང་ཆེ་བའི་ནང་གཟའ་མཇུག་བོད་ཡིག་སློབ་གྲྭ་ཟུར་འཚོགས་གནང་བཞིན་ཡོད་པ་དང་། སློབ་གྲྭ་དེ་དག་གི་ཆེད་རྒྱ་བལ་འབྲུག་གསུམ་གྱི་སློབ་ཕྲུག་དང་མཉམ་པའི་བོད་ཡིག་སློབ་དེབ་བེད་སྤྱོད་བྱ་རྒྱུར་སྐུ་ངལ་ཡོད་པར་བརྟེན། བོད་ཀྱི་སྐད་ཡིག་དང་རིག་གཞུང་སློབ་གྲྭའི་ཆེད་བོད་ཡིག་སློབ་དེབ་ཟུར་དུ་གཏན་འབེབས་དགོས་པའི་དགོངས་འཆར་བྱུང་བ་ལྟར། བྱང་ཨ་རིའི་བོད་ཀྱི་སྐད་ཡིག་དང་རིག་གཞུང་སློབ་གྲྭའི་བོད་ཡིག་སློབ་དེབ་ཅེས་པ་པར་སྐྲུན་དང་། བསྐྱར་ཞིབ་ཐེངས་གཉིས་ཙམ་གནང་ཡོད་པ་རེད། ད་ཆ་གཏན་འབེབས་གནང་པའི་སློབ་དེབ་དེ་བྱང་ཨ་རི་ཙམ་མ་ཚད། ཕྱི་རྒྱལ་ཡུལ་གྲུ་ཁག་ཚང་མའི་ནང་ཡོད་པའི་གཟའ་མཇུག་བོད་ཡིག་སློབ་གྲྭར་སློབ་ཁྲིད་ལག་བསྟར་ཐུབ་པའི་རེ་བ་གནང་བཞིན་ཡོད་པ་རེད།།

གསར་འགོད་པ། ཚེ་དབང་དངོས་གྲུབ།
རྩོམ་སྒྲིག་པ། བསྟན་འཛིན་བདེ་སྐྱིད།
དྲྭ་ཐོག་རྩོམ་སྒྲིག་པ། བཀྲིས་དབང་ཕྱུག
དྲྭ་ཐོག་སྤེལ་མཁན། པ་སངས་དོན་ལྡན།