རྒྱ་གར་གྱིས་བོད་རང་བཙན་ལ་རྒྱབ་སྐྱོར་བྱེད་པའི་དུས་ལ་སླེབས་འདུག་ཟེར།

རྒྱ་གར་གྱིས་བོད་རང་བཙན་ལ་རྒྱབ་སྐྱོར་བྱེད་པའི་དུས་སུ་སླེབས་ཡོད་པ་རྒྱ་གར་གྱི་བདེ་སྲུང་བློན་ཆེན་ཟུར་པ་མཆོག་གིས་གྲོས་ཚོགས་ནང་གསུངས་འདུག
དེང་སྐབས་རྒྱ་གར་དང་རྒྱ་ནག་དབར་ས་མཚམས་དང་འབྲེལ་བའི་རྩོད་རྙོག་ཇེ་ཆེར་འགྲོ་བཞིན་པའི་སྐབས་འདིར་རྒྱ་གར་བདེ་སྲུང་བློན་ཆེན་ཟུར་པ་དང་Samajwadi སྲིད་དོན་ཚོགས་པའི་དབུ་ཁྲིད། མུལ་ཡམ་སིངག་ཡ་རྡཝ་མཆོག་གིས་བོད་རང་བཙན་ལ་རྒྱབ་སྐྱོར་བྱེད་པའི་དུས་སུ་སླེབས་ཡོད་པ་རྒྱ་གར་གྱི་དབྱར་དུས་གྲོས་ཚོགས་ཚོགས་དུས་སྐབས་ཕྱི་ཟླ་ ༧ ཚེས་ ༡༩ གཟའ་ལྷག་པའི་ཉིན་གསུངས་འདུག
ད་དུང་ཁོང་གིས་རྒྱ་གར་གྱི་དགྲ་བོ་ངོ་མ་དང་ཉེན་ཁ་བཟོ་མཁན་གཙོ་བོ་ནི་པ་ཀིསི་ཐན་མ་ཡིན་པར་རྒྱ་ནག་ཡིན་པ་གསུངས་ཤིང་། ཁོང་གིས་དེ་སྔོན་ཡང་རྒྱ་གར་གཞུང་འཛིན་པ་ཚོར་རྒྱ་ནག་གི་ངོས་ནས་ཉེན་ཁ་བཟོ་བཞིན་པའི་སྔོན་བརྡ་ཡང་ཡང་བཏང་ཡང་གདོང་ལེན་ཚུལ་བཞིན་མ་གནང་པའི་སྐྱོན་བརྗོད་ཀྱང་གནང་འདུག  ཁོང་གིས་བོད་རྒྱ་ནག་ལ་རྩིས་སྤྲོད་བྱས་པ་དེ་ནི་ཧ་ཅང་གི་ནོར་འཁྲུལ་ཞིག་ཡིན་པ་གསུངས་པ་དང་། ད་ཆ་རྒྱ་ནག་གིས་བྱ་སྤྱོད་ལ་གཞིགས་ཏེ་བོད་རང་བཙན་གྱི་ཆོད་སེམས་ལ་ང་ཚོས་རྒྱབ་སྐྱོར་བྱེད་དགོས་ཀྱི་རེད། ད་བར་དེར་རྒྱབ་སྐྱོར་བྱས་ཡོད་པ་མ་རེད་ཅེས་གསུངས་འདུག
ད་དུང་སྐུ་ཞབས་ ཡ་རྡཝ་མཆོག་གིས་ བོད་ནི་རྒྱ་གར་གྱི་བར་གནས་སྒོ་སྲུང་ལྟ་བུ་རེད་ཅེས་དང་། མིང་འབོད་མ་ཞུས་པའི་ཐོག་ནས་དེ་སྔོན་རྒྱ་གར་གྱི་དབུ་ཁྲིད་ནས་བོད་རྒྱ་ནག་ལ་རྩིས་སྤྲོད་གནང་པ་དེ་ནི་ནོར་འཁྲུལ་ཞིག་ཡིན་ལ། སྐབས་དེར་སར་རྡར་ཝ་ལ་སྦཡི་པ་ཊེལ་ (Sardar Vallabhbhai Patel) མཆོག་ནས་བོད་རྒྱ་ནག་ལ་རྩིས་སྤྲད་པ་ཡིན་ན་རྒྱ་ནག་ཐད་ཀར་རྒྱ་གར་ནང་ཡོང་རྒྱུའི་ལམ་སྤྲད་པ་ལྟ་བུ་ཆགས་རྒྱུ་ཡིན་པ་གསུངས་ཏེ་ངོ་རྒོལ་ཡང་གནང་ཡོད་པ་གསུངས་འདུག
ཁོང་གིས་༧གོང་ས་༧སྐྱབས་མགོན་ཆེན་པོ་མཆོག་ནི་བོད་ཀྱི་དབུ་ཁྲིད་ཡིན་པ་དང་། ཁོང་ནི་རྟག་ཏུ་རྒྱ་གར་གྱི་གྲོགས་པོ་ཡིན་ཞིང་། འདས་པའི་ལོ་དེ་དག་རིང་རྒྱ་གར་ལ་ཞུགས་ཡོད་ལ། རྒྱ་གར་གཞུང་དམངས་གཉིས་ཀས་ཁོང་ལ་རྒྱབ་སྐྱོར་ཆ་ཚང་བ་འབུལ་དགོས་ཀྱི་རེད་དེ། རྒྱབ་སྐྱོར་ཆ་ཚང་བ་ཕུལ་ཐུབ་མེད་པ་རེད་ཅེས་གསུངས་འདུག
རྒྱ་ནག་གིས་ངོས་ནས་ཉེ་ཆར་བོད་ནང་གཞི་རྒྱ་ཆེ་བའི་དམག་སྦྱོང་བྱས་ཡོད་ཅིང་། སྐུ་ཞབས་མུལ་ཡམ་སིངྒ་ཡ་རྡཝ་མཆོག་གིས་རྒྱ་ནག་གིས་རྒྱ་གར་ལ་ཚུར་རྒོལ་བྱ་རྒྱུ་ཡིན་པའི་ཉེན་བརྡ་བཏང་གནང་འདུག

གསར་འགོད་པ་ཀརྨ་རྒྱ་མཚོ།